E Paia le Faatulagaga o le Ekalesia

O tagata fou o le Ekalesia e masani ona faalogo i faaupuga latou te lei faalogo muamua i ai: ki o le perisitua, le vaetofiaina, o le faaeega o lima, o le papatisoga mo e ua maliliu, o le Mutuale, Aualofa, ma isi mea faapena. Ma ua latou faalogo i faaupuga masani e faaaoga i ni auala e le masani ai: tiakono, peteriaka, epikopo, fesoasoani, faamanatuga, valaauga, faamalologa, molimau, sauniga, ma le tele o isi mea.

Afai e te mauaina oe lava i lena tulaga, aua e te popole. O le tele o lou auai atu i le lotu, suesue i tusitusiga paia ma anomea o lesona, ma fegalegaleai ma tagata o le Ekalesia, o le lelei foi lena o lou malamalama ai i nei faaupuga. I le taimi nei, aua nei faatuai e fesili atu i tagata o lau uarota po o le paranesi; o le a latou fiafia e faamatala mai soo se mea e leai se uiga ia te oe.

E taua faaupuga faapenei aua e atagia mai ai aoaoga faavae o le Ekalesia, aiaiga, faiga, ma faatulagaga, lea e sau mai tusitusiga paia ma faaaliga i perofeta o aso nei. E taitai e le Faaola Lana Ekalesia i le taimi nei e ala i le faaali mai o Lona finagalo i le Au Peresitene Sili (le Peresitene o le Ekalesia ma ona fesoasoani e toalua) ma le Korama a Aposetolo e Toasefululua. Ua faatulagaina le Ekalesia i le taimi nei e taua i le ala lava lea e tasi na faatulagaina ai e le Alii a o Ia i ai i le lalolagi (tagai i le Mataupu Faavae o le Faatuatua 1:6). E pei lava o taimi faatusitusiga paia, tatou te maua perofeta, aposetolo, sui o le Fitugafulu, o faifeautalai o e o atu taitoalua, ma epikopo ma isi taitai i le lotoifale.

O i latou uma o e auauna atu i le Ekalesia o ni volenitia. Ua valaauina i latou (talosagaina e auauna atu i) e ala i musumusuga a o latou taitai. O le a i ai se taimi o le a tuuina atu ai ia te oe se valaauga—o se tiutetauave, o se avanoa e auauna atu ai. A o e taliaina ma le naunautai ma faataunuuina i le mea sili e te mafaia, o le a faamanuiaina e le Alii au taumafaiga e auauna atu i Ana fanau. Tusa lava po o le a lou talaaga, e mafai ona e saofaga atu meaalofa faaleagaga taua. I le avea ai o se tasi o le Ekalesia, o outou o se vaega o le “tino o Keriso” (tagai i le 1 Korinito 12). O lau saofaga e taua i le faagaoioiga o le Ekalesia.

O taitai i lau uarota e auauna atu i se au peresitene (o se peresitene ma fesoasoani e toalua):

O le epikopo ma ona fesoasoani e toalua e fausia ai le au epikopo ma pulefaamalumalu i le uarota.

O le au peresitene o le Aualofa e auauna atu i tamaitai i le uarota ma fesoasoani e faamalolosia o latou aiga.

O le au peresitene o le korama a toeaina ma le taitai vaega o faitaulaga sili e auauna atu i alii o le uarota ma fesoasoani e faamalosia o latou aiga.

E auauna atu le au peresitene o le Peraimeri i fanau, ma o au peresitene o Alii Talavou ma Tamaitai Talavou e auauna atu i le autalavou i tausaga e 12–18.

O le au peresitene o le Aoga Sa e vaaia vasega o le Aoga Sa ma fesoasoani ia faaleleia atili le aoao mai ma le aoao atu o le talalelei i le uarota.