Ua Saunia mo le Mauaina o le Perisitua Mekisateko?

“O le mea lea, o i latou uma o e e mauaina le perisitua, e mauaina lenei tautoga ma le feagaiga a loʼu Tamā, e lē mafai ona soli e ia” (MF&F 84:40).

Ata na tusia e John Kachik

E le pei o le Perisitua Arona, lea e maua e aunoa ma se tautoga, e mauaina le Perisitua Mekisateko faatasi ai ma se tautoga ua faia e le Tama Faalelagi, ma faatasi ai ma se feagaiga e osia i le va o oe ma Ia. O manatu nei o le a fesoasoani e te malamalama ai i faaupuga autu i le Mataupu Faavae ma Feagaiga 84:33–44, lea na faaali mai ai e le Alii le tautoga ma le feagaiga o le perisitua.

O le a le tautoga na faia e lo tatou Tama Faalelagi?

“O le ola agavaa mo folafolaga o le tautoga ma le feagaiga e aumaia ai le meaalofa sili o meaalofa uma a le Atua: ola e faavavau. O se faamoemoega lena o le Perisitua Mekisateko. O le tausia o feagaiga pe a tatou mauaina le perisitua ma le faafouina i sauniga o le malumalu, ua folafola mai ai ia i tatou i se tautoga na osia e lo tatou Tama Faalelagi, o Elohima, e faapea o le a tatou maua le atoatoaga o Lona mamalu ma ola ai e pei ona soifua ai o Ia.”

Peresitene Henry B. Eyring, Fesoasoani Muamua i le Au Peresitene Sili, “Faatuatua ma le Tautoga ma le Feagaiga o le Perisitua,” Liahona, Me 2008, 61.

O le a lau vaega i le feagaiga?

“O le feagaiga i le vaega o le tagata e faapea o le a ia faalauteleina lona valaauga i le perisitua [tagai MF&F 84:33], ma o le a ola o ia i upu uma e tulei mai le fofoga o le Atua, ma o le a ia tausia poloaiga.”

Peresitene Iosefa Filitia Samita (1876–1972), “Magnifying Our Callings in the Priesthood,” in Conference Report, Ape. 1970, 59.

O le a le uiga o le faafouina o lou tino?

“Ua ou vaaia le faataunuuina o lena folafolaga i lo’u lava olaga faapea ma olaga o isi. Sa auauna se tasi o a’u uo o se peresitene o le misiona. Na ia tau mai ia te au faapea i le faaiuga o aso taitasi a o ia auauna atu sa toetoe a le mafai ona ia oo atu i le fogafale i luga i lona moega i le po ma mafaufau pe na te toe maua le malosi e feagai ai ma le isi aso. Ona oo lea i le taeao, sa ia iloaina le toefuataiina o lona malosi ma lona lototele. Ua e vaaia i olaga o perofeta matutua o e na foliga mai ua faafouina i taimi taitasi uma e tutulai atu ai e molimau atu i le Alii o Iesu Keriso ma le talalelei toefuataiina. O se folafolaga lenei mo i latou o e agai i luma ma le faatuatua i la latou auaunaga i le perisitua.”

Peresitene Henry B. Eyring, “Faatuatua ma le Tautoga ma le Feagaiga o le Perisitua,” Liahona, Me 2008, 62.

O le a le uiga o le taliaina o le Alii?

“O alii o e taliaina ma le agavaa le perisitua, ua talia foi le Alii o Iesu Keriso, ma o i latou o e talia le Alii ua talia le Tama. Ma o i latou o e talia le Tama, e maua mea uma ua i ai ia te Ia. E tafe mai faamanuiaga silisili mai lenei tautoga ma le feagaiga i alii, tamaitai, ma fanau agavaa i le lalolagi atoa.”

Elder Russell M. Nelson o le Korama a Aposetolo e Toasefululua, “Feagaiga,” Liahona, Nov. 2011, 88.

Filifili o Mau: Mauaina o le Alii

O le mauaina o le perisitua o se tasi o auala e maua ai le Alii. Faitau fuaiupu nei e aoao ai le isi lua: Ioane 13:20 ma le Mataupu Faavae ma Feagaiga 112:20.

Pe mafai e tamaitai talavou ona maua foi nei faamanuiaga?

“O faamanuiaga o le perisitua e le faapea e gata ai i na o alii lava. O nei faamanuiaga ua liligiina mai foi i o tatou ava ma fanau teine ma tamaitai faamaoni uma o le Ekalesia. O nei tuafafine lelei e mafai ona saunia i latou lava, e ala i le tausia o poloaiga ma le auauna atu i le Ekalesia, mo le faamanuiaga o le aiga o le Alii. Ua ofo mai e le Alii i ona afafine uma faaleagaga e mafai ona maua ia meaalofa ma faamanuiaga e ala i ona atalii. ”

Peresitene Iosefa Filitia Samita (1876–1972), “Faalauteleina o Tatou Valaauga i le Perisitua,” i le Conference Report, Ape. 1970, 59.

O Faamanuiaga Ou Te Maua e ala mai i le Perisitua

A o ou ola i le amiotonu o se afafine o le Atua, e mafai ona ou maua le tele o faamanuiaga e ala i Lana perisitua. E mafai ona ou avea ma se tagata o le Ekalesia a Iesu Keriso, lea na toefuatai mai e ala mai i le perisitua. E mafai ona ou tagofia le faamanatuga lea na faamanuiaina e ala i le mana o le perisitua o Iesu Keriso e toe faafouina a‘u feagaiga, ma fesoasoani ia te au ia salamo atoatoa. Ou te maua le taitaiga patino mai le Tama Faalelagi e ala i faamanuiaga o le perisitua. E mafai ona vaetofia au i lalo o le taitaiga a se tagata o le umiaina ki o le perisitua ma tuuina mai i ai le pule e galue ai i valaauga. E mafai ona ou faaaogaina lena pule e faamanuia ai olaga o isi. E mafai ona ou faia nisi o feagaiga ma le Tama Faalelagi e ala i le mana o le perisitua o loo maua i le malumalu. E mafai ona ou faaipoipo i se alii agavaa e umia le perisitua i le malumalu, ma mafai ona ma tausia faatasi se aiga i le amiotonu. Faatasi ai ma lo‘u aiga e faavavau, e mafai ona ou maua mea uma o i ai i lo’u Tama Faalelagi (tagai i le MF&F 84:38).

Melissa Hart, Iuta, ISA

Lesona i Aso Sa

O Le Autu o le Masina Lenei:

O Sauniga ma Feagaiga

Auai i le Talanoaga

O Mea e Mafaufau Loloto i ai mo le Aso Sa

• E faapefea ona e manatu o le tausia o au feagaiga e saunia ai oe e maua uma mea a lou Tama?

• O le a sou manatu i le eseesega i le va o le “mauaina” o le perisitua (MF&F 84:33) ma le “taliaina” o le perisitua (tagai i le i le fuaiupu 35)?

• E mafai faapefea e aoaoga o loo i le Mataupu Faavae ma Feagaiga 98:11–12 ona fesoasoani ia te oe e “ola i afioga uma… o le Atua” (MF&F 84:44)?

O Mea E Te Ono Faia

• Saili ia agavaa mo le Agaga Paia. O le a fesoasoani musumusuga e te malamalama atili ai i le aoaoga faavae o le perisitua.

• Tauloto le tautoga ma le feagaiga o le perisitua, o loo maua i le Mataupu Faavae ma Feagaiga 84:33–44.

• Ma le agaga tatalo ia suesueina mau faaopoopo e uiga i le perisitua, e pei o le Alema 13 ma le Mataupu Faavae ma Feagaiga 13; 20; 107; 121.

• Mauaina o Mea Uma o I Ai i Le Tama: O Se Faataoto i Ona Po Nei

  Carlos E. Asay