Dina ni Kosipeli
Sa Tucake Tale ko Koya
A sucu o David O. McKay ena ika 8 ni Sepiteba, 1873. A tabaki me iApositolo ena ika 9 ni Epereli, 1906, ni yabaki 32, ena 9 ni Epereli, 1951, sa tokoni o koya me ikaciwa ni Peresitedi ni Lotu. Na veika oqo a tauri mai na dua na itukutuku a tukuna ena koniferedi raraba ni Epereli 1966. Me baleta na itukutuku taucoko, raica na Conference Report, 1966, 55–59.
Na vakabauta sega ni dau veivukiyaki sai koya na gagadre levu duadua e vuravura nikua.
Kevaka e dua na ka matalia ka sega ni yacova rawa na vuku vakaiyalayala ni tamata na kena revurevu makawa na cakamana, ia na Tucaketale nei Jisu Karisito sai koya na cakamana vakasakiti duadua ena veigauna kecega. E vakatakilai kina na kaukauwa tawayalani rawa ni Kalou kei na tawamate rawa ni tamata.
Na Tucaketale e dua na cakamana, ia, ena vakasama ga ni sega ni yacova rawa na veika e rawa ni kila na tamata. Vei ira kece era ciqoma ni dua na ka dina, oqori e dua na ivakatakilakila ni dua na lawa vakaivakarau ni bula. …
Vakadeitaka na dina ni a mai vakayago na Karisito ka rairai me vaka e dua na kabula vakalagilagi, sa tucaketale, ka sauma na taro ni veitabayabaki: “Kevaka sa ciba na tamata, ena bula tale ko koya?” (Jope 14:14.).
iVakadinadina Bula ni Tucaketale
Ni ka dina na Tucaketale nei Karisito mai na ibulubulu vei ira na tisaipeli era kilai Koya vakavinaka, e ivakadei. E sega ni dua na lomalomarua ena nodra vakanananu. Era sa ivakadinadina bula ni kadina; era kila baleta ni ra a raica e matadra, rogoca e daligadra, e vakila na ligadra na yagona na Dauveisereki sa vakaturi cake.
O Pita na iApositolo liu, ena gauna eratou sota kina na lewe tinikadua me ratou digitaka na isosomi kei Jutasa Isikarioti, a kaya, “O koya sa dodonu kina me dua mada vei ira na tamata era sa tiko vata kei keda … me lesi ko koya me tukuna vata kei keda na nona tucake tale mai na mate” (Cakacaka 1:21–22). …
Ena dua tale na gauna a vunautaka kina o Pita e matadra na nodra meca, o ira sara ga na tamata era a vakamatei Jisu ena kauveilatai: “Oi kemudou na tamata na Isireli, rogoca na vosa oqo; … Ko Jisu oqo sa vakatura cake na Kalou, ka sai vakadinadina ni ka oqo koi keitou kecega” (Cakacaka 2:22, 32). …
iKuri ni iVakadinadina
Na Lotu i Jisu Karisito ni Yalododonu Edaidai e duavata kei Pita, kei Paula, kei Jemesa, kei ira kece na iApositolo taumada era a ciqoma na Tucaketale sega walega baleta ni a yaco dina, ia me ivakataucoko ni nona itavi vakalou e vuravura na Karisito.
Ni oti e tinikawalunadrau na yabaki mai na nona mate ena kauveilatai o Jisu, a kacivaka na Parofita o Josefa Simici ni a rairai vua na Turaga sa vakaturi cake, ka kaya kina: “Ausa qai raica e rua na Tamata, ia na kedrau iserau kei na iukuuku sa sega ni vakamacalataki rawa, raica erau sa tucake tu ena maliwa lala donuya na mataqu. A sa kacivi au e dua vei rau, dusi koya na kena ikarua ka kaya—Oqo na Noqu Gone ni Toko. Mo Rogoci Koya!” Josefa Simici—Ai Tukutuku 1:17) …
Kevaka me a tu duadua ga na ivakadinadina nei Josefa Simici, ena vaka, na ka e tukuna na Karisito baleta na Nona ivakadinadina ni tukuni Koya tiko, sega na kena yaga; ia ko Jisu e tokona mai na ivakadinadina ni Kalou kei na nodra na iApositolo. Ka tu tale eso na ivakadinadina bula nei Josefa Simici [era] tokona na [nona] ivakadinadina, a vakatakilai vei ira na kena dina ena nona rairai mai vei ira na agilosi o Moronai. …
… Na Lotu i Jisu Karisito ni Yalododonu Edaidai e tukuna [talega] na raivotu lagilagi ni Parofita o Josefa Simici:
“Ia me ikuri ni i tukutuku kece ka vakadinadinataki kina ko Koya, keirau sa tukuna oqo na kena i otioti me yacova edaidai: Raica sa bula dina tiko ko Koya!” (V&V 76:22). …
Ena rarama ni mataqali ivakadinadina sega ni vakacalai rawa me vaka na nodra na iApositolo ni gauna makawa—na ivakadinadina ka a cavuti ni oti ga e vica na yabaki mai na gauna a yaco kina—ena rarama ni ivakatakila vakasakiti duadua oya ena itabayabaki oqo ni Karisito bula, sa dredre dina me da ciqoma se rawa vakacava vua na tamata me se cakitaki Koya tikoga ka vakatitiqataka na tawamate rawa ni tamata.
Na Cava Eda Gadreva Nikua
Na vakabauta sega ni dau veivukiyaki sai koya na gagadre levu duadua e vuravura nikua. E levu cake mai na dua na vakanananu walega. Sai koya na kaukauwa ka na yaco me cakacaka, ka dodonu me yaco ki na tamata me taumada mai na kaukauwa kecega dau veivakauqeti. …
Kevaka walega me “cakava na Lomana” na tamata, ka sega ni wadrava wale tu ga ena yalolailai na ibulubulu batabata ka butobuto, era na vagolea na matadra ki lomalagi ka kila ni sa vakaturi cake na Karisito! …
Na Lotu i Jisu Karisito ni Yalododonu Edaidai e vunautaka ki vuravura taucoko ni o Karisito na Luve ni Kalou, na Dauveisereki ni vuravura! E sega ni dua na tisaipeli dina ena mamau ena nona ciqomi Koya walega me dua na dauniveisau cecere, na qasenivuli uasivi, se tamata taucoko nona vinaka e duabulu. Na Kai Kaleli e sega—ni vakaibalebale walega, ia e dina taucoko—na Luve ni Kalou bula. …
O Ira Era sa Sucu Tale Vakaidina
E sega ni dua na tamata e rawa ni yalataka vakaidina me bulataka ena nona bula e veisiga na ivakavuvuli i Jisu mai Nasareci ka sega ni vakila e dua na veisau ena nona bula taucoko. Na malanivosa “sucu tale” e bibi cake mai na ka era vakuria kina na tamata. … Ena marau na tamata sa vakila vakaidina na kaukauwa veilaveti, ka dauniveisau e yaco mai ena noda volekata na iVakabula, na veivolekati oqo vua na Karisito bula. Au vakavinavinaka niu kila ni noqu Dauveivueti na Karisito. …
Na itukutuku ni Tucaketale … e veivakalogavinakataki duadua, na kena e lagilagi duadua me sa bau soli vua na tamata, ni kauta tani ko mate e dua na noda daulomani mai vei keda, sa dau vakayaloqaqataki na yaloda rarawa mai na inuinui kei na ivakadei vakalou ka cavuti ena vosa: “Sa sega eke ko Koya; sa tucake tale!” [raica na Maciu 28:6; Marika 16:6].
Mai vuniyaloqu au kila ni vakadrukai mate ko Jisu Karisito, ia me vaka ni bula tiko na noda Dauveivueti, ena vakakina o keda.