O Le Mea Oona Sili ona Lalelei
Alison L. Randall, Iuta, ISA
Ina ua ou laa atu i fafo o le faitotoa o i luma e aumai le nusipepa, sa ou vaaia se vaaiga lē lelei. O se faaputuga o loi lanumumu na faaputuputu i le po, o fetolofi solo i totonu o taetaei i le va o le vao ma le auala savali.
E ui e lei leva ona ma nonofo ma lo’u toalua i Texas, ISA, sa ou iloaina mai aafiaga tiga o u maatiati a loi, e le o lo latou lanu, na maua ai lo latou igoa tauvalaau. Sa ou agai atu i le fale taavale, lea sa tuu ai le vailaau e tape ai iniseti. Ona ou faitaua lea o faatonuga i luga o le pepa.
“[O lenei vailaau e tape ai iniseti] e matuai faatosina atu i loi afi,” sa ou faitauina ai. “O le a latou aveina atu ia latou faaputuga, fafaga ai la latou masiofo, ma o le a pepe le nuu.” Na faatonuina au e le faailoga e lulu sina vailaau i luga ma autafa o le faaputuga. O le a faia e loi le vaega o totoe.
Sa ou le talitonu. Na foliga mai sa fai lava si popoto o loi ia te au, na mafai ona latou fausia ni faaputuga uumi i se po e tasi. Sa ou le talitonu latou te pa’u’u mo se mea e faafoliga e oona, ae sa ou luluina lava.
I se taimi e lei umi mulimuli ane sa ou iloa ai le pisi o le faaputuga i gaoioiga. Sa ou tausia lo’u mamao ae punou e matamata i le vevesi. Sa latou matua fiafia e pei faatoa timu mai le manai mai le lagi. Sa latou lifiina i luga ia fasi vailaau papae i a latou tamai tui ma taia solo le tasi ma le isi i lo latou faanatinati e ave le vailaau oona i la latou faaputuga.
Sa ou matauina ma le ofo tele. Sa latou aveina ma le naunautai le vailaau oona i lo latou aiga. O le mea moni lava, o upu “matuai faatosina lava” e lei faateleina. I se isi itu sa mafai e le kamupani e gaosia vailaau ona faia se mea leaga—matuai oona lava—e foliga mai o se mea e sili ona lelei.
Ou te lei vaaia lava se faataitaiga sili atu ona tulaga ese o le auala e mafai ai ona avea se mea leaga ia foliga lelei. Sa ou mafaufau ai i le auala o loo faia ai e Satani lea lava mea e tasi. Sa faamafanafanaina au i le iloaina e ui lava e mafai ona ia luluina i autafa o lou fale ana mea oona e faasese ai, e le mafai ona ia aumaia i totonu—sei vagana ua ou faatagaina o ia. E faapefea la ona ou taofiaina i fafo?
Na oo mai i lou mafaufau se tasi o mau ou te fiafia i ai: “Aua faauta, ua tuuina mai i tagata taitoatasi le Agaga o Keriso, ina ia mafai ona iloa e ia le lelei mai le leaga.” O lena Agaga, na faamalamalama mai ai e Mamona, ua tatou “iloa ma le malamalama atoatoa” pe o se mea e mai le Atua pe mai ia Satani (Moronae 7:16).
O lena aafiaga o le matamata atu i na loi ua faaumatia na faatumulia ai au i le agaga faafetai i le mafai e i maua ma lou toalua ona iloiloina ma iloa ma le mautinoa mea e faataga i totonu o lo matou fale. O la maua galuega o le aoao atu o la maua fanau ina ia mulimuli i le Agaga o Keriso ina ia latou iloa foi mea oona pe a latou vaai i ai.
A o ou punou atu i ai, ma matamata i na iniseti o feaveaia fasi vailaau uma i la latou faaputuga, sa ou tautino atu o le a ou faia mea uma ou te mafaia e taofia ai mea oona i fafo o lou fale.
Na faatonuina au e le faailoga e lulu sina vailaau i luga ma autafa o faaputuga. O le a faia e loi le vaega o totoe.