Fesili & Tali
O le puleaina o ou mafaufauga e faigata, ae e mafai ma e aumaia ai faamanuiaga: “a o outou aoao e pulea o outou mafaufauga, e mafai ona outou faatoilaloina mausa, e oo lava i mausa patino faatoilalo tagata. E mafai ona outou maua le lototele, faatoilalo le fefe, ma maua se olaga fiafia.”1
Ia mafaufau foi i nei faamanuiaga:
-
O mafaufauga mama o le a fesoasoani ia “solo malosi ai lea [o lou] lototele i luma o le Atua” ma o le a avea le Agaga Paia ma au soa e le aunoa” (MF&F 121:45–46).
-
O mafaufauga mama o le a fesoasoani e te iloa ai musumusuga, ao e tautala atu le Agaga Paia i lou loto ma lou mafaufau (tagai i le MF&F 8:2–3).
-
O mafaufauga mama o le a fesoasoani ia te oe e tausia le poloaiga muamua ma le sili: ia alofa atu i le Atua ma lou loto atoa, agaga, ma mafaufau (tagai i le Mataio 22:37).
E tele mea e mafai ona e faia e maua ni mafaufauga mama, e pei o le a e vaaia i nei manatu i nei itulau. Ae o se tasi o mea autu e mafai ona e faia—ma o se faagasologa faifaimalie—o le faatoilaloina o le “tagata natura.” E fiafia le alii po o le tamaitai natura i mafaufauga le mama. O le auala lea e faatoilalo ai: “Ona o le tagata natura o se fili i le Atua … ma o le a faapea lava, e faavavau faavavau lava, vagana ai ua gauai atu o ia i uunaiga a le Agaga Paia, ma tuu ese le tagata natura ma avea ma tagata paia e ala i le togiola a Keriso le Alii, ma avea e pei o se tamaitiiti, e usiusitai, agamalu, lotomaualalo, onosai, ma tumu i le alofa” (Mosaea 3:19).
O le a se mea e tasi e mafai ona e faia i le taimi nei e valaaulia ai le Togiola a le Faaola e faataunuu ai lenei suiga i lou olaga?
Ala o Faasalalauga ma Uo
O se amataga lelei o le filifili lea o ata tifaga, musika, ma tusi faitau faagaeetia. Filifili ni uo e mafai ona e tausisia ai le agavaa i talanoaga ma gaoioiga amiotonu. A o i ai nisi mea lelei e te mafaufau i ai, o le a faasolosolo malie ona e iloa le faigofie atu o le aveesea o mafaufauga leaga, ma o le a latou le o mai soo.
Amber S., 18 tausaga, British Columbia, Kanata
Tatalo
O le tatalo e aumaia ai faalatalata atili au i lo tatou Tama Faalelagi ma fesoasoani ia te au e taulai atu i mafaufauga lelei. O le suesue i tusitusiga paia i aso taitasi e faamalosia ai lo’u talitonuga i le faatoilaloina o faaosoosoga; i tusitusiga paia e mafai ona ou vaai i faataitaiga o soo faamaoni o Keriso. O le tuuina atu o la’u molimau e fesoasoani foi ia te au e tausisia ai ou mafaufauga i le mama.
Dasha M., 17 tausaga, Kyiv, Iukureini
Tusitusiga Paia
O le faitauina o tusitusiga paia i taeao taitasi a o lei amataina le aoga e fesoasoani. O le taimi lava ou te maua ai se manatu leaga, e vave lava ona ou suia i se mea e sili atu ona lelei. Nai lo le na ona faapea atu, “Leai, aua e te manatu faapena” (o se mea lelei e fai), sui i ai se manatu lelei. Ia manatua, e te pule i lou mafaufau, ae le o Satani. O i tatou o atalii ma afafine totoa o le Tama Faalelagi ma ua i ai i se misiona faifai pea e faaleleia atili ai i tatou lava.
Niki C., 16 tausaga, Arkansas, ISA
Lelei pe Sa’o?
E le mafai ona e pulea i taimi uma pe oo mai se manatu, ae e mafai ona e pulea pe o le a tumau ai. E mafai ona e fesili: Mata o lenei manatu o le a faia se mea lelei mo au? Pe o le a fesoasoani ia te au e alu i le itu sa’o? Pe a oso ae ni manatu taufaaosooso, usu se pese lelei, mafaufau i se manatuaga taua, pe tatalo. E faatatau uma lava i le suia o mafaufauga leaga i se mea lelei.
Lisa P., 17 tausaga, Tenimaka
Faataitaiga a Liae
I le 1 Nifae 15:27, sa ta’u atu ai e Nifae i ona uso sa siomia lo latou tama, i lana miti o le laau o le ola, e le eleelea. Ae e lei vaai Liae i le eleelea ona sa “matua tele lava le tofatumoanaina o lona mafaufau i isi mea.” O lenei mea e moni mo i tatou i le taimi nei. Afai tatou te mananao ina ia faatumulia i le amiotonu, tatalo i ai, ma ia taulai atu i mea amiotonu, ona faatumulia lea o o tatou mafaufau i le amiotonu ma le mama o le a leai se mana o mafaufauga le mama e tumau ai.
Hattie W., 16 tausaga, Arisona, ISA
Viiga
O viiga e mafai ona fesoasoani ia i tatou ia maua ai mafaufauga mama. O musika lelei e faagaeetia ai le agaga. A ou faalogologo i viiga, latou te siitiaina au i se lalolagi sili atu ona toafilemu ma faaselesitila. Latou te fesoasoani mai ia te au ia manatua le alofa o le Tama Faalelagi mo i tatou taitoatasi, ma o le a faigofie ona aloese ai mai faaosoosoga.
Amanda A., 18 tausaga, Amasona, Pasila
Suesuega Faaleaiga o Tusitusiga Paia
A oo mai mafaufauga le mama i lo’u mafaufau, ou te taumafai e manatua mau na matou faitauina ma lou aiga i le taeao. O taeao uma lava i le 6:00, e faitau faatasi ai e lo’u aiga ia tusitusiga paia. E vave tele, ae o se faamanuiaga ma ou te lagonaina ai le malosi tele i le aluga o le aso.
Elena W., 16 tausaga, Suitiselani
Faamanatuga
E ta’u mai e le tatalo o le faamanatuga afai tatou te ave i o tatou luga le suafa o Keriso, tausi Ana poloaiga, ma manatua pea o Ia, o le a tatou maua pea Lona Agaga e faatasi ma i tatou. O le manatuaina o Ia, tatou te faia ai se taumafaiga e tuleia mai i fafo manatu faalelalolagi ae taulai atu i manatu e faavavau. Pe a tatou manatua pea lava pea o Ia, o le a suia o tatou manatu, manaoga, ma gaoioiga mo le lelei.
McKay M., 18 tausaga, Iuta, ISA