Sailia o se Auala e Faamagalo Atu Ai
E alala le tusitala i Iuta, ISA.
Tatou te aafia uma i se tulaga lea pe a faia ai e se tasi se mea ua tatou tiga ai. O nisi taimi e lagona le le mafai ona aveese le tiga. Ae e tusa lava pe ua matua loloto le tiga, na aoaoina i tatou e le Faaola e faamagalo atu i tagata uma. E mafai ona avea le faamagaloga ma se galuega faigata, ae a faia mea e latalata atili atu ai i tatou ia Keriso, e mafai ona tatou mauaina le filemu e tuuina mai e le faamagaloga. I lalo, o loo faasoa mai ai e ni tamaitai talavou se toalua o laua aafiaga i le faamagalo atu i isi.
Faamagalo atu se Uo
Ina ua siitia atu Renee* i se aoga fou i Peleseuma, sa fiafia o ia e faia ni uo fou. Ona faia lea e se tasi o uo se mea na faafaigata ai. O le faamalamalamaga lea a Renee:
“O la‘u uo o Nola na fatuina se faitotoa o le Tusifoliga e faaaoga ai le igoa o se isi uo, o Kate. Sa amata ona ia faatiga i tagata e faaaoga ai lena talaaga otooto, ma sa tuuaia e tagata uma Katie i le avea ma tagata faatiga. Na taufaalili mai foi Nola ia te au i le aoga, ma faifai mai i lau tapuaiga ma o’u uiga. Sa ou taumafai e aloese mai nei osofaiga ae sa ou le mafaia, o lea sa amata ai ona ou pipii atu i isi tagata.
“Ina ua tautino mai Nola e uiga i le talaaga otooto e le moni, sa feita tagata uma ia te ia. Na tuu mai e Nola ia te au se tusi o le faatoesega, ae na ou manatu ou te le mafai ona faamagaloina o ia. Sa matuai ou ita lava.
“I se tasi aso sa ou faitau ai i tusitusiga paia, ma na ou tau ai i le Mataupu Faavae ma Feagaiga 64:9–10: ‘O le mea lea, Ou te fai atu ai ia te outou, e tatau ona outou faamagalo i le tasi; ona o ia o le e le faamagalo atu i lona uso i ana agasala, e tu tausalaina o ia i luma o le Alii; aua e tumau ia te ia le agasala tele atu. O Aʼu, o le Alii, Ou te faamagalo i lē o le a Ou faamagaloina, ae o outou ua poloaiina ia faamagalo atu i tagata uma.’
“O le taimi lava lena na ou mafaufau ai ia Nola. Sa ou iloaina e le sa‘o mo au ona lagona le ita tele. Sa ou tatalo ma ole atu i le Tama Faalelagi pe mafai ona Ia fesoasoani mai ia te au e faamagalo atu ia te ia. Sa le faigofie, ae na ou mafaia lava ona fai. Sa amata ona ou auina atu ni savali ia te ia ma fesili atu e uiga i lona aso, ma o nisi taimi ma te talanoa ai i le malologa. Sa ou iloa na maliu le tama o Nola i le fa tausaga talu ai. Sa faigata lona olaga, ma sa manatu o tagata uma e le fiafia ia te ia. Sa ou fiafia sa le tumau lou ita ia te ia. O Kate ma nisi sa le malamalama pe faapefea ona mafai ona ou faamagaloina Nola, ae sa ou iloaina o le mea na ou faia sa sa‘o, ma sa ou iloaina ua mitamita ia te au le Tama Faalelagi.”
O Renee na aoaoina o le Atua ua poloaiina i tatou e faamagalo atu i tagata uma. E ala i le mulimuli i lena poloaiga, sa ia maua ai le agaalofa ma le malamalama mo Nola ma na mafai ai ona faamagaloina atoatoa.
Mauaina o le Filemu i le Maliu o Lo‘u Tuagane
Ina ua maliu le tuagane o Janet i se faalavelave na mafua ona o se avetaavale talavou onā, ma lana pasese, sa ia iloaina sa manaomia ona ia faamamulu ese atu le tiga na ia lagonaina, ae na te le iloa pe faapefea.
“Sa faigata ona iloa le mea aupito sili ona tiga ia te au—lou ita agai atu i nei talavou le mafaufau po o lo‘u faanaunauga faamaoni i lo’u tuagane e toe foi mai. Sa le mafai ona ou tatali le mafaufau i le tele o le gaogao i lou olaga. Ou te manatua le tatalo faatauanau mo se taimi na foliga mai o ni itula. Na pau lou manao ia toe foi mai Nathan.
“Sa ou lagona alofa mo tama na mafua ai le oti o Nathan aua na ou iloa sa latou lagonaina se lagona maoae o le tausalaina. Ae sa ou lagonaina foi le ita ma le inoino. Sa faigofie ona tuuaia i latou. Sa ou faapea i lo‘u mafaufau na ou faamagalo atu i nei alii talavou, ae o le ita sa lolovaia ai ou mafaufauga pe a ou mafaufau ai pea i le faalavelave. E masani ona ou fesili ia te au lava, ‘O le a faapefea ona ou faamagaloina moni lava nei alii talavou, ma o le a faapefea ona ou iloa ua ou faia?’
“Faatoa ou lagonaina mulimuli lava i le uma ai o le faitau selau o tatalo, anapogi faatauanau, ma le tele o suesuega ma mafaufauga loloto ua ou faamagaloina moni lava i latou. Ou te manatua le mafaufau loloto i se tasi aso. Sa ou mafaufau, ‘Ou te faamagalo atu ia te i latou. E mafai faapefea ona ou le faia? O tagata uma e sese, ma o ai a‘u e faamasino ai? O le a ou le foia lava se mea i le taofiofi mamau i ai, o lea o le a ou lafoai ese atu ai.’ O le lagona sa ofoofogia! Sa ou naunau pea lava pea ia iloa ua ou faamagaloina moni lava alii talavou, ma sa oo mai i le taimi sao. E le mafai ona ou suia le mea na tupu ia Nathan, ae e mafai ona ou filifili e tali atu i le faamagaloga ma le alofa nai lo le ita.”
Na aoaoina e Janet e moni lava o le faamagalo atu e mafai ona i ai taimi ma taumafaiga. Na fetalai le Faaola, “Faalatalata mai ia te au, ma o le a ou faalatalata atu ai ia te outou” (MF&F 88:63). Na atili ona latalata atu Janet i le Alii e ala i le anapogi, tatalo, suesue i tusitusiga paia, ma isi taumafaiga. A o tatou faia faapea, o le a mafai ona tatou faatagaina lo tatou ita ma le tiga e suia i lagona o le filemu ma le faamagaloga.
Faatumuina i le Alofa
E pei lava o Janet ma Renee, o le faamagalo atu e fesoasoani ia i tatou e lagona ai le agaalofa, malamalama, ma le onosai. A o tatou faamagalo atu i isi, o le a faatumuina i tatou e le Alii i Lona alofa mama ma o le a avea atili faapei o Ia.