iWalewale mo Vuku kina

Mai vei Elder Neil L. Andersen

Ena Kuoramu ni iApositolo Le Tinikarua

Mai na vosa ena dua na soqoni yavutaki e Brigham Young University–Idaho ena ika 10 ni Epereli, 2009.

Ena ualoka ni itukutuku nikua, sa da gadreva kusarawa na vuku–na vuku me rai curuma ka vakila matua na iwalewale ni kena tutaki na ka eda sa vulica tiko.

Meda sa nanuma:

1. Sa dodonu meda qara na vuku.

2. Na vuku e sa duiveimataqali ka ra basika mai ena ituvaki kei na roka duidui eso.

3. Na vuku rawati totolo e kauta mai na veivakalougatataki cecere.

4. Na vuku ena dua na tikina ena sega ni rawa ni vakadewataki ki na dua tale.

5. Na vuku ni vuravura, me vaka ena vuqa na ituvaki e dau yaga sara, e sa yaga vakaoti ni dau cuva ena yalomalua ki na vuku ni Kalou.

Era vakamacalataka na ivolanikalou e rua na mataqali vuku: na vuku ni vuravura kei na vuku ni Kalou. Na vuku ni vuravura e tiko ruarua kina na ka vinaka kei na ka ca. Ena ivakamacala buto duadua, e sa rawa ni vakamacalataki me dua na dina vakatikina, ni veiwaki na kila maqosa kei na veidabui me rawati kina na inaki kocokoco se lewa ca eso.

E tiko tale e dua na mataqali vuku ni vuravura ka sega soti sara ni veilecayaki tu. Vakaidina e sa vinaka saraga. Na vuku oqo e sa rawati vagumatua mai na vuli, raitayaloyalo, vakadidike, kei na cakacaka kaukauwa. E sa rui yaga sara ka veivukei ena veika eda cakava. Kivei ira na tamata vinaka ka maqosa, e dau lako mai ni da sotava na noda tiko ena bula oqo.

Vakabibi sara, na vuku e kauta mai na rawaka ena vuravura sa dodonu me na yalorawarawa me tiko ena taudaku ni vuku ni Kalou ka me kua ni nanuma ni rawa ni veisosomitaka.

E sega ni buli taucoko vakatautauvata na vuku. E gadrevi meda vulica ni gauna e koto kina na duidui ena maliwa ni vuku ni vuravura kei na vuku ni Kalou, sa dodonu meda solia na lomada ki na vuku ni Kalou.

Au nanuma mo taura eso vei ira na dredre o sotava tiko. Vola sobu e dua na laini ena lomadonu ni dua na pepa. Lisitaka na vuku ni vuravura ena yasana imawi kei na vuku ni Kalou ena yasana imatau. Vola na dredre eso e veicalati vei rau yadua.

Na digidigi cava soti o sa cakava tiko?

Ena wase 45 ni Vunau kei na Veiyalayalati, ka tukuna voli me baleta na iKarua ni Lesumai ni iVakabula, e tukuna tale kina na Turaga na italanoa me baleti iratou na goneyalewa e lewe tini ka qai biuta toka vei keda na vosa oqo: “Raica ko ira sa yalomatua ka vakabauta na itukutuku vinaka ka ra sa taura na Yalo Tabu me dusimaki ira, era na sega ni rawai—io au sa kaya vakaidina vei kemudou, era na sega ni muduki tani ka biu ki na bukawaqa, raica era na tu ena siga ko ya” (raica na V&V 45:57).

Meda sa vakasaqara yani na vuku ni Kalou. Sa levu sara na ka eda rawa ni vulica saraga oqo me baleta na vuku. Au yalataka vei iko ni ko na sotava na veivakalougatataki ni Turaga ni o vakasaqara na vuku, na vuku ni Kalou. Sa tuvakarau tu o Koya me wasea kivei keda na Nona vuku. Ia kevaka eda na talairawarawa ka yalomasumasu ka vakasaqara yani, ena lako mai.

O Sa Bulataka Vakacava na ka qo?

“Sa dau tiko ga e rua na digidigi me digitaki. O rawa ni digitaka na ka o vinakata. Ia sa dodonu mo vakasamataka vakayalomatua. Au sa rawa ni kaya na digitaki ni Turaga ena rawa ni vukei iko ena veisiga yadua kei na Yalo Tabu e yasamu sa rawa ni vukei iko ena ituvaki yadua. Na digitaki ni yasana cala sa rawa ni muataki ki na nanuma tawalasa, e dua na nanuma ka vaka me na marautaki ena dua na gauna lailai ia ni sa oti o na raica na vatuka eso ka o na veivutunitaka ena yalorarawa na digidigi o sa cakava. Tiko ena yasana ni Turaga! E sega ni dau rawarawa, ia sa yaga vakaidina!”

Samuel J., Austria