iVaqa ni Veisiko
Na Veika e Kilai Tani Kina o Jisu Karisito: Tawa Cala se Veivakaisini
Vulica ena masumasu na itukutuku oqo ka vakasaqara mo kila na ka mo na wasea. Ena vakalevutaka vakacava na nomu vakabauti Koya ka kila deivaki na bula kei na ilesilesi ni iVakabula, ka vakalougatataki ira o vakaraica voli ena veisiko? Me ikuri ni itukutuku, lako ki na reliefsociety.lds.org.
Vakabauta, Matavuvale, Veivukei
Ena vukei keda na kena kilai vakamatata ni o Jisu Karisito e sa tawa cala ka tawa veivakaisini ena noda sasagataka ena yalodina meda muria na Nona ivakaraitaki. A tukuna o Elder Joseph B. Wirthlin (1917-2008) ena Kuoramu ni iApositolo Le Tinikarua: “Mo lawaki oya mo na veicavilaki se muataki vakatani. … A tamata tawa cala e sa dua na tamata dodonu, yalodina ena sasaga, kei na nakinaki savasava, na nona bula e vakaraitaka na sasaga rawarawa ni kena vakamuri na nona itavi e veisiga ki na ivakavuvuli ni buladodonu. … Au vakadinata na kena vinakati vei ira na lewe ni Lotu mera na tawa cala sa na rairai vakabibitaki cake oqo mai na gauna tale eso baleta e vuqa ena vuravura era sega ni kila vakamatata tu na bibi ni ivalavala dodonu oqo.”1
Ena veivakaisini, a tukuna o Peresitedi Dieter F. Uchtdorf, na iKarua ni Daunivakasala ena Mataveiliutaki Taumada: “E sega ni dua vei keda e sa vaKarisito rawa me vaka eda kila ni sa dodonu meda vakakina. Ia eda gadreva vagumatua meda dau vorata na noda cakacala kei na via cakava na ivalavala ca. Mai na yaloda kei na lomada eda sa gadreva sara me da vinaka cake mai na veivuke ni Veisorovaki i Jisu Karisito.”2
Eda kila “ni da na lewai ena noda ivalavala, na gagadre ni lomada, kei na mataqali tamata eda sa mai vakataka.”3 Ia ni da saga meda veivutuni, eda sa na yalosavasava cake sara—ka “sa kalougata ko ira sa yalosavasava: ni ra na raica na Kalou” (Maciu 5:8).
iKuri ni iVolanikalou
Mai na iVolanikalou
Sa ra tawa cala na gone lalai. A tukuna o Jisu: “Dou laivi ira na gonelalai mera lako mai vei au, ka mo dou kakua ni tarovi ira, ni sa vakataki ira na lewe ni matanitu ni Kalou. … A sa keveti ira [na gonelalai] ka tabaki ira ena ligana, ka vosa vakalougatataki ira” (Marika 10:14, 16).
A veiqaravi talega o Karisito kivei ira na gonelalai ena vanua vaAmerika ni cava na Nona Vakamatei. A vakaroti ira na tamata o Koya mera kauta mai na nodra gone lalai ka “vakatikori ira vakavolivoliti Koya, ka sa duri o Jisu ena kedra maliwa; …
“… [Ka] sa tagi, a ra sa vakadinadinataka na lewevuqa, a sa keveti ira yadua na gone lalai ka vakalougatataki ira ka masulaki ira vei Tamana. …
“Ia ni ra sa raici ira yani era sa rai cake sara, ka … ra sa siro sobu mai kina na agilosi ka sa vaka e nodra sala sobu mai na yameyame ni bukawaqa; era sa mai vakavolivoliti ira na gone lalai, … ka qaravi ira” (3 Nifai 17:12, 21, 24).