Ou Te Le Faimamago Lava
Joanna Mae Rangga, Saute Leyte, Filipaina
A o avea ai ma se tausaga muamua i le kolisi, sa masani ona ou le fiafia i tamaiti o la‘u vasega. O lena mea ona o le toatele o i latou e faimamago i le taimi o suega. O nisi e nana a latou tusitusiga i totonu o le vasega. O nisi e tesi atu tali i isi. O nisi e kopi mai tali mai i uo i le vasega.
O i latou sa faimamago sa maualuluga atu togi i taimi uma nai lo au. E ui i lea, sa le’i faaosoosoina au e auai atu ia i latou. Ou te tuu pea i lo‘u mafaufau ma le loto, e sili atu le maua o se togi maualalo e tusa ai ma au taumafaiga nai lo le maua o se togi maualuga i se tulaga le faamaoni.
Afai ou te faimamago, ou te le o faia se faataitaiga mo i latou. Ou te le o ola i se auala e mafai ai ona ou faasoa atu le talalelei a Iesu Keriso ia i latou. Ou te le o faaali atu ia i latou e moni le Ekalesia.
I se tasi aoauli sa ou alu i le ofisa o le kesia a le kolisi e fesili i ai e uiga i lau paleni o le pili o loo totoe. Sa manaomia ona ou totogiina uma lau pili a o lei mafai ona ou sue i le suega faaiu i le vaiaso e sosoo ai. A o ou savali, sa ou popole e uiga i le mea o le a ou maua ai le tupe na ou manaomia. Mo se tamaitiiti aoga e faalagolago ia te au lava ia, sa utiuti mea tau tupe.
Ina ua ou taunuu i le ofisa, sa ou fesili atu i le kesia pe fia le mea o loo manaomia ona ou totogiina.
“E te le toe totogia se mea seia oo ina e faauu,” o lana tala lea.
I le faateia, sa ou fesili i ai pe o ia mautinoa po o sana tala taufaalili.
“Ioe, ou te mautinoa, ma e moni lava au,” o lana tala lea. “O le faufautua fesoasoani na faagaoioia se talosaga mo oe e maua ai se sikolasipi mai se senate. Ua avea nei oe ma se sikola.”
O le faalogo atu i na upu na ou matuai fiafia ai lava. Sa ou faafetai atu ia te ia ma tamoe atu i le ofisa o le faufautua fesoasoani e faafetai i le tagata na faia lea mea.
“E te le tau faafetai mai ia te au,” o le tala lea a le faufautua ina ua uma ona ou fai atu i ai i lou faafetai tele ma le fiafia. “Sa na o au o se mea faigaluega.”
Ina ua ou alu ese, na ou manatua le mau ou te fiafia lava i ai e faasoa atu: “Ma amuia lava o ia o le e maua o faamaoni i lou igoa i le aso gataaga, ona o le a sii ae o ia i luga e mau i le malo ua saunia mo ia mai le faavaega o le lalolagi. Faauta foi, o au lava [Iesu Keriso] o le ua tautala atu” (Eteru 4:19).
E ala i le faia o le mea sao, sa ou faaalia lou faamaoni i le tausiaina o poloaiga a lo tatou Tama Faalelagi—e oo lava i se tulaga lea sa masani ai i le le faamaoni. Ou te iloa e ala i le tu mausali i lo‘u faatuatua, Na te le tuua lava au.
Ua ou fiafia ua mafai nei ona ou suesue e aunoa ma ni tupe totogi e popole i ai. Ua uunaia foi au e faaauau pea ona faia le mea sao, e le ona o taui ma faamanuiaga e mafai ona ou mauaina ae ona ou te alofa i le Tama Faalelagi ma Lona Alo, o Iesu Keriso, o le na faia se faataitaiga mo au.