iTukutuku ni Mataveiliutaki Taumada
E Gadreva o Peresitedi Monson meda Yaloqaqa
Mai vei Peresitedi Thomas S. Monson
iVakaraitaki mai vei iStock/Thinkstock
E dredre ni dua na aua e sivi meda sega ni caka digidigi tiko ena kena veimataqali a raica matua rawa o Peresitedi Thomas S. Monson.
Meda digidigi vakayalomatua, a vakasalataka okoya, eda sa gadreva na yaloqaqa—“na yaloqaqa meda tukuna sega, na yaloqaqa meda tukuna io. Na vakatulewa ena vakadeitaka na ilakolako.”1
Ena vosa oqo, e vakananumi ira na Yalododonu Edaidai o Peresitedi Monson ni ra sa gadreva na yaloqaqa mera tutaka na dina kei na yalododonu, mera taqomaka na ka era vakabauta, ka vorata e dua na vuravura e sa sega ni vakadonuya voli na yavunilewa tawamudu kei na ivakavuvuli eso.
“Sa dau vakawasoma na noda gadrevi me da yaloqaqa,” a kaya okoya. “Sa dau kena ivakarau tu ga mai, ka na dei tu ga me vakakina.”2
Na Yaloqaqa e Kauta Mai na Veivakadonui ni Kalou
“Eda na sotava kece na rere, na veivakalialiai, ka sotava na veisaqasaqa. Me tu vei keda—keda kece sara—na yaloqaqa me da vorata kina na veivakasama kilailevu, na yaloqaqa me tutaki na ivakavuvuli. Yaloqaqa ga ka sega ni caka cala, ena kauta mai na marau ni veivakadonui ni Kalou. Sa na yaco na yaloqaqa me dua na ivalavala dodonu totoka sega walega ena kena laurai me mate vakatagane ia na gugumatua me da bula dodou. Ni da toso ki liu, ka segata me da bula ena ivakarau dodonu, eda na vukei vakaidina mai vua na Turaga ka rawa ni vakacegui ena Nona vosa.”3
Tudei ena Yaloqaqa
“Na cava na ibalebale ni vosota? Au taleitaka na kena ibalebale oqo: mo ni tudei ena yaloqaqa. Ena yaga beka mo ni yaloqaqa mo ni vakadinata kina; ena yaco vakakina ena so na gauna ni ko talairawarawa. Ena yaga sara vakalevu ni ko ni vosota yani me yacova na siga o ya mo ni sa biuta kina na bula vakatamata oqo.”4
Yaloqaqa Voli ena Tutaki ni Dina
“[Me na] tiko vei kemuni na yaloqaqa mo ni tudei ena dina kei na ivalavala dodonu. Baleta ni vakarau ni veimaliwai edaidai sa yawa sara mai na yavunilewa kei na ivakavuvuli sa solia vei keda na Turaga, ko ni sa kacivi tiko mo ni taqomaka na veika ko ni vakabauta. Vakavo ga ke teivaki dei tu na waka ni nomu ivakadinadina, ena dredre mo na taqeya na nodra vakalialia na nomu vakabauta. Ni sa teivaki dei, na nomu ivakadinadina ni kosipeli, me baleta na iVakabula, kei na Tamada Vakalomalagi ena vakauqeta na veika kece o vakayacora ena nomu bula taucoko.”5
Eda Gadreva Meda Bula Vakayalo ka Yaloqaqa
“Na itukutuku e saravi tiko ena retioyaloyalo, kei na iyaloyalo, kei na itukutuku tale eso [nikua] e dau saqata sara tikoga na veika eda vinakata tiko vei ira na luveda me ra bulataka ka vakamareqeta. E sega walega ni noda itavi me da vakavulici ira me vinaka na yalodra ka muria na ivunau, ia me da vukei ira talega me ra tudei tikoga kina, se cava na draki ni bula butobuto era na rawa ni ravuti kina. Na ka oqo ena gadrevi kina na noda gauna kei na gugumatua—kei na kena gadrevi me da vukei ira na tamata, sa qai gadrevi vei keda sara mada ga me da vorata rawa kina na veika butobuto eda raica ena veiyasana kecega.”6
Meda Sa Qai Yaloqaqa Tiko Ga
“Ni da bula lako voli ena veisiga yadua, sa na rawa ni bolei tikoga na noda vakabauta. Eda na raica ni da vakavolivoliti tiko mai vei ira eso ena so na gauna ka tu vata kei ira na lewelailai, se tui taudua ga me baleta na ka e vakadonui kei na ka e sega. …
“Meda sa qai dau yaloqaqa tiko ga ka tu vakarau meda tutaka na veika eda vakabauta, kevaka meda sa qai tu taudua ga ena veigauna eso, meda sa qai vakayacora ena yaloqaqa, ka vaqaqacotaki ni da sa kila ni ka dina na noda sa sega ni tu taudua ga ena gauna eda sa tu vata kina kei na Tamada Vakalomalagi.”7