Tusigāmanatu o le Konafesi o Oketopa 2013

“O le mea ua fai atu ai A’u o le Alii, ua Ou fai atu ai; … pe i lo’u lava leo po o i le leo o a’u auauna, ua tutusa lava” (MF&F 1:38).

A o e suesueina le konafesi aoao ia Oketopa 2013, e mafai ona e faaaogaina nei itulau (ma Tusigāmanatu o le Konafesi i lomiga i le lumanai) e fesoasoani ai ia te oe e suesue ma faaaoga aoaoga talu ai nei a perofeta soifua ma aposetolo ma isi taitai o le Ekalesia.

Folafolaga Faaperofeta: Fetaiai Ma Tofotofoga

“O lo tatou Tama Faalelagi, o le o loo tuuina mai ia i tatou le tele o mea e fiafia ai, ua Ia silafia foi tatou te aoao ma tuputupu ae ma malosi atili ao tatou fetaiai ma manumalo mai tofotofoga ia e tatau ona tatou pasia. Ua tatou iloa e i ai taimi o le a tatou lagonaina ai le faanoanoa o le lotonutimomoia, o taimi tatou te faavauvau ai, ma taimi atonu o le a tofotofoina ai i tatou i le mea e gata ai. Peitai, o ia faigata e faatagaina ai i tatou ia suia mo le lelei sili atu, ia toe fausia o tatou olaga i le ala ua aoao ai i tatou e lo tatou Tama Faalelagi, ma ia avea ma se tagata e ese mai le tagata sa tatou avea ai — ia lelei atu nai lo le mea sa tatou i ai, sili atu ona malamalama nai lo le mea sa tatou i ai, sili atu ona tigaalofa nai lo le mea sa tatou i ai, faatasi ai ma ni molimau malolosi atu nai lo a tatou molimau sa i ai muamua.

“E tatau ona avea lenei ma a tatou faamoemoega — e le gata ia tumau ma onosai, ae ia faapena foi ona faamamaina atili faaleagaga a o tatou ola i taimi lelei ma taimi leaga. Ana le seanoa mo luitau ia faatoilaloina ma faafitauli ia foiaina, semanu o le a tatou tumau ai lava i le mea e tasi, i sina alualu i luma pe leai foi e agai atu i la tatou sini o le ola e faavavau.”

Peresitene Thomas S. Monson, “Ou Te Le Tuua Lava Oe, Ou Te le Tuulafoai Lava ia te Oe,” Liahona, Nov. 2013, 87.

O Tali mo Oe

O konafesi taitasi, ua tuuina mai e perofeta ma aposetolo ni tali musuia i fesili atonu e i ai i tagata o le Ekalesia. Faaaoga lau lomiga o Novema 2013 pe asiasi i le conference.lds.org e sue ai tali i fesili nei:

O a aoaoga faavae ua tatou aoaoina i le Mataupu Faavae o le Faatuatua? Tagai L. Tom Perry, “O Aoaoga Faavae ma Mataupu Faavae o Loo I Ai i Mataupu Faavae o le Faatuatua.”
E mafai faapefea ona tatou auai i le galuega faafaifeautalai pe afai tatou te lagonaina le fefe? Tagai M. Russell Ballard, “Ia Outou Faalagolago i le Alii.”
O a mea e faaaogaina ai le sefuluai? Tagai David A. Bednar, “O Pupuni o le Lagi.”
E mafai faapefea e le agasala ma le tetee ona aafia ai lo tatou faitalia ma taitai atu ai i le nofo pologa? Tagai Quentin L. Cook, “O Le Auega a Ieremia: Faaeteete i le Nofo Pologa.”

O Upu a Perofeta i Tamaitai ma le Perisitua

Sa fesili Elder Neil L. Andersen o le Korama a Aposetolo e Toasefululua: “Aisea la e faatautaia ai e alii ia sauniga o le perisitua? …

“E pei lava ona tatou iloa ma le mautinoa e ‘tutusa’ le alofa o le Atua mo Ona atalii ma Ona afafine, ua tatou iloa foi Na te lei foafoaina ia tutusa ia alii ma tamaitai. Ua tatou iloa o le itupa o se vaega e manaomia mo lo tatou faasinomaga ma faamoemoega faaletino ma le faavavau. Ua tuuina atu i itupa uma ni tiutetauave paia.

“Na tatou iloa mai le amataga na faavaeina e le Alii le ala e faatautaia ai Lana perisitua.”

I le faamatalaga faaiu lona 12 o lenei lauga, sa taua ai e Elder Andersen isi perofeta o e na tali mai i lenei fesili. Na saunoa mai Peresitene Gordon B. Hinckley (1910–2008), “O le Alii na filifili o alii i Lana Ekalesia e tatau ona umiaina le perisitua.” Na saunoa mai Elder M. Russell Ballard o le Korama a Aposetolo e Toasefululua, “E le faaalia mai lava e le Alii pe aisea ua Ia faatulagaina ai Lana Ekalesia e pei ona Ia faia ai.”

Mai le “Mana o le Perisitua,” Liahona, Nov. 2013, 92.

Faatumu le Avanoa

“O tagata tausi feagaiga o tagata foi ia e tausi i _________________!” (Linda K. Burton, “O Le Mana, Olioli, ma le Alofa e Maua i le Tausiga o Feagaiga, Liahona, Nov. 2013, 113).
“O le toatele, e aunoa ma le iloaina ai, ua taitaiina e le Alii i nofoaga lea e mafai ona latou faalogo ai i le _____________ ma o mai i Lana _____________” (Gérald Caussé, “ E Le O Toe Tagata Ese Outou, Liahona, Nov. 2013, 50).
“ O le amiotonu e sili atu le malosi nai lo o le _______________” (Boyd K. Packer, “O Le Ki i le Puipuiga Faaleagaga,” Liahona, Nov. 2013, 27).
“ O le faanenefuina o eseesega o tamaitai ma alii, ua tatou le iloa ai meaalofa manino, ma tutusa lelei a _____________ ma _____________ ia e fatuina faatasi ai se mea atoa maoae atu” (D. Todd Christofferson, “O Le Malosiaga Amiotonu o Tamaitai, Liahona, Nov. 2013, 31).

Agavale: ata na pueina e Ashton G. Smith; Taumatau, mai le taumatau pito i luga i le agavale: ata na pueina e August Miller; ata na saunia e Carlos Isaraelu Gutiérrez Robles; ata na pueina e Emily Leishman Beus