O Vaega Uma e Lua o le Faamanuiaga
O le auai i le malumalu ma talafaasolopito o aiga e taua uma; pe a tuufaatasi, la te aumaia faamanuiaga faaopoopo.
A o e matamata i itulau o le Liahona o le masina lenei, tagai i le tele o ituaiga lanu eseese lea e faamanaiaina ia ata taitasi, atavali, po o se mamanu. O le toatele o lanu na mafai ona maua ona o le tuufaatasia o ni lanu autu se lua—lanumumu, lanusamasama, po o le lanumoana—e fatu ai se lanu fou, o se tasi o lanu e le mafai ona maua pe afai na tuueseese ia lanu autu.
E tulaga tutusa le galuega o malumalu ma talafaasolopito o aiga ma na lanu: e mafai ona e maua atili ni faamanuiaga i le tuufaatasia o galuega taua ia e lua. O le mafuaaga ona o le galuega o talafaasolopito o aiga ma le malumalu o ni vaega moni lava e lua o se galuega e tasi—o le galuega o le faaolataga. Ioe o le a e mauaina pea ia faamanuiaga silisili e ala i le fesoasoani atu i isi ia latou talafaasolopito o aiga ma e ala i le auai atu i le malumalu e faia le galuega mo tagata ua tuuina atu iina o latou suafa. Ae o le a faapea ona e maua ai faamanuiaga sili atu—o le olioli i vaega uma o lanu—pe a e tuufaatasia ia vaega e lua ma maua ai igoa o ou lava aiga ona faatino lea o le galuega mo ou tuaa i le malumalu.
E pei ona aoao mai Elder Richard G. Scott o le Korama a Aposetolo e Toasefululua:
“O galuega o le malumalu ma talafaasolopito o aiga o le galuega e tasi e vaevaeina i ni vaega se lua. …
“E finagalo le Tama oi le Lagi ia maua e i tatou taitoatasi ia vaega uma e lua o faamanuiaga o lenei galuega taua e fai ai ma sui [o e ua maliliu]. Ua Ia taitaiina isi e faasino mai ia i tatou le ala e agavaa ai. O oe ma a’u lava e pa’ū i ai le mauaina o na faamanuiaga.
“Soo se galuega e te faia i le malumalu o le taimi faaaluina tatau lea, ae o le mauaina o sauniga sui mo ou lava tuaa o le a sili atu ai ona paia le taimi i le malumalu ma o le a faapea ona maua ai faamanuiaga sili atu.”1
O a la nisi o “faamanuiaga sili atu” lea e oo mai pe a tatou mauaina “vaega uma e lua o le faamanuiaga”? I le itu taumatau o loo i ai ni folafolaga se tele mai Aposetolo o nei ona po.
O Se Uunaiga o le Faamamaina, ma le Faaleagaga
“O galuega o talafaasolopito o aiga a tagata o le Ekalesia ua i ai se aafiaga faaleleia, faaleagaga, ma toafilemu ia i latou o e o galulue ai. Ua latou malamalama o loo latou sosooina faatasi o latou aiga. … Afai tatou te sailia o tatou lava gafa ua sili atu isi mea tatou te fiafia i ai nai lo igoa … O mea tatou te fiafia i ai e liliuina atu ai o tatou loto i o tatou tama — tatou te saili ia maua i latou ma iloa i latou ma auauna atu ia te i latou.”2
Vaega o se Galuega e Sili Atu
“Sootaga faaleagaga … e mau. … Pe a liliu atu o tatou loto i o tatou tuaa, e i ai se mea i totonu o i tatou e suia. Tatou te lagonaina o i tatou o se vaega o se mea e sili atu nai lo o i tatou lava.”3
O Se Malupuipuiga e tetee atu i Faaosoosoga
“E manuia uma lava i tatou i e ua muamua atu. O le aoao i na tala e fesoasoani ia i tatou e iloa po o ai i tatou ma o fea tatou te o mai ai.… O e faia se sailiiliga i lou lava aiga ma fesoasoani i sailiiliga a isi tagata? Mo se tagata talavou, i le amioleaga o le lalolagi o tatou ola ai nei, o se tasi lea o puipuiga sili mai faaosoosoga a le fili.”4
Fesoasoaniga mai le Lalolagi lē Vaaia
“Masalo afai tatou te faia la tatou galuega e fai ma sui o i latou o le lalolagi lē vaaia, o e fia aai, ma tatalo mo le galuega e mafai ona tatou faia mo i latou, o le a tuuina mai ia i tatou e le lalolagi se fesoasoani i lenei vaitaimi o lo tatou manaoga faanatinati. E toatele atu tagata i le lalolagi o agaga nai lo iinei. E tele atu le mana ma le malosi iina nai lo iinei i lenei lalolagi.”5
O Le a se Mea o le a E Faia?
O le a se mea o le a e faia e “mauaina ai na faamanuiaga” o le sailia o igoa o le aiga ona aveina lea o i latou i le malumalu? Fai se fuafuaga i le taimi nei e aumai ai folafolaga o le mauaina o vaega uma e lua o le faamanuiaga i lou olaga.
Ata na tusia e Welden C. Andersen ma Steve Tregeagle; atavali o John A. Widtsoe na saunia e R. E. Bird