E Vakasolokakana Vei Au na Yalo

Christina Albrecht Earhart, Washington, Amerika

“Ei, kemudrau! Drau lesu mai!” e kaci mai e dua na domo vakusakusa.

Au vuki ka raici rau e rua na gonetagane rauta na yabaki lima kei na vitu ni rau cici kosova mai na ikelekele ni motoka ka drodro tu na wai ni matadrau. E lomaleqa na kena irairai na vakailesilei ni kacivi rau.

Niu goleva yani na noqu motoka, e vakasolokakana vei au na Yalo, “E rawa ni o veivuke eke.” E malumu na vakasolokakana ia e matata vinaka ka sega ni bera na noqu sa cici kosova yani na ikelekele ni motoka vei rau na gonetagane.

Au raici koya e qase cake ni duri volekata e dua na van dravu lailai. Au lako yani ka tekiduru e yasana.

“Bula. Na yacaqu o Christina. E vakaivei tiko?”

Ena noqu vosa, a tagi vakaukauwa ka vunitaka na matana e ligana. Rau sa yacovi keirau yani na vakailesilesi kei na ikarua ni cauravou.

“Au nanuma ni rau kila ga na vosa Vakavaranise,” e kaya vei au na vakailesilesi. “Keitou raica ga ni rau cici mai na loma ni sitoa, erau lakosese.”

Au tokaruataka noqu ivakamacala vei rau ena vosa Vakavaranise. Na vosa Vakavaranise na imatai ni vosa au kila, ia au sega tu ni bau vosataka tale me tekivu mai na gauna au vakubeci kina ena dua na matavuvale vosa Vakavalagi niu se gonelailai. E dau sega ni vinaka noqu vosa Vakavaranise. Ia ena gauna ko ya, e sega ni bau veilecayaki se sakasaka. E matata ena noqu vakasama na vosa kei na rorogo ni domoqu niu vakalogavinakataki rau na gonetagane.

Ena maliwa ni mamakeukeu, e vakamacalataka na gonetagane qase cake ena vosa totolo cacavukavuka ni rau sega ni raici rau rawa na nodrau itubutubu ena loma ni sitoa kei tacina ka rau cici mai tuba me vaqarai rau. Niu vakarorogo, sa yaco meu qai kila na kena taleitaki niu sega walega ni veivosaki tiko Vakavaranise ia au ciqomi rau ka vakacegui rau e rua na gonelalai nuiqawaqawa.

“Erau sa sega ni raici rau rawa na nodrau itubutubu ka vinakata me rau mai waraki rau ena nodratou motoka,” au kaya vua na vakailesilesi ni sitoa. E tukuna vei au na gonetagane lailai na yacadrau na nona itubutubu, au mani solia sara vua na vakailesilesi me rawa ni tarai rau. Ena vica na miniti ka tarava sa raici tamana na gonetagane ni curu mai na sitoa ka cici yani me sotavi koya.

Niu muria yani na gonetagane vei tamana, au raica ni sa sega mada ga niu vakamoce rawa Vakavaranise. Au tovolea ka sega ni rawata meu cavuta e dua na ka e rawa ni rau kila na gonetagane, sa rawa walega niu cavuta e vica na vosa cacavukavuka. Au sa mani tini ga ena vosa Vakavalagi, ka kaya yani vua na gonetagane, “Moce. Totoka na sota vata kei iko.”

Niu biuti rau toka na gonetagane vei rau na nodrau itubutubu, au vakasinaiti ena vakavinavinaka. A cakacaka mai vei au na Tamada Vakalomalagi me vakalogavinakataki rau e rua na Luvena lalai Au vakayalomalumalumutaki ni rawa me vakalevulevuya na Turaga na noqu rawaka yalani me vakataucokotaki na Nona inaki. Au vakavinavinaka meu vakadinadinataka na veika e rawa ni yaco ni da soli keda yani Vua ni da kacivi, ena veigauna dredre sara mada ga.