Lako Yani ena Vakabauta
Mai vei Elder Anthony D. Perkins
Ena Vitusagavulu
Mai na dua na vosa ni sokalou, “Nevertheless I Went Forth,” a cauraki ena Brigham Young University ena Fepe. 4, 2014. Me baleta na vosa taucoko Vakavalagi, gole ki na speeches.byu.edu.
E va na lesoni ni caka vakatulewa veivakauqeti mai vei Nifai e rawa ni vakalailaitaka na nomu rere ka tosoya cake na nomu nuidei mo toso ki liu.
iVakamacala mai na The Spirit of Prayer, mai vei Claudio Roberto Aquiar Ramires
Ko ni sa bula tiko oqo na itabagone qasecake ena ka e sa vakatokai “na Yabaki Eso ni Vakatulewa.” Ko ni sa cakava tiko e vuqa na digidigi bibi sara ena nomuni bula, “me vaka na lako ki na valetabu, lako vakaulotu, rawati ni vuli, digitaki ni dua na cakacaka, kei na digitaki ni dua na itokani ka vauci vata ena valetabu ena bula oqo ka tawamudu.”1
Au vosa vakatabakidua kivei ira na sasaga dredre voli ena dua se sivia na vakatulewa bibi oqo—eso na rairai voleka ni paralase ena rere ni vakayaco vakatulewa cala se na kena gadrevi na veivaqaqacotaki me nuidei voli kina ena dua na vakatulewa a caka taumada.
E va na lesoni ni caka vakatulewa veivakauqeti mai vei Nifai, ke vakayacori, e rawa ni vakalailaitaka na nomu rere ka tosoya cake na nomu nuidei mo toso ki liu.
1. Talairawarawa ki na iVunau.
Na icavacava ni tikina ni tukutuku tabu nei Nifai e vakamacalataka vakamatata ka vakamaqosa na nona bula: “Ia sa vakaroti au vakaoqo na Turaga, ka’u sa kitaka vakakina” (2 Nifai 33:15).
Na vakabauta kei na loloma nei Nifai me baleta na iVakabula e sa vakatakilai ena nona talairawarawa ki na ivunau ni Kalou. A masu okoya (raica na 1 Nifai 2:16). A wilika na ivolanikalou okoya (raica na 1 Nifai 22:1). A qara ka muria na ivakasala ni dua na parofita bula (raica na 1 Nifai 16:23-24). Na talairawarawa vakaoqo e vakatara na Yalo Tabu me tokoni Nifai vakaukauwa ena nona bula taucoko ka rawata na vakatakila dauyaco vakaikoya.
O iko talega mo na tiko volekata na Turaga ena nomu muria na ivunau ni Kalou. Au vakadinadinataka na talairawarawa tudei ki na veika lalai me vaka na wiliki ni volanikalou, masumasu ena veisiga, tiko ena veisoqoni ni Lotu, muri ni nodra ivakasala na parofita bula, kei na nodra qaravi na tani ena vakataudeitaki iko me baleta na Yalotabu—kei na vakatakila e kauta mai.
Na bula savasava vakaoti e sega ni dua na ka me rawati taumada ki na vakatakila vakatamata. Na ka me rawati taumada oya na veivutuni e veisiga (raica na Roma 3:23). Kevaka sa taucoko ka yalodina na nomu veivutuni (raica na V&V 58:42-43), na kaukauwa ni veisavai ni Veisorovaki ena kauta mai na Yalotabu me tuberi iko ena vakatulewa bibi cake ni bula.
2. Toso Ki Liu ena Vakabauta
Biuti iko mada ena ivava nei Nifai. Sa tukuna vei iko o tamamu ni sa vakarota na nomu matavuvale na Turaga mo dou biuta tu mai na nomudou iyau ka gole yani ki na lekutu. Ko na sega li ni via kila na veika me baleta na nomudou ilakolako kei na icavacava?
Au liaca ni na rairai yalomarau o Nifai kevaka a vakatakila vakamatata na Turaga na veika me baleti koya mai muri. Ia oya e sega ni iwalewale a cakacaka kina na Kalou vata kei Nifai, ka na sega ni iwalewale me na cakacaka vata kina kei iko o Koya.
Ni ratou a gole yani na matavuvale nei Nifai ena loma ni lekutu, na ivakaro a lako ga mai vua “vagauna” (1 Nifai 16:29; 18:1). Na raici ni nona ilakolako ni bula ena veivakadeitaki vakailiu ena sega ni na vakarautaka vua na veivakadreti vakayalo kei na tuvai ni vakabauta e sotakaya ka a vukei koya me vakataka cake e dua na tamata va-Karisito.
Kevaka o waraka tiko na Kalou me vakatakila na koroi ni vuli cava mo sasagataka, o cei mo vakawatitaka, na cakacaka cava mo ciqoma, na vanua cava mo vakaitikotiko kina, se mo na lako ki na koronivuli liu, kei na vica na gone mo vakasucuma, ko na rairai sega ni biuta na nomu itikotiko. Au vakadinadinataka ni vakatakila vakatamata ena lako walega mai “vagauna.”
Na Tamada Vakalomalagi e vinakati keda meda tubu, oya e oka kina na taraicake ni noda rawa ni veidutaitaka na dina eso, vakatau lewa, ka caka vakatulewa. Ia sa sureti keda talega o Koya meda kauta mai na noda vakatulewa ki Vua ena masumasu (raica na V&V 9:7-9). E vakatavulica o Elder Richard G. Scott ena Kuoramu ni iApositolo Le Tinikarua ni isau ni noda masu e lako mai “ena dua vei iratou na tolu na kena sala.”2
Veivakadeitaki Dina
“iMatai,” a kaya o Elder Scott, “e rawa mo vakila na vakacegu, sautu, kei na veidinadinati e vakadeitaka na dodonu ni nomu vakatulewa.”3 Au sa raica kei na watiqu, o Christy, ni sa rawa ni veivosakitaki ena ivolanikalou na dina me baleta na vakatulewa eso ni vakayarayarataki bula bibi, vakavuqa ni cava na sokalou ena valetabu.
Me kena ivakaraitaki, ni sa cava e levu na kena vakasamataki kei na masumasu, keirau sa nanuma me keirau biuta tani tu mai na neirau itikotiko vou ni tatadra e Texas, ciqoma e dua na cakacaka tokitaki, ka toso vata kei na ono na gone lalai ki Beijing, Jaina. Ia keirau a gadreva vakalevu sara na veivakadeitaki vakayalo me baleta na itosotoso vakilai vakaoqo. Na dina vakalou a yaco mai vei keirau—ena valetabu—ni keirau a wilika na veivosa oqo ena Vunau kei na Veiyalayalati: “Ia au sa kaya vakaidina vei iko mo … kakua ni lokuyara tiko ena vanua oqo me vica tale na siga; … mo biuta tu ga na nomu iyau. Ia mo lako yani ki na veivanua mai natuicake” (V&V 66:5-7).
Na domo i Jisu Karisito ena ivolanikalou, ni tomani ena veika e vakilai kaukauwa eso ni Yalo Tabu, a vakadeitaka ni neirau vakatulewa ena igolegole ki Jaina e sa donu.
Veivakilai Tayana
Na ikarua ni sala e saumi masu kina na Tamada Vakalomalagi oya mai na dua na “veivakilai tayana, sega ni vakila e dua na ka, ena ivakaraitaki ni cala ni nomu digidigi.”4
Ni cava na noqu kaulotu ki Taiwan, au a nanuma ni veika vakalawa raraba ena dua na digidigi ni cakacaka vinaka. Ni’u mai navuca vata kei Christy na sasaga me rawati oya, keirau a kila vakamatata ni lima tale na yabaki ni vuli sau levu e koto eliu.
Na veika vakailavo ni Amerika e sa lutu vakalevu ka sa lailai na neirau ilavo, ka keirau nanuma na leweni ni Mataivalu i Macawa ROTC, sa na dua na digidigi yalomatua me saumi kina na noqu vuli. Ia ni’u mai taura na veitarogi e gadrevi ka vakalewena na ivola vakacakacaka, keirau a sega voli ga ni yalovakacegu ena caka ni yalayala oya. A sega ni lako mai na sega ni vakilai ni dua na ka se vakanananu butobuto—na yali ga ni vakacegu.
Na vakatulewa tawadodonu oya vakailavo a veivakauqeti, vakatikina, baleta au a rawa ni laki dua na loya torosobu!
Vakanuinui Vakalou
Na ikatolu ni sala e saumi masu kina na Kalou: sega ni saumi mai. “Ena nomu bula kilikili tiko kei na nomu digidigi e salavata tiko na ivakavuvuli ni iVakabula kei na kena gadrevi mo cakacakataka,” a kaya o Elder Scott, “toso vata tiko kei na veivakabauta.”5
Na icavacava ni sasaga nei Nifai ena tauri mai ni peleti parasa e vakaraitaka na iwalewale meda toso vata kina ena vakanuinui vakalou. A vola okoya:
“A sa kauti au yani na Yalo Tabu, ia au sega ni kila na ka me’u na laki kitaka.
“Ia au sa lako ga” (1 Nifai 4:6-7).
Ena yaco mai na gauna eso donuya na nomu vakatulewa ni veiyabaki ka sa na sega ni rawa mo na lokuyara tale kina ka mo na cakacaka ga. Au sa vulica ni, me vaka a vakatavulica o Elder Dallin H. Oaks, “ena lako mai na veivakauqeti ni Yalotabu ni da sa cakava na ka kece eda rawata, ni da tiko e tuba ena siga ka cakacaka voli ka sega ni dabe tiko emuri ena vanua rugurugua ka masu voli me baleta na veidusimaki ena imatai ni kalawa me tauri.”6
Me vakataki Nifai, na Yalotabu ena vakadeitaka se vakarota ena kena gauna na nomu salatu digitaki.
3. Bula ena Gauna Oqo
Na yalayala nei Nifai ena ilakolako ki na vanua yalataki e duri tu vakaveibasai sara ki na nodrau na tacina o Leimani kei Lemueli. Rau sa vakatulewataka me rau lako, ia na lomadrau e sega ni biuti Jerusalemi. O Nifai a vakavinakataka voli na nona dakaititi kamusu me qara kakana kina ka caka kaukamea me tara e dua na waqa ia e vaka me rau wele voli ga na tacina ena valelaca.
Edai sa vuqa tu e vuravura na Leimani kei na Lemueli. Ia na Turaga sa gadreva na turaga kei na marama yalayala vakataki Nifai. Ko na sotava ena bula na rawaka levu cake ni ko yalayala vakataucoko ki na nomu vakatulewa eso ka sasagataka mo cavuisausau ena kemu ituvaki oqo ni ko tadolava rawa voli na matamu ki na veika mai muri.
E vakaraitaka o Nifai na ivakasala yalomatua nei Peresitedi Thomas S. Monson: “Na tatadrataki ni veika sa oti kei na divi ni veika mai muri ena rawa ni vakatubura na yalovakacegu ia ena sega ni taura na itutu ni bula tiko ena gauna oqo. Oqo na siga ni noda madigi, ka meda sa taura dei.”7
4. Tautauri mai na Nodra Kaukauwa Tale Eso
Ni da sa mai qara oti koto na Yalotabu, toso ki liu vata kei na noda vakatulewa, ka sa yalayala vakataucoko kina, na vakatitiqa ena cadra tikoga ka vakavuna meda taroga na noda vakatulewa. Ena ituvaki vakaoya sa rawa ni soli vakasala kei na veivakaukauwataki e dua na lewe ni matavuvale se itokani nuitaki meda toka dei ga ena ilakolako. Au navuca ena nona ilakolako voli yani, ni a yaco na wati Nifai me nona ikelekele nuitaki.
Na taleitaki ni wati Nifai a yaco mai vei au ena noqu sikova voli na Church History Museum. Au a kidroa vakaoti ena dua na droini ekea ena vesu tu nei Nifai ki na ivana ni dua na waqa, suasua tu na yagona ena dua na cagitataba warumisa.8
Ena yasai Nifai a koto kina na watina kei na dua vei ira na luvena. A sotava voli okoya na cagitataba kei na bolebole vataga vakataki Nifai, ia na matana e a doudou kei na ligana kaukauwa e a ologa taqomaka wavoki na tabana (Nifai). Ena gauna oya au vakila ni o au talega sa mai vakalougatataki me tiko e dua na watiqu yalodina me veivakaukauwataki voli ena noqu gauna ni veivakatovolei. Au nuitaka ni’u a dua na vu ni kaukauwa vakakina ki vua.
Kemuni na turaga, na maroroi kei na toroicake ni kaukauwa vakayalo o ni sa taracake (se vo me na taraicake) vaka e dua na daukaulotu se ena so tale na veiqaravi yalododonu e sa nomuni iyau taukeni uasivi sara ena rawati ni dua na turaga vakawati ka tama gadrevi duadua. Kemuni na marama, na vakilai ni veika vakayalo, vakabauta, kei na yaloqaqa ni muri Jisu Karisito e sa veika o ni kilai tani uasivi sara kina vaka e dua na marama vakawati ka tina.
Au sureti kemuni mo ni yaco mo ni vakataka na mataqali tamata e rawa ni tautauri mai kina na watimu tudei se watimu mai muri me baleta na ivakasala kei na veivakaukauwataki yalomatua. E dua na turaga buladodonu kei na dua na marama bulakilikili, vauci ena gauna oqo ka tawamudu ena valetabu, sa rawa ni cakava na veika dredre vaka veitokani tautauvata.
Au yalataka ni kevaka o na tutaka na lesoni eso e vulici mai vei Nifai kei ira na parofita edaidai me baleta na caka vakatulewa, o na liutaki voli ena vakatakila vakatamata “vagauna.” Ni ko tosocake ena nomu vakatulewa ni veiyabaki, mo na, me vakataki Nifai, taukena na vakabauta mo kaya:
“A sa kauti au yani na Yalo Tabu, ia au sega ni kila na ka me’u na laki kitaka.
“Ia au sa lako ga” (1 Nifai 4:6-7).