Duabau na Qelenisipi ka Duabau na iVakatawa

E dua na lomanibai ni qelenisipi e vakavuvulitaka vei keda na nona kauwaitaki ira na Nona tamata na iVakabula.

Qelenisipi ni Gauna Makawa

iKuita

iVakatawa ni sipi

Lalaga vatu

Matanikatuba

Sipi

iRabo

iTitoko

Na cava oqo: E dua na bai rawarawa ga, dua na bai vakalalaga.

Kena iNaki: Me taqomaki e dua na qelenisipi mai vei ira na manumanu kila kei na daubutako, vakauasivi ena bogi.

iYaya kei na kena tara: vakalevu ena vatu, ka dau ubi yani na dela ni lalaga ena kauvakavotona. Dau vakayagataki talega vakalevu na tabanikau vakavotona me vakabaitaki kina vakawawa na qelenisipi. Ena so na gauna dau bainisipi na qara, ka biu yani e gusuna na vatu kei na tabanikau.

Dina Vakaivolatabu

Dau yaga sara vakalevu na sipi me baleta na lewena, sucu, vutina, kulina, kei na kena iliu ka dau vakayagataki vakalevu me isoro.
Mai Isireli eso na manumanu kila era dau kania na sipi oka kina na olifa, aina, taika, kei na kolikila. Ena veigauna makawa era dau bula talega ena yasayasa oqori na laione kei na pera (raica na 1 Samuela 17:33–37).
Era dau vakayagataka na ivakatawa ni sipi e dua na ititoko me ra liutaka kina na sipi kei na dua na ikuita kei na irabo me ra taqomaka kina.
Na ivakatawa ena liutaka na nona sipi ki na kakana kei na wai ena siga (raica na Same 23:1–2) ka lesu tale ki na bai ena bogi. Era na wilika na ivakatawa na levu ni sipi ena bogi ni ra sa lesu, ka vakasaqara kevaka e dua sa lakosese. Ena qai davo ena matanikatuba ni bai me taqomaki ira.
E vakatokai Koya o Jisu Karisito me iVakatawa Vinaka (raica na Joni 10:11–15) baleta ni a solia na Nona bula ena vukuda. A vakatauvatani Koya talega ki na katuba ni bainisipi (raica na Joni 10:1–9) baleta ena Vukuna eda na rawata kina na vakamamautaki vakayalo, na vakacegu, sautu, vakabulai, kei na bula vakalou.
Na iApositolo o Paula e vakatauvatana na Lotu ki na dua na qelenisipi (raica na Cakacaka 20:28).

Na Cava Eda Rawa ni Vulica

Na bainisipi era:

Soqoni kina na qelenisipi. Ni da lewe ni Lotu, eda vauci ena dua na ivau ni duavata ena noda vakabauta kei na noda veiyalayalati, ka vakakina na noda dau vakasoqoni vata. E vakavuvulitaka o Peresitedi Henry B. Eyring, na iMatai ni Daunivakasala ena Mataveiliutaki Taumada: “Na reki ni duavata e vinakata vakalevu o [Tamada Vakalomalagi] me solia vei keda e sega ni rawati yadudua. E dodonu meda vakasaqara ka rawata vata kei ira na tani. Sa na sega kina ni ka ni kurabui ni Kalou e vakauqeti keda meda soqoni vata me rawa ni vakalougatataki keda. E vinakata o Koya meda soqoni vakamatavuvale. Sa tauyavutaka kina o Koya na kalasi, tabanalevu, kei na tabana, ka vakaroti keda meda dau soqoni vata vakawasoma. Ena vakasoqoni oqori, … e rawa ni da masu ka cakacakataka na duavata ka na kauta mai na reki ka vakalevutaka na noda kaukauwa ni veiqaravi” (“Me Duavata na Yaloda,” Liaona, Nove. 2008, 69).

E dua na vanua ni taqomaki kei na vakacegu. Vei Jisu Karisito eda na “kunea kina na vakacegu ni [yaloda]” (Maciu 11:29). Na Nona Lotu e “idrodro, ka … ivakaruru” (V&V 115:6). Ia me vaka e vakavuvulitaka o Peresitedi Boyd K. Packer, na Peresitedi ni Kuoramu ni iApositolo Le Tinikarua, “Eda na taqomaki ka maroroi vinaka … ni da rokova na veiyalayalati eda sa cakava ka bula ena ivalavala rawarawa ni talairawarawa e gadrevi vei ira na daumuri Karisito” (“Na Veika Oqo Au sa Kila,” Liaona, Me 2013, 7).

Yadravi mai vua na ivakatawa. O Jisu Karsito na iVakatawa Vinaka e vakabulai keda. A vakararawataki ka vakamatei me rawa ni da vakadruka na ivalavala ca kei na mate ka lesu vei Tamada Vakalomalagi. Ni da lako mai vei Karisito ka talairawarawa ki na Nona ivakaro, ena vakalougatataki keda, tuberi keda, ka taqomaki keda yadua vakakina ni da Nona tamata ni veiyalayalati.