Nodaru Veiyawaki

Daubokobuka kei na iYaragi ni Kalou

iVakaraitaki mai vei Julia Yellow

Oya e dua na siga maravu ena noqu cakacaka vakadaubokobuka voladia, au mani nanuma meu wilika na iVola i Momani. Ni raici au e dua noqu itokani vakacakacaka niu wiliwili tiko, a taroga kevaka au kila na sala e rawa ni keirau tokara kina na iyaragi ni Kalou ena gauna oqo. Ni keirau veitalanoa tiko a taqiri mai na alamu. A kama e dua na sitoa voleka.

Keirau daramaka vakatotolo neirau isulu ni bokobuka ka lako yani kina vakadodonu. E vakaitamera na yameyame, ni keirau torova yani na sitoa, a kacabote e dua na ka ena vanua keirau goleva tiko. A wavoliti keirau na yameyame. A vakaveilecayakitaki keirau vakalailai na kacabote me vica na sekodi. Ia e vinaka ga ni keirau vakaiyaragi ena neirau iyaya kei na isulu tataqomaki, keirau a sega kina ni mavoa.

Ni keirau sa lesu tale ki na siteseni ni oti na bokobuka, au taroga na noqu itokani kevaka e se nanuma tiko na nona taro me baleta na iyaragi ni Kalou. E kaya ni vakakina, kau vakamacalataka ni iyaragi ni Kalou e vaka na neirau iyaya veitaqomaki ni bokobuka. Sa dodonu me da dau daramaka tikoga me rawa kina ni da vorata na sasaga kaukauwa ni meca. Kevaka eda muria na ivunau, eda na vakalougatataki ena kaukauwa veitaqomaki ni iyaragi ni Kalou, ka na noda dauveituberi na Yalo Tabu.

Fernando de la Rosa Marrón, Mexico

Noqu iVolanikalou Talei

1 Samuela 16:7. “Ni sa sega ni raica ko Jiova me vaka sa raica ko ira na tamata; ni sa raica na ka e sau ko ira na tamata, ia sa raica na yalo ko Jiova” (1 Samuela 16:7).

Niu se bera ni lewena na Lotu, au dau raici au tu me dua na tamata walega ka sega ni levu na ka au rawa ni rawata. Au vakila ni sega ni dua na ka yaga sara e tu vei au. Au rere ni vakaraitaki au vei ira na tamata baleta deu na besetaki ka mosi na yaloqu. Au nanuma ni tamata kecega era tu wavoliti au era kaukauwa cake, vuku cake, ka vinaka cake mai vei au.

Ia a veisau na ivakarau kece ni rai oqo ena gauna au sa lewena kina na Lotu i Jisu Karisito ni Yalododonu Edaidai. Au vulica ni da luvena kece na Kalou ka tu vei keda na veitovo ni bula vakalou. Au sa qai kila oqo ni sega ni dua na veisisivi e caka tiko me baleta o cei e vuku cake, vutuniyau cake, se rairai vinaka cake. Ena matana na Turaga, eda tautauvata kece, ia o Koya ga ena vakataulewa—sega ni vakatau ena keda ituvaki vakayago ia ena noda talairawarawa kei na gagadre me da muria na sala sa virikotora o Koya.

Joan Azucena, Yatu Filipaini

O na Cakacaka Beka ena Sigatabu?

iVakaraitaki mai vei Julia Yellow

Niu yabaki 15, au sa rawata e dua na ivakadinadina tudei ni kosipeli i Jisu Karisito kau marau vakalevu niu lewena na Lotu. Ena gauna oya, au a cakacaka tiko meu veivuke ena bula ni noqu matavuvale. Sega ni dede mai na gauna au papitaiso oti kina, au sa sega ni cakacaka.

Au gadreva meu kunea totolo tale e dua na cakacaka baleta na bula ni noqu matavuvale sa vakatau toka vei au, ia na cakacaka kecega au kerekere kina e gadreva meu cakacaka ena Sigatabu. Au vakasuka e vuqa na cakacaka baleta niu kila ni dodonu meu lotu ena Sigatabu (raica na V&V 59:9–10).

Ni oti e rua na vula noqu vaqaqara, se bera ga niu kunea e dua na cakacaka. E sega ni lewe ni Lotu na tinaqu, e dina ga ni vakabauta na Kalou, sa dua na ka na levu ni nona cudru niu vakasuka tiko e levu na cakacaka.

Ena dua na bogi a raici au mai ena tonawanawa ni wainimatana ka taroga, “Na cava e vakatara tiko kina na Kalou me yaco vei kedatou na veika oqo ni o yalodina tiko ena cakava na ka dodonu?”

Au a sauma vaqo, “Na, au sega ni kila se cava e yaco tiko kina vei kedatou na ka oqo, ia au kila ga niu cakava tiko na ka dodonu, kau kila ni na vakalougatataki kedatou kina na Kalou.”

Ena mataka ka tarava a solia vei au e dua na tamata e dua na umailavo vinaka meu tokia eso na kako mai na dua na vale ki na dua tale me rua na siga. E bibi toka na cakacaka, ia niu taura na ilavo, au lako vakadodonu ki vale ka cabora e dua na masu ni vakavinavinaka. Sega ni dede au sa kunea e dua na cakacaka vinaka ka rawa kina vei au meu cegu ena Sigatabu, ka sega tale ni sega na noqu cakacaka me tekivu mai na gauna ko ya.

Au marau niu a digitaka meu vakatabuya na Siga ni Vakacecegu. E levu tu na bolebole ni bula, ia au kila ni kevaka eda segata me da tudei tiko ena loma ni bolebole oqori, ena vakalougatataki keda na Turaga.

Sahil Sharma, Idia