Aisea e tatau ai ona ou faamagaloina se tasi ua mafua ai ona ou tiga?

O le poloaiga ia faamagalo atu i tagata uma o se [poloaiga] e toatele i tatou o loo tauivi ai. Ae na fetalai mai le Alii e tatau ona tatou faamagalo atu ia te i latou po o ua tatou solia le agasala e sili atu (tagai i le MF&F 64:9–11). E ono le fetaui lena mea ia i tatou i le taimi muamua, ae o loo taumafai pea le Alii ina ia fesoasoani ia i tatou ia avea atili e pei o Ia ma maua le olioli sili atu. Afai tatou te tuuina atu a tatou avega ia te Ia ma ia aveese le ita, le le fiafia, ma le tiga, o le a tatou maua le filemu i lenei olaga ma faamanuiaga silisili i le faavavau. E ono manaomia ai sina taimi, loimata, o le anapogi, tatalo, ma fefautuaai ma taitai perisitua, ma asiasiga i le malumalu, ae o le a matua aoga lava.

E pei ona aoao mai e Peresitene Dieter F. Uchtdorf, Fesoasoani Lua i le Au Peresitene Sili:

“E tatau ona tatou lafoai a tatou faitioga. O se vaega o le faamoemoega o le olaga faaletino o le aoao lea pe faapefea ona lafoai na mea. O le ala lena a le Alii.

“Ia manatua, ua faatumulia le lagi ia i latou o loo i ai le tulaga tutusa lenei: Ua faamagaloina i latou. Ma latou te faamagalo atu” (“O Le e Alofa Atu e Alofaina Mai,” Liahona, Me 2012, 77).

Mo nisi faamatalaga e uiga i le faamagalo atu o isi, tagai i le Gordon B. Hinckley, “Faamagaloga,” Liahona, Nov. 2005, 81–84; James E. Faust, “O le Mana Faamalolo o le Faamagaloga,” Liahona, Me 2007, 67–69.