E Alofa o Ia ia te Oe
Alice Victoria Weston-Sherwood, Arkansas, ISA
Sa ou saofai i le tulimanu o le potu selesitila i talaane o le okeni i le taimi o le faapaiaga o le Malumalu o Memphis Tennessee. O Peresitene James E. Faust (1920–2007), o se tasi o le Au Peresitene Sili mai le 1995 i le 2007, na malaga mai e faapaia le malumalu. O ia ma isi taitai sa nonofo i tua atu o le masini faaleotele leo. Sa ulufale mai se aufaipese o le lotoifale o le Ekalesia ma tutu i tua atu o i latou.
O se tamaitai talavou sa ou faiaoga asiasi ai sa avea ma se tasi o le aufaipese. I le faagasologa o le sauniga, sa ou tatalo ina ia ona maua le mea sa ia sau ai. Sa ia faasoa mai ia te aʼu sa sau o ia i le faapaiaga o le malumalu i lena aso ina ia maua ai lona tulaga ma le Alii. Sa ia faia ni agasala matuia i le taimi ua tuanai, ma e ui lava ua ia salamo, sa tauivi pea lava ia maua se lagona lelei e uiga ia te ia lava ma ia maua foi se lagona lelei e uiga i le pese ai i le aufaipese.
Sa ou sioa atu ia Peresitene Faust, ma lagonaina faapea o ia, i le avea ai ma sui o le Alii i le Au Peresitene Sili, e tatau ona mafai ona faia se mea. Ae e faapefea ona ou ta’u atu ia te ia, ma e faapefea ona ia faia se mea? A maea le sauniga, o le a ia ulufafo atu mai le potu e pei ona sa afio mai o ia, ma o le a leai se faalauiloaga, e leai ni faatalofa, ma e leai ni upu e fesuiai. Sa ou malamalama e pisi o ia ma e i ai ni fuafuaga o faigamalaga, ae sa ou tatalo pea.
Sa loloto mafaufauga o Peresitene Faust, tilotilo mai ia te au mo sina taimi—na fusia faatasi musele i ona fulufulu mata. Ina ua uma le sauniga, sa lofituina ona foliga i se faailoaga o le fiafia i le malamalama.
Sa ia toe tilotilo mai ia te au ona faafuasei lea ona tu i luga, faliu i tua, ma faaloaloa atu lona aao i luma i le mea e gata mai ai. Sa ia tusi sa’o atu lava i la’u uo. Ona ia fai atu lea ma le mausali ma le leotele, “E alofa le Alii ia te oe!”
O le taga a Peresitene Faust sa laitiiti ma faigofie ae mamana ma e na o le Agaga Paia lava e mafai ona fesootai atu ia te ia mea sa le mafai ona ou fai atu ai. Na faamanuiaina la’u uo e na upu ma faaauau ai pea ona lagolagoina lou faatuatua e faapea e manatua e le Alii ia mea uma i o tatou olaga “o mea laiti ma faatauvaa e faataunuu ai mea tetele” (Alema 37:6).