Seia Tatou Toe Feiloai
O Tamai Mamoe ma Leoleo Mamoe
Sa fefe si au uo laitiiti i le afa, ma sa mafai ona ou lagonaina lana tagi mai.
Ata na pueina e Suren Manvelyan/Thinkstock
Ao o’u itiiti lava, sa maua ai e lou tama se tamai mamoe ua se i le toafa. O le lafu mamoe e i ai le tina o lenei tamai mamoe ua o ese, ma o lea na se ese mai ai loa le tamai mamoe lea mai lona tina ma sa leiloa foi e le leoleo mamoe ua leiloa. Talu ai o le a le mafai ona ola lenei tamai mamoe i le toafa, o lea na aumai ai loa e lo’u tama i lo matou aiga. O le tuu ai o le tamai mamoe i le toafa o lona uiga o le a tele se avanoa e mate ai, a le faatamaiaina e luko po o le fia ’ai foi aua e manaomia le suasusu ona e laitiiti tele. E ta‘ua e nisi o leoleo mamoe nei tamai mamoe o “[mamoe] tafaovale.” Na tuuina mai ia te au e lo’u tama le tamai mamoe ma avea ai au ma ona leoleo mamoe.
Mo ni nai vaiaso, sa ou faamafanafanaina ai le susu povi i totonu o le fagususu ma fafaga ai le tamai mamoe. Sa vave ona avea i maua o se uo. Sa ou faaigoaina ia Nigh—ou te leiloaina pe aisea. Sa amata ona tupu. Ma te taaalo lava ma la’u tamai mamoe i luga o le mutia. O nisi taimi e ma te taooto faatasi ai i luga o le mutia ma ou aluga ai i luga o lona tino taufulufulua ma vaavaai i le vanimonimo lanu moana ma ao mafiafia papae. Ou te le lokaina la’u tamai mamoe i le ao. E le mafai ona sola ese. Sa vave ona iloa ona ’ai le mutia. Na mafai ona ou valaauina la‘u tamai mamoe mai soo se vaega o le matou fanua i lo’u faataitaiina lea o le tagi a le mamoe i le lelei ou te mafaia: Baa. Baa.
O se tasi po na agi ai se afa matautia. Sa galo ia te au ona tuu la‘u tamai mamoe i totonu o le pa, o se mea sa tatau ona ou faia. Sa ou alu i lou moega. Sa fefe si au uo i le tetele o le afa ma sa ou lagonaina lona tagi mai. Sa ou iloa sa tatau ona ou fesoasoani i la‘u fagafao, ae sa ou manao foi au ia ou te saogalemu, mafanafana, ma mago i luga o lo’u moega. Ou te le’i nofo i luga e pei ona sa tatau ona ou faia. Ina ua malama le taeao, sa ou alu atu ai i fafo ma ou iloaina lau tamai mamoe ua pe. Na faalogoina foi e se taifau lana tagi mai ma alu atu loa ma faaumatia o ia. Sa ou matuai faanoanoa lava. Sa le avea au o se leoleo mamoe lelei poo se taitai e faatuatuaina e lou tama. Sa faapea mai lo’u tama, “Atalii, pe le mafai ea ona ou faatuatuaina oe e tausi nao se tamai mamoe e tasi?” Sa sili atu ona tiga faamatalaga a lou tama ia te au nai lo le toesea o si au uo taufulufulua. Sa ou tautino ai lava i lea aso ao ou laitiiti, o le a ou taumafai e aua lava nei ou toe faatamala i lou tiute o se leoleo mamoe pe afai ae toe tuuina mai ia te au lena tofiga. …
Ua silia nei ma le onosefulu tausaga, o loo mafai pea ona ou lagonaina i lo’u mafaufau le tagi mai i le fefe o la’u tamai mamoe lea sa ou le’i leoleoina lelei a’o ou laitiiti. O loo mafai foi ona ou lagonaina pea upu alofa a lo’u tama: “Atalii, pe le mafai ea ona ou faatuatuaina oe e tausia nao se mamoe e tasi?” Pe afai o i tatou e le o ni leoleo mamoe lelei, ou te fia iloa pe o le a se tatou faalogona i le faavavau.
Mai ia James E. Faust, “Tiutetauave o Leoleo Mamoe,” Liahona, Iulai, 1995, 52, 54.