Meda sa Lako Sara Ga Oqo Kina Valetabu!

Mary Holmes Ewen, California, Amerika

IYALOYALO MAI VEI Bradley H. Clark

E a vakaveikilaitaki e dua na lewenilotu vou ena dua na mataka ni Sigatabu ena tabanalevu. Na yacana o Lydia. E a dreta sara ga na yaloi keitou o koya.

O Lydia sa qase sara ka mataboko ena vicavata na yabaki baleta ni matenisuka tiko. Totolo sara na nona kilai ira na lewenilotu ena voqa ni domodra kei na icavucavu ni yavadra. O koya e daulululu ka cavuta na yacai keimami, ka keimami laiva tu ga vaka oya baleta ni o koya e mataboko.

Ni oti e vica na yabaki sa qai sotavi bisopi kei peresitedi ni iteki o Lydia baleta na nona ivolatara ni lako kina valetabu. Ena dua na soqoni ni iSoqosoqo ni Veivukei e a vakaraitaka kina vei au ena yalomarau ka kaya vakaoqo, “Sa tukuna vei au o peresitedi ni iteki meu sa lako sara ga oqo kina valetabu. Sa rawa ni ko na kauti au?”

E se qai imatai ni macawa ni Tiseba—sa gauna osooso sara vei keimami. Au tovolea meu vakaiulubale ka kaya, “sega ni rawa me wawa me yacova na Janueri?”

“Sega, Daru sa lako sara ga oqo!”

E so na marama era dau lako ena veivula kau laki kerea vei iratou ke rawa ni ratou kauti Lydia ena nodratou lako ka tarava. Eratou osooso talega o ratou. Ia, o Lydia ni drodro tu na wainimatana e qai tukuna tale mai ni o peresitedi ni iteki sa kaya vua me sa lako sara ga oqo kina valetabu.

E kea keitou sa duavata kina me keitou sa na lakova na 150 na maile (241 km) ena ilakolako kina valetabu ena macawa ka tarava. E gaunisala keitou a wasea ena lori na totoka ni veitokani ni walu na marama. Sa marautaka o Lydia na ka e sotava mai valetabu kei na veivakalougatataki ni nona sa ciqoma na nona edaumeni.

Ena imatai ni macawa ni Janueri sa bibi na mate kei Lydia ka laki curu sara e valenibula me qaravi kina. Sa mani kacivi na nona bula ni oti e dua na macawa. Ia, o Lydia sa lako vata kei na nona veivakalougatataki tawamudu ka a ciqoma mai valetabu ena vica ga na macawa yani ki liu.

E muri au a wasea vei peresitedi ni iteki na italanoa ni neitou ilakolako ka kaya vua niu sa bau qoroya sara ga na nona a vakauqeti me tukuna vei Lydia me sa lako sara ga ena dua na gauna totolo e rawa kina ki valetabu.

A kaya mai o koya, “Aua sega ni kaya vua me sa lako sara ga oqo.” “Audau kaya ga vei ira na tauri ivolatara ena imatai ni gauna mera kusa ka lako ki valetabu. Na Yalotabu e a vosa vei Lydia, e sega ni vosa vei au.”

Vakavulica vei keitou o Lydia meda dau vakarorogo kina Yalotabu ka cakava vakusarawa na ka e gadrevi. Au vakavinavinaka ena nona veivakananumi me da dau vakarorogo kina domo rogo lailai.