Savali a le Au Peresitene Sili
O Le Taimi Sili ona Lelei e Totoina ai se Laau
I Roma anamua, na avea Janus ma atua o le amataga. E masani ona faailoa mai o ia ma ni foliga se lua—o se tasi o tepa i tua i le taimi ua tuanai, ma le isi o vaavaai atu i luma i le lumanai. O nisi o gagana e faaigoaina le masina o Ianuari ia te ia ona o le amataga o le tausaga o se taimi mo le toe manatunatuga faapea foi ma fuafuaga.
O le faitau afe o tausaga mulimuli ane, e faaauauina ai e le tele o aganuu i le lalolagi atoa se tu masani o le faia o ni folafolaga mo le tausaga fou. E moni, o le faia o ni folafolaga e faigofie—ae o le tausiaina o se mea e ese mai ai lava.
Sa faia e se tasi alii se lisi umi o folafolaga mo le Tausaga Fou ma maua ni lagona lelei i lona alualu i luma. Sa ia mafaufau ia te ia lava, “E oo mai i le taimi nei, o loo ou tausia lava au meaai paleni, ou te le o toe ita, o lea ou te tumau i lau paketi, ma ou te le o toe tomumu lava i le taifau a le tuaoi. Ae o le asō o le aso 2 o Ianuari ma na tatagi le faailo o le uati ua oo i le taimi ou te ala ai i luga. O le a manaomia se vavega e faaauau ai pea ona ou tumau ma mulimuli i au sini uma.”
Toe Amataina
O loo i ai se mea faamoemoeina ofoofogia e uiga i se amataga fou. Ou te matea i se tasi taimi po o le isi foi na tatou mananao uma lava e faia se amataga fou e aunoa ma ni mea sese.
Ou te fiafia i le mauaina o se komepiuta fou ma se utugagana mama a le komepiuta. E lelei atoatoa mo se taimi.Ae a o faagasolo pea ia aso ma vaiaso ma amata faapipiiina le tele ma le tele o polokalama (o nisi e faamoemoeina, o nisi e le faamoemoeina), o le a iu lava ina faifaiaga le komepiuta, ma o mea sa masani ona vave ma lelei le faiga ua amata ona tuai. O nisi taimi e le ola ai lava. E oo lava i le amataina o le a avea ma se galuega pe a tumu le utugagana a le komepiuta i le anoanoai o lapisi faalavefau o faamatalaga ma faatekinolosi. O le a i ai ni taimi e na o le pau le mea e fai o le toe tapeese o le utugagana o le komepiuta ma toe amataina.
E mafai foi ona faatumulia tagata soifua i le fefe, masalosalo, ma le tausalaina i avega mamafa. E mafai foi e mea sese na tatou faia (fuafuaina ma lei fuafuaina) ona avea ma avega i o tatou luga seia oo ina foliga mai ua faigata le faia o le mea tatou te iloa e tatau ona tatou faia.
I le tulaga o le agasala, o loo i ai se faagasologa o le toe faatulagaina matagofie e ta’ua o le salamo lea e mafai ai e i tatou ona faamamaina o tatou utugagana faakomepiuta mai faaletonu ia ua mamafatu i o tatou loto. O le talalelei, e ala i le Togiola faavavega ma le alofa o Iesu Keriso, ua faaalia mai ia i tatou le ala e faamama ai o tatou agaga mai pisipisia o le agasala ma toe faafouina, atoatoa, ma mama e pei o se tamaitiiti.
Ae o nisi taimi e i ai isi mea e faatuaia ma taofia i tatou, ma mafua ai ni mafaufauga ma faatinoga le aoga ma faafaigata ai mo i tatou ona toe amatalia.
Faaalia Mai o lo Tatou Tagata Sili
O le faatutuina o sini o se taumafaiga taua. Ua tatou iloa o loo i ai ni sini a lo tatou Tama Faalelagi aua na Ia fetalai mai o Lana galuega ma le mamalu lenei o le “ia aumaia le tino ola pea ma le ola e faavavau o le tagata” (Mose 1:39).
O a tatou sini faaletagata lava ia e mafai ona faaalia mai ai lo tatou tagata sili. Ae peitai, o se tasi o mea e faalavelave ia tatou taumafaiga i le osia ma tausia o faaiuga o le faatuai lea. O nisi taimi e faatuai ai ona tatou amata, faatalitali mo le taimi sa’o e amata ai—o le aso muamua o se tausaga fou, o le amataga o le taumafanafana, ina ua valaauina i tatou o se epikopo po o le peresitene o le Aualofa, ina ua amata ona aooga le fanau, pe a tatou litaea.
E te le tau manaomia se valaaulia ae e te lei agai atu i le ala o au sini amiotonu. E te le tau faatali mo se faatagaga e avea ma tagata na foafoaina ai oe e avea ai. E te le tau faatali seia valaaulia e auauna atu i le Ekalesia.
E mafai i nisi taimi ona tatou faamaumauina tausaga o o tatou olaga e faatalitali ai ina ia filifilia (tagai i le MF&F 121:34–36). Ae o se manatu sese lena mea. Ua uma ona filifilia oe!
E i ai taimi i lo’u olaga sa ou faaaluina ai ni po o le le moe e tauivi ai ma ni faafitauli, popolega, po o faanoanoaga patino. Ae po o le a le pogisa o le po, e faamalosiauina lava au i lenei manatu: o le a oso ae lava le la i le taeao.
O aso fou taitasi, e tafa mai ai se ata fou—e le gata mo le lalolagi ae faapea foi mo i tatou. Ma faatasi ai la ma se aso fou o le a oo mai ai se amataga fou—o se avanoa e toe amata ai.
Ae Faafefea pe Afai Tatou Te Toilalo?
O nisi taimi o le mea o taofia mai i tatou o le fefe. Atonu tatou te fefefe nei o tatou toilalo, nei o tatou manuia, nei faamaasiasia i tatou, nei suia i tatou e le manuia, pe suia tagata tatou te alolofa i ai.
Ma o lea tatou te faatali ai. Pe faavaivai.
O le isi mea e tatau ona tatou manatua pe a oo mai i le faatutuina o sini o le mea lenei: E toetoe lava a tatou toilalo—o le mea sili i se tulaga puupuu. Ae nai lo le lotovaivai, e mafai ona faamalosia i tatou aua o lenei malamalamaaga e aveesea ai le mamafa o le atoatoa i le taimi nei. Sa faailoa mai le amataga i se tasi taimi po o se isi, atonu tatou te le ausia le atoatoa. O le muai iloaina o lenei mea e aveese ai le tele o le ofo ma le lotovaivai o le toilalo.
A tatou taulimaina a tatou sini i lenei auala, e le tatau ona faatapulaaina i tatou e le toilalo. Ia manatua, e tusa lava pe tatou te le oo atu i le taimi lava lea i lo tatou taunuuga sili ma moomia, ae ua tatou alualu i luma i le aluga o le ala o le a tau atu i ai.
Ma o le mea lena e taua—e taua tele.
E ui lava atonu tatou te le taunuu i lo tatou tini, ae o le faaauauina o le malaga o le a avea ai i tatou ma tagata sili atu nai lo le taimi muamua.
O Le Taimi Sili e Amata Ai o le Taimi Nei
Na fai mai se alagaupu tuai, “O le taimi sili ona lelei e totoina ai se laau o le 20 tausaga ua mavae. O le taimi sili lona lua o le taimi nei.”
O loo i ai se mea matagofie ma faamoemoeina e uiga i le upu nei. O loo i ai se mea mamana e uiga i le mea moni e faapea afai tatou te filifili i le taimi nei, e mafai ona tatou agai i luma i le taimi lava lenei.
O le taimi nei o le taimi sili lea ona lelei e amata ai ona tatou avea ma tagata tatou te fia avea ai—e le gata i le 20 tausaga mai le taimi nei, ae faapea foi mo le faavavau atoa.
Aoao Atu mai Lenei Savali
Na faamalamalama mai e Peresitene Uchtdorf faapea afai tatou te le ausia a tatou sini, “e mafai ona faamalosia i tatou. … E ui lava ina atonu tatou te le taunuu i lo tatou tini, ae o le faaauauina o le malaga o le a avea ai i tatou ma tagata sili atu nai lo le taimi muamua. Fai atu i tagata o le aiga e faasoa mai ni aafiaga na latou aoaoina atili mai i le faagasologa nai lo mea na latou aoaoina mai le taunuuga, e pei o le faauu mai le aoga po o le mauaina o se taui.
Ata na pueina e iStockphoto/Thinkstock