Na iVakaraitaki ni iVakabula me baleta na Talairawarawa

Na Nona ivakaraitaki sa ivakatakarakara meda na vakatotomuria.

E a vakavulica o Elder Robert D. Hales, mai na Kuoramu ni iApositolo Le Tinikarua, “Mai na lesoni kece eda sa vulica mai na bula ni iVakabula, e sega ni dua e matata ka kaukauwa cake me vakataka na ivakavuvuli ni talairawarawa” ena koniferedi raraba ni Epereli 2014. Na iVakaraitaki ni iVakabula e vakavulici keda meda sega walega ni kila na vuna meda talairawarawa talega Vua na Tamada Vakalomalagi, ia meda kila talega na icakacaka ni talairawarawa. Ena nomu raicalesu tiko na ivakaraitaki e so oqo mai na Nona bula ni veivakalotutaki vakananuma na ka o rawa ni cakava mo rawa ni muria kina na mawe ni yavana ena nomu bula.

1. Dina ga ni o Jisu e sega na nona ivalavala ca, e a papitaisotaki me “vakataucokotaka na ivalavala dodonu” (Maciu 3:13–17; raica talega na 2 Nifai 31:4–7; Joni 3:5).

2. Ni sa yabaki 12 o Jisu ka rau raici koya o Josefa kei Meri ni veivakavulici ena valetabu, e a “se wili voli vei rau” ka talairawarawa me lesu vata tale kei rau ki vale (raica na Luke 2:42–51).

3. Dina ni a kerea me lako siviti Koya na bilo, e a sa vakadonuya oti me na laki lako curuma na veivakararawataki mai Kecisemani (raica na Maciu 26:36–44; Luke 22:39–54).

4. E a vakalolokutaka na sigatabu ka lako ki lotu ena vale ni soqoni (raica na Luke 4:16–44).

5. Vakadonuya o Jisu mera lewai koya na tamata me rawa ni vakataucokotaki na cakacaka kei na lagilagi ni Tamada (Raica na Aisea 53:7; Maciu 26:53; Mosese 1:39).

6. Ea vakacavara na Nona cakacaka ena Nona vakatarai ira na tamata ivalavala ca mera vakoti Koya (raica na Maciu 27:35: Joni 10:17 –18; Kalatia 1:3–5).

7. Talairawarawa ga vei Tamada, lako o Jisu kina vuravura ni yalo me tekivuna na kaulotu (raica na 1 Pita 3:18-20; 4:6

8. Jisu e a temaki mai vei Setani, ia e a sega ni rawai (raica na Maciu 4:1–11; V&V 20:22).

9. Tomana Nona qarava na cakacaka ni loma iTamada ka liutaka na Lotu (raica na Josefa Simici—Ai Tukutuku 1:16–17; V&V 19:2, 24).

Na cava o rawa ni cakava?

Tukuna o Elder Hales, “A vakavulici keda o Jisu Karisito ena vosa rawarawa sara eda kila vakavinaka: ‘Kevaka dou sa lomani au; dou talairawarawa ki na noqu vunau,’ Joni 14:15, kei na ‘Mo dou lako mai, ka muri au’ Mo dou Lako mai ka Muri Au.” Na cava o na cakava nikua mo talairawarawa kina vakalevu?

Baleta ni Noda iVakabula e a Talairawarawa

“Baleta ni a talairawarawa na noda iVakabula, sa sorovaka kina o Koya na noda ivalavala ca, ka sa rawa kina meda tucake tale ka vakarautaki na sala meda lesu vei Tamada Vakalomalagi, o koya a sa kila tu ni da na cala ena noda vulica na talairawarawa ena bula oqo. Ni da talairawarawa, eda sa ciqoma na Nona solibula, ni keimami vakabauta ni na vakabulai na tamata kecega e na Veisorovaki nei Jisu Karisito, kevaka eda sa muria na ivunau, vakavuvuli vakalotu kei na ivakaro e soli tu ena kosipeli.”.

Elder Robert D. Hales ena Kuoramu ni iApositolo Le Tinikarua, “Kevaka Dou Sa Lomani Au, Dou Talairawarawa Kina Noqu iVunau,” Liaona, Me 2014, 35.