Lagata na Nomu Serenilotu Taleitaki

Angela Olsen Center, Ohio, Amerika

IYALOYALO MAI VEI Bradley H. Clark

Au se qai vakasucu ga ki na luvei keirau yalewa, o Rebekah. Na noqu taratara e a bibi dina, ka’u a oca saraga vakalevu.

Ni sa mai biu ki na ligaqu o Rebekah, a tuburi au e dua na yalomarau me’u sa na lagata na noqu serenilotu taleitaki, “AuLuve ni Kalou” (Serenilotu, naba 185). Na noqu nanuma taumada, “Sega, au sa rui oca. Au na qai lagata malua vua.” Ia a qai basika tale mai na vakanananu oya. Sa, dina ga ni’u sa oca tu, au mani tekivu lagata yani na imatai ni qaqana. A tomani au mai na watiqu kei tinaqu.

Ni keitou sa tinia na sere, au a vakila e dua na yalovakasakiti ena rumu. Na vuniwai mada ga, ka sa kenadau voli mai ena gauna oya ka vaka me tu tani tu, a vakaturu wainimata na matana. A vakavinavinakataki keitou okoya ena lagati ni dua na sere totoka. A kaya okoya ena veiyabaki e a vakasumi gonedramidrami voli mai kina, a sega ni se bau vakila okoya na ka a donumaka ena gauna oya.

Au a raitayaloyalotaka na ka e sotavi oya ka vakananuma ke me’u na raica e dua na katokatoni ni serenilotu oya ka solia vua. Ka ni rarawa, ni’u a sa mai vakaogai tu ena bula ka guilecava saraga.

A qai yaco mai na siga ni noqu raici tale vakavuniwai. Ni a curu mai ki na rumu na vuniwai, e a serau na matana, ka mani mokoti au sara. A tukuna okoya ni a sega ni rawa ni kauta tani mai na nona vakasama na sere oya ka a saga me kunea na sere kei na ivakatagi ena initaneti me rawa ni lagata ki na nona matavuvale. Oya na gauna a vakananumi au kina na Yalo Tabu ni sa dodonu me’u a taura mai e dua na ilavelave ni sere kei na ivakatagi oya me soli vei koya. Au a yalataka vua ni loma ga ni macawa au na lesu mai kina vata na sere kei na ivakatagi.

Au a masu ena bogi oya me’u vukei ena kena kunea na ikabakaba ni sere ena ganiti koya vakavinaka. Ena yakavi e tarava au a otataka e dua na SiDi ka tiko kina na sere oya. Ni a yaco mai ena meli ena vica na siga ka tarava, au a sega ni rawa ni wawa meu solia vua.

E a luvuci okoya ena nona ciqoma ka vakavinavinakataki au ena isolisoli oya. A tukuna vei au okoya ni sega ni vakadeitaka rawa na vuna, ia na sere oqo e sa rui bibi sara vua me wasea ki na nona matavuvale. Ni keirau tomana na veivosaki, au a wasea vua ni sega walega ni’u taleitaka na sere oya ia na noqu ivakadinadina talega me baleta na dina matata eso e vakatavulica.

Ni’u draiva lesu ivale ena siga oya, au a vakila na loloma ni Tamada Vakalomalagi me baleta e dua na Luvena yalewa—na noqu vuniwai. E kilai koya ka lomani koya, ka sa vinakati koya me kila vakamatata ni sa rawa talega vua me lesu ka bula vata tale kei na Tamada Vakalomalagi.