Faatumulia i le Ola & Malosi
E alala le tusitala i Texas, ISA.
O le a se faatinoga e tasi, pe afai ae faia pea ma faatasi ai ma le amio pulea, o le a fesoasoani ia te oe ina ia maua le soifua manuia, le malosi, ma le uunaiga?
Ata pue o foliga o le uati saunia e choness/iStock/Thinkstock
Vaai faalemafaufau mo sina taimi, ua oo mai se uo ia te oe e saili se fautuaga i auala e maua ai faaaliga faaletagata lava ia. Pe ana mafai ona e fautuaina atu na o se manatu se tasi, o le a lena [manatu]?
I le avea ai o se Pulega Aoao fou, na lagona e Elder Marion G. Romney (1897–1988) le le agavaa i le faataunuuina o lona valaauga taua, o lea sa ia saili ai se fautuaga mai lana uo o Harold B. Lee (1899–1973) o le Korama a Aposetolo e Toasefululua. O le fautuaga na ofoina atu i lena aso na faateia ma uunaia ai Elder Romney. Sa saunoa Elder Lee: “Afai o le a faamanuiaina oe o se Pulega Aoao, o le a manaomia ona e musuia. O le a manaomia ona e mauaina faaaliga. O le a ou tuu atu ia te oe se fautuaga se tasi: Alu vave e moe ma ala vave i luga. Afai e te faia, o le a maloloina lou tino ma le mafaufau ma i na itula filemu o le taeao po, o le a e maua ai vaaiga o musumusuga ma malamalamaaga nai lo se isi lava taimi o le aso.”
I le tele o tausaga mulimuli ane, i le mafaufau i lena aafiaga, na saunoa Peresitene Romney i lena taimi: “Talu mai lena aso, ua ou mulimuli i lena fautuaga ma ou te iloa e aoga. Soo se taimi lava ou te maua ai i se faafitauli ogaoga, po o nisi o tofiga o se natura fatufatuai lea ou te faamoemoe e maua ai le uunaiga a le Agaga, ou te maua pea fesoasoani sili i le vaveao nai lo se isi lava taimi o le aso.”1
Ina ua ou faitau muamua i lenei tala, sa ou maofa foi i le fautuaga na tuuina atu e Elder Lee. Ou te le fesootaia lava se faasologa i vaveao i aso taitasi ma se faaaliga. Ae ui i lea, ua ou iloa nei o loo i ai se faamaopoopoga tuusao. Ua ou iloa foi o faatinoga e masani ona fesootai ma le mauaina o faaaliga e pei o le tatalo, suesue i tusitusiga paia, anapogi, auai i le malumalu, ma le auauna atu ua matua faateleina pe a vave ona ou moe ma ala vave i luga.
Faataitaiga mai Tusitusiga Paia
O alii ma tamaitai musuia o vaitausaga uma ua mulimuli i lenei fautuaga paia e uiga i le moe. “Ua alu usu Aperaamo i le taeao i le mea sa tu ai o ia i luma o Ieova” (Kenese 19:27; faaopoopo le faamamafa). “Ua tulai foi Mose i le taeao lava, ua alu ae i le mauga o Sinai, faapei ona fetalai mai ai o Ieova ia te ia, ua ave foi i lona lima o papa maa e lua” (Esoto 34:4; faaopoopo le faamamafa). “Ona tulai lea o Iosua i le taeao lava, ua avae foi e faitaulaga le atolaau a Ieova” (Iosua 6:12; faaopoopo le faamamafa).
Na faapefea ona amata e le Alii Ona aso i le taimi o Lana auaunaga faaletino? Na tusia e Mareko, “O le taeao ua ala po o ia, ona ulufafo lea o ia ma maliu atu i le mea tuufua, ma tatalo ai” (Mareko 1:35). O Maria, o se soo tuuto, na mulimuli i Ana faataitaiga ma i le faia o lena mea na aoaoina ai i tatou i se lesona mamana: “O le uluai aso o le vaisapati i le taeao, a o pouliuli lava, ua alu ane ai Maria le Makatala, i le tuugamau” (Ioane 20:1). I le taeao po, sa avea o ia ma tagata muamua e vaai i le Alii toetu.
Faamanuiaga o le Ala Po
E faaaoga foi e taitai maoae i o tatou aso ia itula o le taeao po e maua ai faaaliga. O nisi taimi ua mavae, sa ou faalogo ai i se tasi o le Korama Muamua a Fitugafulu o ta‘ua i se saunoaga i le konafesi faalesiteki e faapea o ia o se tagata alapo. Ina ua maea le sauniga, sa ou talanoa atu ia te ia mo sina taimi e uiga i lana faiga o le taeao po, ona fesili atu lea pe toafia Au Peresitene Sili ma Korama a le Toasefululua e tausia se faatulagaga talitutusa. Sa ia tali mai, “Latou te faia uma!” Sa avea o se taimi mamana, ma na molimau mai le Agaga ia te au o le vave ona moe ma le vave ona ala e mafai ona fesootai moni i le mauaina o faaaliga.
Ua tautino nisi faamanuiaga faaopoopo ia i latou o e mulimuli i fautuaga a le Alii e uiga i le moe. Mafaufau i nei folafolaga ofoofogia: “Tuu le moe umi atu nai lo le mea e tatau ai; vave momoe ina ia outou le vaivai; alapo a’e, ina ia olaola o outou tino ma o outou mafaufau” (MF&F 88:124; faaopoopo le faamamafa). O le Faaolaola o lona uiga “ia faatumulia i le ola ma le malosi.”
Na fautua mai le aoao anamua o Aristotle i isi faamanuiaga ia i latou o e tausia se faasologa o [mea fai] i le taeao po: “E lelei ona ala i luga a o lei oo i le taeao, aua o sea aga masani e saofaga i le soifua maloloina, tamaoaiga ma le poto.”2 O le uluai tamalii o Benjamin Franklin na mulimuli ane tuu lena manatu i lona manatu lauiloa: “O le vave ona moe ma le vave ona ala, e maua ai e se tagata le malosi, tamaoaiga, ma le atamai.”3 O le tele lava o tagata e tuu le soifua maloloina, tamaoaiga, ma le poto i le pito i luga o mea e sili ona manaomia i le olaga.
Soifua Maloloina
O le averesi o le matutua o se ofisa pule sili i Amerika o le 55 tausaga le matua.4 Pe faateia ai oe i le iloa o se Pule Sili o se faalapotopotoga faavaomalo o se tamaloa e 97 tausaga le matua? Ae faapefea pe afai e te aoaoina foi o loo ia faimalaga i le lalolagi e tuuina atu lauga, aoaoga mo taitai, fonotaga ma taitai o le malo, ma o loo faatalanoaina e faalapotopotoga tau faasalalauga tetele i lenei matua tele? Ae faapefea pe afai o ona Sui Peresitene e toalua e matua malolosi lava o le 79 ma le 87-tausaga le matutua? Ma o le tulaga tonu lena i le faaiuga o le taitaiga a Peresitene Gordon B. Hinckley (1910–2008) o le Peresitene o le Ekalesia. E foliga mai o se faasologa o le taeao po, a o le’i avea ai e na o le tagata o loo saofaga atu, o se tasi o mea moni e taitai atu i le loa o soifua o taitai o le Ekalesia.
Na fautua mai le Peresitene muamua o le Iunivesite o Polika Iaga o Ernest L. Wilkinson o le tausiaina o se faasologa o le taeao o se fesootaiga ma manuia tau le soifua maloloina. E faatatau ia Peresitene David O. McKay (1873–1970), Peresitene o le Ekalesia i lea taimi, sa ia faapea mai: “O se tasi o mafuaaga maoae, ou te mautinoa, i le mafuaaga ua soifua ai Peresitene McKay i le matua o se lelei, matua, ma le malosi ua avea lea ma mea moni e faapea ao avea o se alii talavou sa ia atiina ae uiga masani o le vave ona moe, usupo, e masani lava a o lei oso le la, pe a manino lona mafaufau ma malosi lona tino e faia galuega o le aso.”5
Na faia foi ni sootaga i le va o le tausia o se faasologa o le vave amata ma soifua maloloina faalemafaufau ma faalelagona. Ua saunoa mai Elder Russell M. Nelson o le Korama a Aposetolo e Toasefululua, “Ia i latou ua oo i ai le lagona toilalo ma le vaivai, tagai i le tafa mai o ata i le taeao mo so outou sulufaiga.”6
Poto
O le fesootaiga o mamanu o le moe ma le poto e le na o se manatu. O se suesuega na faia e le au suesue i le setete o le Iunivesite o Polika Iaga: “O tamaiti aoga e masani i le tuai ona momoe ma e momoe umi i le aso e sosoo ai e maualalo togi averesi (GPAs) nai lo tamaiti aoga e i ai le mausa o le vave ona momoe ma vave ona feala. O le umi ona momoe o tamaiti i le taeao, o le maualalo foi lea o o latou togi. Mai i mea moni uma ua suesueina, o taimi e feala ai i aso o le vaiaso ma le faaiuga o le vaiaso na i ai le sootaga malosi atu i togi [GPAs] a tamaiti aoga. O itula taitasi i luga o le averesi e moe umi ai tamaiti aoga i aso o le vaiaso na fesootai ma se pau o le 0.13 i le togi [GPA] (0.0–4.0 fua).”7
E lei leva atu sa ou iloiloina ai tamaiti aoga o le kolisi a le Au Paia o Aso e Gata Ai e uiga i o latou mamanu o le moe. O le averesi o nei tamaiti aoga e feala mai i le 7:30 i le taeao i aso o le aoga ma le 9:15 i le taeao i le faaiuga o vaiaso. O o latou taimi e momoe ai o le vaeluapo i po o le aoga ma le 1:00 i le taeao i le faaiuga o vaiaso. O nei tamaiti aoga o loo agai tonu e faasagatau ma fesootaiga tau le suesuega i le faasologa o le vave ona amata ma le mauaina o le malamalama. Atonu o le iloaina o se togi [GPA] maualuga atu o le taunuuga o se faasologa o le vave ona amata ua faigofie tele ona talitonu i ai. Pe ua tatou avea ea e faapei o le fanauga a Isaraelu, o e sa mumusu e mulimuli i le tali a le Alii mo gatafeai “ona o lona faigofie tele”? (1 Nifae 17:41; tagai foi i le Helamana 8:14–15).
Mafaufau i le fautuaga a Peresitene Boyd K. Packer, Peresitene o le Korama a Aposetolo e Toasefululua, na tuuina mai e faatatau i le mauaina o le poto: “Ou te fautua atu i a tatou fanau e fai a latou suesuega taua i itula o le taeao po o le taeao a o fou ma mataalia i latou, nai lo le falo ma le vaivai faaletino ma le le lavā faalemafaufau i le po. Sa ou aoaoina le mana o le manatu, ‘Vave ona moe, vave ona ala.’”8 Atonu o se tasi lea o mafuaaga e mulimuli ai faifeautalai faamisiona i le faasologa o le vave-ona-moe ma le vave-ona ala.
Isi Faamanuiaga
A o tusitusi faatasi ma lona faletua, o Barbara, o Elder Joe J. Christensen, o se uso malolo faamamaluina o le Fitugafulu, na fautuaina atu ni faamanuiaga e sili atu ia i latou o e mulimuli i le fautuaga a le Alii e uiga i le moe: “E tatau ona i ai se mafuaaga e sili ona lelei mo le poloaiga e vave ona moe ma vave ona ala i luga [tagai MF&F 88:124]. … O le lalolagi o se nofoaga e sili atu ona matagofie i le taeao po. E sili atu ona toafilemu le olaga. E mafai ona tele atu isi mea e mafai ona ausia i se aofaiga puupuu o le taimi.”9 I le taimi o se saunoaga i se faeasaite i le Iunivesite o Polika Iaga, na saunoa faaopoopo mai ai Elder Christensen: “O nisi o outou e le o maua le malolo e tou te manaomia. O nisi ua masani i le tuai ona moe ma le moe umi atu nai le mea e manaomia e le tino, lea e misia ai nisi o uunaiga faaletagata lava ia e mafai ona e mauaina.”10
Na faaopoopo mai e Peresitene Hinckley le folafolaga i le usiusitai: “Afai e te alu e moe i le 10:00 ma ala a’e i luga i le 6:00 i le taeao, o le a lelei mea uma mo oe.”11
O le mulimuli i le fautuaga a le Alii e uiga i le moe e ono foliga mai o se mea itiiti, peitai “e mafai e le Alii ona faataunuu mea tetele i ala faatauvaa” (1 Nifae 16:29). E i ai sau molimau o le mulimuli i se faasologa o le vave ona amata e aumaia ai le tele o faamanuiaga i o tatou olaga, e aofia ai faaaliga. E ofoofogia le tele o mea e sili atu ona ou ausia i se aso pe a ou vave moe ma vave ona ala i luga. O faamanuiaga o lenei loto pulea e sili atu nai lo le taumafaiga e manaomia. Pe a tatou manumalo i le taua muamua o le aso e faasaga i le faamalu, o le a sili atu le avanoa e manumalo ai i taua o le aso. O le a sili atu foi ona faatumulia i tatou i le ola ma le malosi.