iTabagone
Sarah Nei Duatale
Na dauvolaivola e vakaitikotiko mai Utah, Amerika.
Au raica ni dau dredre voli me’u vakayagataka na noqu vakabauta me saumi kina e dua na taro rawarawa me vaka na “Cava na vuna o sega ni gunu kofi kina?” E liu au dau vakaiulubale tu ga me vaka na “E sa rui wiwi” se “Ausega ni taleitaka na kena igunugunu.”
Cava na vuna au a madua kina? Cava na vuna au sa rui rere kina ni tutaka na ka au vakabauta? Ni’u railesu ena gauna oqo, au sega ni kila matata saraga na ka au a rerevaka. Ia au nanuma vinaka na noqu a tarova na vuni voli ena daku ni ulubale eso.
Dua na siga ena noqu kalasi ni vosa Vakavalagi ena koronivuli torocake, a kacivaka na qasenivuli ni keimami na raica tiko e dua na wase ni yaloyalo ena TV ka’u kila ni sega ni dodonu me’u sarava. Ni ra kaila ena marau na vo ni gonevuli, a laveta cake na ligana o Sarah na noqu itokani ena kalasi ka kerea ke rawa ni gole ituba.
Ni taroga na qasenivuli na vuna, a sauma vakamatata o Sarah, “Baleta ni’u Momani ka’u sega ni dau sarava na yaloyalo e tiko kina na veika vakasisila.”
A veivakurabuitaki na nona yalodoudou ni tudei ena mata ni kalasi. Vinakavakalevu Sarah, o au talega a tucake ka wawa voli e tautuba kei na vakasama matata me yacova ni cava na yaloyalo.
Au a veisau vakataucoko. Au sa tekivu vakamacalataka voli na noqu vakabauta ka sega tale ni levea tiko na kena ulutaga. Ka me kena vatuka, au sa mai nuidei vakaiau ka vakaitavi vakalevu cake ena itaviqaravi eso ni Lotu kei na vuli.
Au a sega ni tukuna vei Sarah na kena vakaibalebale vakalevu vei au na nona ivakaraitaki, ia au dau tovolea me’u vakatatamuria na nona ivakaraitaki ni nuidei. Au sa qai vakila tu oqo ni noqu mai lewena na Lotu totoka ka vakatabui ni Kalou, e sa sega saraga ni dua na ka meda madualaka. Au vakanuinui ni na rawa, mai na noqu ivakaraitaki, me’u na Sarah nei duatale.