O Tatou Aiga, O Tatou Auaiga
O Le Fatu o Lizochka
E alala le tusitala i Peleseuma.
Ata na tusia e Annie Henrie
Na ma auai ma lo’u toalua i le Ekalesia i Rusia i le 1995 ma sa faamauina i maua i le tausaga na sosoo ai i le Malumalu o Stockholm Suetena. Sa faamauina foi le ma fanau teine e toalua ia i maua. I le lua tausaga mulimuli ane, sa faamanuiaina i maua i se isi tama teine, o Lizochka, na fanau mai ia i maua. Na gasolo lelei o matou olaga. Sa matou fiafia uma. Ae o le lua aso talu lona fanau mai, na amata ona i ai faafitauli i le ‘ai o le ma pepe laitiiti. I se masina, sa na o le lua vaetolu o se pauna (300 k) na faaopoopo.
Na fai mai le aufaigaluega i le nofoaga autu o le falemai o tamaiti ia i maua ina ia fafaga soo o ia. Sa ou vaaia sa fia ai o ia ae sa le mafai. Na iu lava, ina aveina o ia e lou toalua i le falemai i le aai. Na vave ona tuuina mai e le fomai ia i maua se faaiuga o le suesuega—o se faaletonu i le fatu na fanau mai ma ia. E le aoga le isi faasolototo o le fatu, ma o le le lelei o le tafe o le toto i ona mama na faigata ai ona ia manava pe ‘ai.
Sa ia manaomia se taotoga, ae i Rusia o tamaiti pito i laiti e faia i ai lenei taotoga e lua tausaga le matutua. Sa na o le tasi le masina o le ma tama teine. Na faatonuina e le fomai se togafiti mo ia ma fai mai o se taimi mulimuli ane, pe a tau matua, o le a latou faia le taotoga.
E tasi le masina mulimuli ane, sa matua faaletonu le soifua maloloina o Lizochka, ma sa matou aveina faanatinati o ia i le falemai. Sa ou opoina o ia a o matou o atu. Sa ia tilotilo mai ia te au e pei o loo ia aioi mai mo se fesoasoani. Pe ana faapea e le o au o se tagata o le Ekalesia, ou te le iloa le mea o le a ou faia. Ae sa ma faatuatua ma lo’u toalua i le Alii ma talitonu ma le mausali o le a lelei mea uma. Sa ou taumafai e faatoafilemuina o ia, ma faapea atu, “Aua le fefe i se mea, lau pele e. E alofa le Atua ia i tatou. O le a Ia fesoasoani ia i tatou, ma o le a lelei mea uma.”
Na iu lava ina matou taunuu. A o opoina faalatalalata mai o ia ia te au, sa ou tamoe atu i le vaega e vaai ai tagata mamai. Sa amata ona moeiini mata o Lizochka. Sa tau le manava o ia. Toetoe lava a le mafai ona tautala atu, sa ou tau atu i se fomai e uiga o la’u tama, ma sa ave o ia e le aufaigaluega i le vaega mo mai tigaina. Na fai mai le fomai ua amata ona fulafula ona mama, ma sa latou faapipiiina se masini ia te ia e faamanava ai.
O le aso na sosoo ai sa ma talanoa ma le faatonu o le vaega e faia taotoga o fatu. Sa ia fai mai, “Sa ou faia na ituaiga taotoga ae na o tamaiti e matutua atu. O le a lona matua ua i ai i le taimi nei?”
“E lua masina,” sa ma tau atua ia te ia.
“Ua matua tigaina lava o ia. E matuai laitiiti tele o ia, ma ua faafaigata mea uma e le fulafula o ona mama, ae e le tatau ona tatou toe faatali. Ou te lei faia lava se taotoga faapena i se tamaitiiti laitiiti. O le a ou taumafai e faia mea uma ou te mafaia. E tatau ona lua faatau maia se faasolototo itulua palasitika, ae e matuai taugata lava— pe a ma le $2,100. O le a faia le taotoga i le fa o aso.”
O le a la le mea o le a ma faia? E leai ma sea ituaiga tupe sa ia i maua po o se tasi foi sa ma iloaina. Ae peitai, na iloa e isi lo maua tulaga, ma e ala mai i lo latou agalelei ma le alofa mutimutivale o le Alii sa mafai ai ona ma mauaina le tupe. Na faatauina mai e lo’u toalua le faasolototo sa ma manaomia e faasao ai le ola o le ma tama.
E le gata ina sa tatalo ma anapopogi uma uso ma tuagane o la matou paranesi mo le ma tama teine laitiiti ae sa faapena foi i faifeautalai ma le toatele o le Au Paia o Aso e Gata Ai i le aai atoa. Sa matou lagonaina lo latou lagolago. A o nonofo ai i le faletele i le aso o le taotoga, sa matou lagonaina le i ai o le Agaga Paia ma lagona tatalo a o matou uso ma tuagane. Sa matou iloa lo latou latalata mai ia i matou! Ma sa faatasi le Atua ma i matou, e taialaina fomai tipitipi. O le a Ia le tuua i matou, ma o le a lelei mea uma.
Ina ua sau i fafo le fomai tipitipi ina ua uma le taotoga, sa i ai si ona tau le mautonu, ma fai mai ia i maua, “Na lelei mea uma. Na matou tuuina i totonu le faasolototo. Ou te le iloa pe na faapefea, ae sa faamanuiaina.” Ae sa ma iloa le auala na faamanuiaina ai. Na faamanuiaina o ia e le Tama Faalelagi.
Na nofo Lizochka i le falemai mo nisi aso e tolu ao faaitiitia le fula o lona fatu ma mama. Sa tipiina o ia ma faamauina i se pau manifinifi lava, ma i ni nai aso mulimuli ane sa latou toe faia se taotoga e tapunia ai lona fatafata ma ona totoga. Toetoe lava a leai se fomai na mafaufauina o le a ola o ia. Peitai sa matou talitonu i le Tama Faalelagi ma i Lona mana, ma sa matou talitonu faapea afai o Lona finagalo lea, o le a toe manuia o ia.
Ua na o le Atua lava e mafai ona toe aumaia ia i matou la matou Lizochka. I le faagasologa o aso taitasi, sa faasolo ina manuia o ia. Sa ia nofo i le falemai i le isi masina, ma o lea ua ia faatasi ma i matou i le fale.
O le Atua o se Atua o vavega. Na te faafofogaina a tatou tatalo, ma i le taimi o o tatou faigata, Na te tauaveina i tatou. O tofotofoga e faamalosia ai lo tatou faatuatua ma aoaoina i tatou ia talitonu, faamoemoe, ma alofa.