Nona Yalayala ni Tikoga
Robyn Casper, Utah, Amerika
IYALOYALO MAI VEI Bradley H. Clark
Ni’u dabe koto ena soqoni ni sakaramede ka vakasamataka vagumatua voli na masu ena madrai, era a tokaruataki ira tiko ga na vosa ena noqu vakanananu: “ka me tiko ga kei ira na nona Yalo Tabu” (Moronai 4:3; V&V 20:77).
“Tikoga,” e tukuna—sega ni so ga na gauna. Qai cava na vuna, ena vica na vula eliu, a sega ni vakauqeti kina na watiqu kei au me baleta na iwalewale me taqomaki kina na luvei keirau tagane yabaki 11 ni bera ni a mate ena dua na coqa ni basikeli kei na motoka? Cava na vuna e sega ni wanonovi keda matua “tikoga” kina na Tamada Vakalomalagi ka vakaroti keda?
Au a sa vakatavulici ena Lalai ka vakabauta ni Yalo Tabu ena taqomaki keda. Ena vakayagataka o Koya na domo, rogo lailai me wanonovi, tuberi, ka vakaroti keda ena veika rerevaki. Na vakasama oqo a se tiko ena noqu vakanananu ena nona mai takali o Ben. Sa dua na ka na noqu nanumi koya, ka sa mosita na yaloqu na veivakadeitaki kei na vakacegu.
A tiko evei na noqu domo ni veivakaroti? A tiko evei na Yalo Tabu? Au a vakila ni keirau sa cakava voli na neirau vinaka taucoko me keirau yalododonu. Keirau a sauma na neirau ikatini, tiko ena neirau soqoni, ka veiqaravi ena tabana cavaga keirau a kerei kina. Keirau a se yawa sara mai na buladodonu vakaoti, ia keirau a vakayaco lotu vakamatavuvale ka vulica na ivolanikalou. Keirau a tovolea voli.
Ena gauna vata oqo au a dabe toka kina ena dua na kalasi ni Soqosoqo ni Veivukei ni mai talanoataka na qasenivuli e dua na italanoa me baleta e dua na wekana voleka. Ni a wawa koto ena dua na itatakoso, a vakila e dua na nanuma matata na wekana me toka ga ena vanua e tu kina ni sa vuki me drokadroka na cina. A muria okoya na veivakauqeti, ka volekata na gauna vataga oya a gutua ka curuma yani kina e dua na lori levu na itatakoso ni sa damudamu tu na cina. Kevaka me a sega ni rogoca ka talairawarawa ki na domo oya, sa rawa ni a mavoa se mate saraga okoya kei ira na luvena.
A lauti au vakaukauwa na italanoa oqo, ia ena noqu dabe luluvu voli ena noqu idabedabe ka vakarau tucake meu biuta na rumu, a tuburi au e dua na yalovakacegu levu. Au a yalovakacegu niu kila ni a tiko dina kei au na Yalo Tabu. Ena noqu kisi e a sega ni tiko ekea o Koya vaka e dua na domo veivakaroti ia me vaka e dua na dauveivakacegui.
Mai na gauna ni vakacalaka nei Ben, au sa mai vakaukauwataki vakalevu sara ka sa mai vakacegui ena loloma ni Tamaqu Vakalomalagi. E sega vei au na kila matata ena so na gauna me baleta na vuna era yaco kina eso na ka, ia au a sega ni bau vakatitiqataka na Nona loloma.
E tiko vei au na vakabauta ni Kalou e kila vakamatata tu na ka kecega ka na sega ni laivi au meu tawavakacegu tu. Na Yalo Tabu e sa dau vakaitavi vakavuqa ena noda bula. E rawa ni taqomaki keda o Koya, ia e tuberi keda talega o Koya, vakacegui keda, vakatavulici keda, ka vakarautaka na kila matata kei na veivakalougatataki tale eso.
Au a vulica ni Tamada Vakalomalagi e dau maroroya na Nona yalayala. E a sa dau “tikoga” vata kei au o Koya.