Na Lotu Savasava

Mai vei Elder W. Christopher Waddell

Ena Vitusagavulu

Na veiqaravi tawavakacauoca—guilecavi keda, veivuke ki na nodra gagadre tale eso, kei na noda solibula ena nodra qaravi—e sa dau ivakatakilakila tudei tu ni tisaipeli i Jisu Karisito.

Ena Maciu wase 11 e vakatavulica kina na iVakabula e dua na lesoni vakasakiti ena ka e sega ni kaya me baleta e dua na taro a lavetaki mai vei ira na tisaipeli i Joni na Dauveipapitaisotaki.

“Ia ni sa rogoca ko Joni mai na vale ni veivesu na cakacaka i Karisito, sa qai tala e lewe rua na nona tisaipeli,

“Me kaya vua, O iko beka ko Koya e lako mai, se da waraka e dua tani?

“A sa vosa ko Jisu ka kaya vei rau, Drau lako ka tukuna vei Joni na veika drau sa rogoca ka raica:

“Era sa rai na mataboko, ka lako na lokiloki; sa vakasavasavataki na vukavuka, ka rogo rawa na didivara, sa vakaturi cake tale na mate sara, a sa vunautaki na itukutuku vinaka vei ira na dravudravua” (Maciu 11:2–5).

Ni sega taumada ni vakamacalataka vakaivunau lekaleka ni o Koya vakaidina, “ko Koya e lako mai,” a sauma na Turaga ena ivakarau ni ka e cakava—na Nona ivakaraitaki ni veiqaravi.

Ena koniferedi raraba ni Epereli 2014, a vakananumi keda o Elder Richard G. Scott ena Kuoramu ni iApositolo Le Tinikarua: “Eda na qarava vakavinaka cake na Tamada Vakalomalagi ena noda veivakayarayarataki donu vei ira tale eso ka qaravi ira. Na ivakaraitaki levu duadua ka a bula e vuravura sa ikoya na noda iVakabula, o Jisu Karisito.”¹

Na veiqaravi tawavakacauoca—guilecavi keda, veivuke ki na nodra gagadre tale eso, kei na noda solibula ena nodra qaravi—e sa dau ivakatakilakila tudei tu ni tisaipeli i Jisu Karisito. Me vaka a vakatavulica o Tui Penijamini ni sivia na 100 na yabaki ni bera na sucu ni iVakabula, “Ko ni sa qaravi Koya tiko na nomuni Kalou ena nomuni qaravi ira tiko na wekamuni.” (Mosaia 2:17).

E vakananumi keda o Jemesa ni dua na ivakaraitaki bibi ni “lotu savasava” e sa kune ena noda veiqaravi kivei ira tale eso ni da “raici ira na luveniyali kei ira na yada ni ra sa rarawa” (Jemesa 1:27). “Na lotu savasava” e sa levu cake mai na vakatakilai ni dua na vakabauta, e sa dua na ivakaraitaki ni vakabauta.

Lomani Ira na Lewe ni Nomu iLakolako

Ena loma ni Julai 1984, ni oti toka ga e vica na macawa na noqu vakamau kei Carol ena Valetabu e Los Angeles California, keirau a gole yani ki Utah, me’u sa laki tekivu cakacaka ka vakacavara o Carol na nona vuli. E duidui na motoka keirau draivataka tiko. Ena loma ni lori ruarua, keirau a vakavodoka voli na veika kece keirau taukena.

Ni rauta na veimama ki na vanua keirau gole tiko kina, a toso tikiva mai na noqu motoka o Carol ka sikinala mai vei au. Oqo na gauna a se sega tu kina na talevoni veikauyaki kei na vakau itukutuku ena talevoni. Au dikeva na irairai ni matana ena iloilo ni nona motoka, au rawa ni vakila ni a sega soti ni bula vinaka okoya. A tukuna okoya ni rawa ni tomana voli me draiva tiko, ia au a lomaleqataka na watiqu vou.

Ena neirau yacova yani na tauni lailai e Beaver, Utah, a toso tikivi au tale mai okoya, ka’u vakila rawa ni gadreva okoya me kele. E a tauvimate okoya ka sega ni rawa ni tomana. A tiko vei keirau e rua na motoka sinai ena isulu kei na iloloma ni vakamau, ia ka ni rarawa ni a lailai na neirau ilavo. E sega ni tiko ena neirau tuvaka vakailavo e dua na rumu ni otela. Au a sega ni kila na ka me’u cakava.

E sega ni dua vei keirau sa bau talevi Beaver mada, kei na noqu tawakila vakaidina na ka au a vakaraica voli, keirau a draiva wavoki me vica na miniti me yacova ni’u raica e dua na vanua ni vakacegu. Keirau a curu yani ki na ikelekele ni motoka ka kunea e dua na vunikau rugurugua, ka’u a tevuka kina e dua na itutuvi me vakacegu kina o Carol.

E vica na miniti e muri a kele tale mai e dua na motoka ena ikelekele sa vo vakalailai me lala ka kele tikiva na neirau motoka e rua. E dua na marama, vaka na yabaki ni tinai keirau, a curu mai tuba ena nona motoka ka taroga ke dua na ka e leqa tiko ka rawa ni veivuke kina okoya. E tukuna okoya ni a siqemi keirau ni a draiva voli ka vakila ni dodonu me na kele. Ni keirau vakamacalataka na neirau ituvaki, a sureti keirau ena gauna vataga oya okoya me keirau muri koya ki na nona itikotiko, me rawa ni keirau vakacegu kina ena kena balavu ga keirau vinakata.

Keirau mani mai davo yani ena dua na loga dakoba ena dua na rumu ni moce malumu e ra ni nona itikotiko. Ni gauna saraga keirau mai vatonaki keirau kina, a vakaraitaka na marama totoka oqo ni tiko eso na ka me na vakaitavitaki koya kina ka keirau na mai biu taurua voli me vica na aua. A tukuna vei keirau okoya kevaka me keirau sa viakana, sa rawa ni keirau vakayagataka na veika ga e kune ena valenikuro, ka ni kevaka keirau sa na biubiu ni bera ni lesu mai okoya, me keirau na qai sogota toka na katuba eliu.

Ni keirau yadra mai na moce e vakatuburi mai ena wawale, a sa vinaka tale mai o Carol ka keirau tomana na neirau itosotoso ena kena sega ni vakayagataki na veika ena valenikuro. Ni keirau biubiu, a se bera ni lesu mai ki vale na marama dauloloma oya. Ki na neirau lecaika levu, keirau a sega ni vola na itikotiko ni vanua ka sega talega ni vakavinavinakataka vakavinaka sara na neirau kai Samaria dauloloma, ka a mai kele ena nona lakovoli ka tadolava na nona itikotiko kivei ira na vulagi vakaleqai.

Ni’u vakananuma lesu na ka a sotavi oqo, na vosa nei Peresitedi Thomas S. Monson, ka dau cuqena na ivakavuvuli ni “lako ka cakava vakakina” (raica na Luke 10:37) me vakataka ga e dua na tamata ena bula oqo, e vakasamataki rawa: “Eda sega ni rawa ni lomana dina na Kalou kevaka eda sega ni lomani ira na lewe ni noda ilakolako ena bula oqo.”²

Na vanua cava ga eda sotavi ira kina na “lewe ni ilakolako”—ena gaunisala se ena noda itikotiko, ena rara ni qito se ena noda koronivuli, ena vanua ni cakacaka se ena valenilotu—ni da vakasaqaqara, raica, ka cakacakataka, eda na vakataka cake na iVakabula, ena veivakalougatataki kei na veiqaravi ena ilakolako.

Vakasaqara

A vakatavulica o Elder Neal A. Maxwell (1926–2004) ena Kuoramu ni iApositolo Le Tinikarua:

“Sega ni vakataka na noda iVakabula mareqeti, eda na sega ni rawa vakaidina ni sorovaka na ivalavala ca na tamata tabu yani! Me ikuri, eda na sega ni rawa vakaidina ni colata taucoko na mate eso, malumalumu, kei na rarawa ni bula oqo (raica na Alama 7:11–12).

“Ia, ena noda ivakarau lailai sobu, me vaka ga sa veisureti kina o Jisu, sa rawa saraga ni da sasaga meda ’vakataki [Koya]’ (3 Nifai 27:27).”³

Ni da qara meda vakataki Koya saraga, ena gagadre cecekia me vakalougatataki ira na “lewe ni noda ilakolako,” eda na vakarautaki ena madigi eso meda guilecavi keda ka laveti ira tale eso. Na madigi eso oqo ena rairai sega soti ni yaga, ni vakatovolei na noda gagadre dina meda vakataka cake na iVakavuvuli, ka nona veiqaravi levu duadua, Nona Veisorovaki cecere, ke dua na ka e sa yaga vakaidina. “Ia,” e cauraka o Koya, “me vakarokorokotaki ga ko Tamaqu, raica au a gunuva na bilo ko ya, ka vakacavara na noqu itavi ena vukudra na luve ni tamata” (V&V 19:19).

Na qarai ena yalomalua meda vakataka cake na iVakabula ena vakatarai keda meda raica na ka eda na rairai sega taumada ni raica. Na noda kai Samaraia dauloloma a bula volekata rawa na Yalotabu me veivuke kina ki na dua na veivakauqeti ka tosova e dua na vulagi vakaleqai.

Raica

Me da rai ena mata vakayalo e sa raici ni veika ena kedra ituvaki dina sara kei na vakatakilai ni gagadre eda na rairai sega taumada ni siqema. Ena vosa vakaibalebale ni sipi kei na me, e sega ni o ira na “vakalougatataki” se o ira na “cudruvi” era a kila rawa na iVakabula me vakataki ira na viakana, viagunu, luvawale, se tiko ena valeniveivesu. Era a sauma lesu me baleta na nodra bula vinaka ni ra taroga, “Keimami a raici kemuni mada ni naica?” (Raica na Maciu 25:34–44).

O ira ga era a raica ena mata vakayalo, a vakatakila na gagadre, qai cakacakataka ka vakalougatataki ira na vakaleqai. Na noda kai Samaria dauloloma a vakakila na gagadre ni a raica ena mata vakayalo.

Cakava

Eda na rairai raica na gagadre eso e wavoliti keda tu ia eda vakila ni da sega soti ni matau ni qarava, ni kilai rawa na ka meda dodoliga kina e sega ni takiveiyaga. Ni da qara meda vakataki Koya saraga ka da raica na gagadre eso ni lewe ni noda ilakolako ena mata vakayalo, sa dodonu meda nuitaka ni na vakayagataki keda na Turaga, ka yaco meda qai cakacaka.

Nodrau curuma na vale ni soro, a sotava o Pita kei Joni e dua na turaga “sa lokiloki mai na kete i tinana” ka kere ka ni loloma vei rau (raica na Cakacaka 3:1–3). Na kena isau mai vei Pita e sa dua na ivakaraitaki ka dua na veisureti kivei keda yadua.

“A siliva kei na koula e sega ni tu vei au, ia na ka ga sa tu vei au ka’u na solia vei iko: Ena yaca i Jisu Karisito na kai Nasareci mo tucake ka lako.

“Sa qai taura na ligana imatau, a sa tubera cake” (Cakacaka 3:6–7).

Sa rawa ni da cakacaka ena soli ni noda gauna kei na taledi eso, e dua na vosa ni veikauwaitaki, se dua na daku kaukauwa. Ni da vakasaqara ka raica, eda na tu ena vanua kei na ituvaki eso e rawa ni da cakacaka ka veivakalougatataki kina. A cakacaka na noda kai Samaria dauloloma. A kauti keirau ki na nona itikotiko okoya ka vakarautaka vei keirau na veika a tu vua. Ena yalovinaka a kaya okoya, “na ka ga sa tu vei au ka’u na solia vei iko.” Sa ikoya saraga na ka eda gadreva tu.

Sa vakatavulica o Peresitedi Monson na ivakavuvuli vataga oqo:

“O keda yadua, ena ilakolako ena vuravura oqo, ena lakova ga na nona Sala i Jeriko. Na cava o na rawa ni sotakaya? Na cava ena noqu? Au na sega ni siqemi koya rawa beka e sa buturaki mai vei ira na daubutako ka sa gadreva na noqu veivuke? O na vakakina?

“Auna dua beka ka raica na tamata mavoa ka rogoca na nona vakatakekere, ia qai takoso ki na yasana kadua? O na vakakina?

“Se au na dua ka raica, ka rogoca, ka wawa, ka veivuke sara? O na vakakina?

“A vakarautaka o Jisu na noda vosamatataki, ‘Lako, ka cakava vakakina.’ Ni da talairawarawa ki na ivakasala oya, e sa tadolavi ki na matada tawamudu e dua na rai taleitaki qiqo ni reki e sega ni vakatauvatani ka sega ni lako siviti rawa.”⁴

Ni da sa mai vakataka cake na iVakabula ena qarai, raici, kei na cakacakataki, eda na mai kila na dina taucoko ni vosa nei Tui Penijamini: “Ko ni sa qaravi Koya tiko na nomuni Kalou ena nomuni qaravi ira tiko na wekamuni” (Mosaia 2:17).