Galuega Alofa a le AAG: 30 Tausaga o Auaunaga

E le fou le mataupu faavae o le auauna atu i o tatou uso a tagata. I tisipenisione uma, ua tautino atu le Ekalesia e fesoasoani i e matitiva ma lē tagolima.

I le tolusefulu tausaga talu ai, i le aso 27 o Ianuari, 1985, sa faataitaia lena tautinoga i le taimi o se anapogi faapitoa lea sa foai ai e tagata o le Ekalesia le $6 miliona amerika ina ia fesoasoani i tagata na aafia i le oge i Itiopia. O lenei mea na faailogaina ai le amataga o se mea o le a avea ma galuega alofa a le AAG. O lena lava tausaga, o se anapogi ia Novema na maua ai le isi $5 miliona mo le tausiga o e fia aai. Na matua faatelevaveina e na anapogi e lua le galuega i o tatou taimi.

I le 30 tausaga talu mai na anapogi, ua tuuina atu e le Ekalesia le $1.2 piliona i se fesoasoani i tagata o loo mafatia. E aofia ai meaai, fale, sapalai faafomai, lavalava, ma aitema o le toomaga. E le gata i lea, ua ofoina mai e galuega alofa a le AAG se taimi umi o le fesoasoani e ala i taumafaiga e saunia ni nofoa faataavalevale, tui puipui, vai mama, meaai paleni mo aiga, tausiga o mata, ma le tausiga o tina ma pepe faatoa fananau mai. Ua faipaaga le Ekalesia ma isi faalapotopotoga fesoasoani alofa faatuatuaina ina ia faia le mea sili e uiga i foai uma.

Na masani ona aoao mai Peresitene Thomas S. Monson faapea, i le avea ai ma tagata o le Ekalesia, ua ia i tatou se tiutetauave e fesoasoani ai i e fia aai, leai ni fale, ma sauaina. Ua tulai ae tagata o le Ekalesia i le luitau. E aunoa ma le tele o faalauiloaga po o faafetai aloaia, ua latou foai atu ma le filemu le fia miliona o itula o auaunaga ma le fia selau o miliona tala. E le gata i le saofaga atu i le tupe mo fesoasoaniga agaalofa i luga o le lisiti o foai, ua foai atu tagata o le ekalesia i le LDS Philanthropies, auauna atu faamisiona, avea ma uo ma tuaoi lelei, ma ofo atu e galulue i fale o le uelefea po o nuu, ma tuuina atu lo latou taimi ma le alofa i le faitau selau o afe ma afe o faalapotopotoga faatuatuaina i le lotoifale.

A o latou faia, ua amata ona latou faataunuuina le mea na aoao mai e le Faaola e uiga i le tausiga o e matitiva ma e le tagolima:

“Aua na ou fia ‘ai ona outou avane ai lea ni mea ou te ‘ai ai; na ou fia inu, ona outou avane ai lea ni vai ou te inu ai, sa fai a’u ma tagata ese, ona outou talia lea o a’u: …

“Aua na faia e outou i le tasi o e aupito itiiti o ou uso nei … , o au lea na outou faia i ai” (Mataio 25:35, 40).