Saunia e Ulufale Atui le Maota o le Alii
Saunia e Elder Kent F. Richards
O Le Fitugafulu ma Le Faatonu Sili o le Matagaluega o Malumalu
Ataata pe a e mafaufau i le malumalu. O se nofoaga o le mana ma faamanuiaga.
I se fale tatala o le malumalu, sa ou matauina ai le mulimuli ai o nisi o teineiti i tua o o latou matua i le malumalu. Sa latou ataata a o latou iloa atu o latou ata i faata o le potu mo tamaitai faaipoipo. “Manatua,” le musumusu atu lea a lo latou tinamatua, “oka se tou faapitoa ma le tele o le alofa o le Tama Faalelagi ia te outou.” Na vaai faalemafaufau tamaitai taitasi i le taimi o le a ia toe foi mai ai i le malumalu o se tamaitai o le faatuatua, ma le tuputupu ae o le lalelei ma le gafatia, e sauni e faataunuu lana misiona i le lalolagi. Na maua foi e tama o e sa auai i le fale tatala se vaaiga i o latou tiutetauave ma faamanuiaga o le lumanai.
O mea sa lagonaina e nei tamaiti i le malumalu sa sa‘o. E finagalo le Tama Faalelagi e faamanuia oe. E oo mai ana faamanuiaga silisili a o e ulu atu i le malumalu e maua sauniga paia ma ia osia ma tausia feagaiga paia. E nafa oe ma le tapenaga ma ia saunia.
O le malumalu e taua i lou olaga, ae maise lava pe afai o e talavou: “E manaomia e le taulealea lona tulaga i le malumalu e sili atu nai lo lona tama ma lona tama matua, o e ua mausali e ala i se olaga o aafiaga; ma le teineitiiti faatoa ulufale i le olaga, e manaomia le agaga, uunaiga ma le taitaiga e maua mai i le auai i sauniga o le malumalu.”1 Amata nei ona saunia lou loto ma le mafaufau ina ia mafai ona atoatoa le mauaina ma le malamalama i nei faamanuiaga (tagai i le Mataio 13:23; Mareko 4:20).
O le Mauaina o le Atoaga o le Talalelei
Afai o le a e saunia oe lava e ulu atu i le malumalu, o le a e “saunia ina ia maua le atoatoaga o [Lana] talalelei” i le malumalu (MF&F 35:12; faaopoopo le faamamafa). O le malumalu o se nofoaga o le mana ma faamanuiaga. Na faatonuina e le Alii le Perofeta o Iosefa Samita ma le Au Paia anamua e faapotopoto i Katelani, Ohaio, ISA, lea o le a latou fausia ai se malumalu i se taimi mulimuli. “Ma o iina o le a faaeeina ai outou i le mana mai luga” (MF&F 38:32; faaopoopo le faamamafa).
I se faletatala o le malumalu talu ai nei, na faapotopoto ai e se Aposetolo lona aiga i autafa o le fata faitaulaga paia i se potu mo faamauga. Sa ia aoao atu ia te i latou e faapea o mea uma tatou te faia i le Ekalesia—o vasega, gaoioiga, polokalama, ma sauniga—e saunia ai i tatou e o mai i le fata faitaulaga o le malumalu mo le mauaina o sauniga o le faamauga. Ua suitulaga le malumalu i le ute moni o le fuafuaga a lo outou Tama Faalelagi mo lo outou fiafia e faavavau ma le alualu i luma.
Saunia e Osi Feagaiga ma le Atua
O au sauniuniga e ulu atu i le malumalu ma osia feagaiga e le vave ona tupu. E amata i lou papatisoga ma le meaalofa faamau o le Agaga Paia ma tuputupu ae lea i le tatalo, suesue i tusitusiga paia, usiusitai, ma le auauna atu. O loo valaaulia ai le mama faalevaiaso a o e auai i le faamanatuga. E tupu a o e aoao e saili le faamagaloga e ala i le salamo, pe a e tausia tulaga faatonuina, ma a o e tauave ma le agavaa se pepa faataga o le malumalu e faatapulaa le faaaogaina. O le a fesoasoani polokalama a le autalavou ia te oe, ae o au sauniuniga e patino; o loo e atiina ae lou agavaa, lau molimau, lou liua. O Le Togiola a le Faaola e faatatau ia te oe lava ia.
A o e faateleina lou tulaga o le matua faaleagaga, o le a e manao e sauniuni ma ulu atu i le malumalu. O iina o le a e maua ai sauniga ma osia feagaiga, o laasaga ia e manaomia e faalatalata atili atu ai i lou Tama Faalelagi. O sauniga o le malumalu e “sili ona faaeaina … i sauniga uma ua faaalia mai i tagata.”2
A o e mauaina sauniga o le malumalu, e te faia ni feagaiga paia faatasi ma lou Tama e na o le faatasi mo oe lava ia, ona e taumafai lea e usitai i ai i lou olaga atoa. O taimi uma lava e te ulu atu ai i le malumalu, e mafai ona e lagonaina Lona Agaga ma maua faaaliga faaopoopo ma le malamalama a o tuuina atu sauniga e tatau ai mo isi. O le a e malamalama ma maua le faamautinoaga o lou olaga e faavavau ma le mana e le iu o au feagaiga. Pe ana faapea e le o i tatou o ni tagata e faavavau, o le a leai se taua o le malumalu. E te ulu atu i le malumalu ma osia feagaiga aua o le a e ola faavavau ma e te manao e faatasi ma lou Tama Faalelagi ma lou aiga i le “fiafia e le gata” (Mosaea 2:41). O lenei faamautinoaga e tuputupu ae i lou lava agaga ma faamauina e le Agaga Paia.
O Le Ola Agavaa
O le matafaioi a le Agaga Paia e moni. Na te aoao oe, faamamaina oe, ma faaalia le alofa o le Tama (tagai i le Roma 5:5). O le Agaga Paia o Folafolaga o le mana faamau o le Agaga Paia, lea e faamaonia feagaiga taitasi i le faavavau.
Ina ia maua le Agaga, e tatau ona e mama ma le pona e ulu atu i le malumalu, e aunoa ma soo se solitulafono e le’i faamagaloina. Afai e mafai ona faamanuiaina le fili i soo se auala e faatoilalo ai oe, e faia ina ia taofia ai oe mai le malumalu pe faaosooso oe e alu ma le le agavaa iina.
Mo lenei mafuaaga, o le a valaaulia ai oe e nofo i se faatalanoaga patino ma lou epikopo po o le peresitene o le paranesi, e mafaufau ai i lou agavaa ma le saunia ina ia maua se pepa faataga e ulu atu ai i le malumalu. Ia faamaoni ma faalagolago ia te ia e fesoasoani ia te oe. O le mea moni, o loo e fuafuaina lou lava tulaga i luma o le Alii (tagai i le MF&F 109:24). O le a e sainia muamua lau oe lava pepa faataga. Ua e molimauina lou agavaa i luma o le Alii.3
Ina ia agavaa e le faapea ua e atoatoa. O lona uiga ua sa‘o lou loto, o loo e ola i poloaiga, ma e te manao ia sili atu ona lelei i aso taitasi.
Aoao mai Faailoga
I le malumalu, e pei o tusitusiga paia, e aoao mai le Alii i le faaaogaina o faailoga. E mafai ona e maua le tele o faailoga i tusitusiga paia, e pei o le papa, o le fatu, o le fua, o le laau o le ola, ma le falaoa ma le vai o le faamanatuga (tagai, mo se faataitaiga, 1 Nifae 11; Alema 32; Helamana 5:12). O le papatisoga i le faatofuina e faatusa i se olaga fou, le toe fanauina ma le mama (tagai i le Roma 6:3–5). I totonu o le malumalu e fai uma o tatou laei papae, e faatusaina i le mama, paia, malamalama, ma le laugatasia.
O nisi o faatusa i le malumalu e faaletino ma toe faaleagaga. Mo se faataitaiga, o le ofuina o le ofusa o se faamanatu faaletino i aso taitasi o feagaiga o le malumalu ma faamanuiaga folafolaina. Afai ae faaaloalogia ma faamamaluina, e puipuia e le ofusa i tatou mai faaosoosoga ma uunaiga le tonu.
O sauniga taitasi o le malumalu e faafaatusa. “I se sauniga paia, e mafai ona mulumuluina ma faauuina se tagata,”4 manatuaga o tupu ma ositaulaga o Isaraelu anamua o le saunia ai e tauave o latou tofiga (tagai i le 1 Samuelu 10:1; 16:13). O aoaoga ma feagaiga i le faaeega paia e faailoa mai ai le faaofuina po o le tuuina atu o mana faaopoopo ma folafolaga mai le Atua (tagai i le Luka 24:49). Atonu o le faailoga sili ona matagofie o le sauniga o le faamauga, lea e tuufaatasi ai se ulugalii i se sootaga le mamotusiaina lea e mafai ona tumau e oo i le faavavau atoa.
O folafolaga i totonu o le malumalu e faamauoaina ma tamalii. O le “agalelei tetele” ma “faamanuiaga silisili” (3 Nifae 10:18) ua faapolopolo e lo tatou Tama mo oe lava ia. O lea ia ataata pe a e mafaufau i le malumalu.
E tusa lava pe fia ou tausaga, ia fai soo se mea e tatau ai ina ia saunia mo le mauaina o faamanuiaga silisili ua ofoina mai e lou Tama oi le Lagi ia te oe. Faalagolago i le lagona a o avea ma se tamaitiiti ma pese le, “Ou te fia vaai i le malumalu. Ou te ulu i ai i se aso. … O le a ou saunia nei. O lo‘u tiute lea.”5 E mafai ona moni mo oe.
Ata pue o le Malumalu o Rexburg Idaho saunia
O FAAMALAMA TIOATA TEUTEU, MALUMALU O LAIE HAWAII