Mataupu Faalelotu & Faalemalo
Saunia e Elder Wilford W. Andersen
O Le Fitugafulu
O mataupu faalelotu ma faalemalo e femalagaa’i i auala eseese ae e agai i le itu e tasi. E sili atu ona faamanuiaina ma sili atu ona aoga i laua pe a la puipuia ma uunaia le tasi ma le isi.
Ata na tusia e David Stoker
O mataupu faalelotu ma faalemalo e pei o se ulugalii e i ai nisi o taimi e faigata ai ona nonofo faatasi ae la te iloaina e le mafai lava ona la nonofo eseese. E manaomia uma e mataupu faalelotu ma faalemalo lo la tutoatasi ina ia olaola, ae ua faaalia mai e le talafaasolopito o le tatalaina maeaea o se faaipoipoga e le maloloina mo [itu] uma e lua. E la te femalagaa’i i auala eseese ae e agai i le itu e tasi. E sili atu ona faamanuiaina ma sili atu ona aoga i laua pe a la puipuia ma uunaia le tasi ma le isi.
O malo e i ai se matafaioi taua i le puipuia ma le faatumauina o le saolotoga o mataupu faalelotu ma i le atiina ae o le matafaioi a ekalesia i le lalolagi. O le mea e lelei ai, o le tele lava o malo i le lalolagi i aso nei ua iloa ni nai tikeri o le saolotoga o mataupu faalelotu ma faamautinoa atu i o latou tagatanuu le aia tatau e tapuai ai ma faatino ai la latou tapuaiga e tusa ai ma le taitaiga o o latou lava lotofuatiaifo. E lei i ai lava i taimi uma le tulaga lena.
Ua vaaia e le tele o augatupulaga le aveesea o le saolotoga lea e iu ai pe a faamalosia e le malo se lotu faaleatunuu. O isi ua aafia i le faatoilaloina o aia tatau lea e sau faatasi ma le taofia faalemalo o mataupu faalelotu uma. Matou te faafetai ona o le tuputupu ae tele o faavae o atunuu i le lalolagi i aso nei ua vaaia faalemafaufau se sosaiete lea e i ai talitonuga ma faatinoga faalelotu, e ui e ese mai le faalemalo, e tatau ona puipuia ma saogalemu mai i sauaga.1
O le malo ua musuia mai le lagi ua faamatalaina i le Tusi a Mamona na mafai ona maua lenei saolotoga o talitonuga ma fatinoga faalelotu i ona tagata:
“O lenei afai ua manao se tagata e auauna i le Atua, o lana aia lea; pe, afai ua talitonu o ia i le Atua o lana lava aia lea e auauna atu ai ia te ia; ae afai e le talitonu o ia ia te ia sa leai se tulafono e faasala ai o ia. …
“Ona sa i ai se tulafono ia faamasinoina tagata e tusa ma a latou solitulafono. E ui i lea, sa leai se tulafono e faasaga i talitonuga o se tagata” (Alema 30:9, 11).
I le avea ai ma tagata o le faatuatua e tatau ona tatou faafetai mo puipuiga faalemalo lea e faatagaina i tatou e opo ma faatino lo tatou talitonuga faalelotu a o tatou mananao ai.
O le Matafaioi Taua o Mataupu Faalelotu
Atonu e itiiti le manino i nisi e faapea o mataupu faalelotu ma le ola mama e i ai se matafaioi taua i le faatumauina ma le siitiaina o le lelei ma le mataalia faalemalo. Pau lava le tali moni i le tele o faafitauli ogaoga e faasaga i lo tatou lalolagi i aso nei o le faaleagaga, e le o le faapolokiki po o le tamaoaiga. Faailoga lanu, sauaga, ma le ita i solitulafono, mo se faataitaiga, o faafitauli faaleagaga, ma na o le pau lava le fofo moni o le faaleagaga. Na aoao mai Elder Dallin H. Oaks o le Korama a Aposetolo e Toasefululua:
“O le tele o le agai i luma o amioga lelei e aupito sili ona taua i le sosaiete i Sisifo ua faaosofia e mataupu faavae faalelotu ma faatosinaina e faaaoga aloaia ona o talaiga i le pulelaa. O faataitaiga e aofia ai le faatamaiaina o le fefaatauaiga o pologa i Egelani ma le Folafolaga o le Saolotoga i [le Iunaite Setete]. E moni foi lena mea i le finauina o Aia Tatau o tagata o le Malo i le afa seneturi ua mavae.”2
E faalagolago sosaiete i vaega tetele i luga o mataupu faalelotu ma ekalesia e atiina ae faatulagaga lelei. E le mafai lava e le malo ona fausia ia lava falepuipui e nonofo ai tagata solitulafono ua fua mai i se sosaiete e le lava tulaga faatonuina, o amioga, ma le faatuatua. O nei uiga e sili atu ona uunaia i le usiusitai i mataupu faalelotu nai lo tulafono faalemalo po o malosiaga faaleoleo. E le mafai e le malo ona pulea ia uiga faaalia, manaoga, ma faamoemoega e puna mai le loto o le tagata. Ae peitai o fatu ia e tutupu ae i totonu o le amio e tatau ona pulea e le malo.
O le tusitalafaasolopito ma le tamalii o Farani o Alexis de Tocqueville na tusia, “E mafai ona pulea Faaletaitai saua e aunoa ma le faatuatua, ae e le mafai e le saolotoga.”3 Ma e oo lava i le pulega faaletaitai saua e le mafai ona faavavau le puleaina e aunoa ma le faatuatua. Aua e pei ona matauina e Boris Yeltsin, o le uluai peresitene o le Malo o Rusia, “E mafai ona e fausia se nofoalii i ni pelu, ae e faigata ona [e] nofo ai i luga.”4
I le Lauga i luga o le Mauga, na faatusatusa ai e Iesu le tulafono ua tusia i le tusi ma le tulafono ua tusia i le loto.
“Ua outou faalogo, na fai mai i e anamua, Aua e te fasioti tagata; ai se fasioti tagata e nofo sala o ia i le faamasinoga:
“A o a’u, ou te fai atu ia te outou, ai se ita fua i lona uso, e nofo sala o ia i le faamasinoga” (Mataio 5:21–22).
E ui o malo e faamalosia le tulafono ua tusia i luga o tusi, e aoaoina ma uunaia e mataupu faalelotu le usitaia o le tulafono ua tusia i le loto. O i latou e usiusitai i le mulimuli e seasea lava solia le [tulafono] muamua. A o tatou faitau i le Mataupu Faavae ma Feagaiga, “O ia o le e tausia tulafono a le Atua e leai se mea e manaomia ai e ia ona soli o tulafono o le laueleele” (58:21).
Ae pe a le amanaiaina mataupu o le loto, o tulafono aloaia ua faavaeina ma tulafono faalemalo o le a iu lava ina le toe mataalia le faagaoioia. O le faaaloalo i le sosaiete e ausia pe a faia e le toatele o tagata mea mama ona ua latou talitonu e tatau ona latou [faia], e le ona ua poloaiina ai i latou e le tulafono po o le malosiaga o leoleo.
E vaavaaia e le malo amio a ona tagatanuu. E na te taumafai ia latou amioa’i i se auala lelei ma mama. O mataupu faalelotu, e taumafai i le isi itu, ia latou mananao ia amioa’i i se auala lelei ma mama. Na aoao mai e Peresitene Ezra Taft Benson (1899–1994), o se sui kapeneta i lalo o le Peresitene o le I.S o Dwight D. Eisenhower, lenei tulaga ese e aupito sili ona taua:
“E galue le Alii mai totonu agai i fafo. O le lalolagi e galue mai i fafo agai i totonu. E mafai e le lalolagi ona aveesea tagata mai faatafunaga. O Keriso e aveesea lagona le taua mai totonu o tagata, ona latou aveeseina lea o i latou lava mai faatafunaga. Atonu e mafai e le lalolagi ona faaliliuina tagata e ala i le suia o lo latou siosiomaga. E suia e Keriso tagata, ona suia ai lea e i latou lo latou siosiomaga. Atonu e mafai e le lalolagi ona suia amioga a tagata, ae e mafai e Keriso ona suia le natura o le tagata.”5
I le aluga o taimi o malo saoloto uma e tatau ona iu ina faalagolago atu i le agalelei o le lotofuatiaifo ma le lagolago o o latou tagatanuu. I le avea ai o se tamalii taualoa ma faafilosofia faalemalo, na faapea mai Edmund Burke, “Ua faauuina i le faavae e faavavau o mea, o tagata o loo i ai mafaufau e le lava le puleaina e le mafai ona faasaolotoina. O o latou tuinanauga ua mamanuina ai o latou maea uamea.”6
Mo lena mafuaaga, o malo lelei e puipuia mataupu faalelotu ma uunaia le saolotoga o tapuaiga faalelotu. Ma o mataupu faalelotu lelei e uunaia ia tagatanuu lelei ma faalogo atu i tulafono o le laueleele.
E le manaomia e malo lelei ona faia le faaituau. E le tatau ona sili atu lona uunaia pe fiafia i le tasi lotu i lo le isi. O ona sui e tatau ona saoloto e talitonu ma faatino e tusa ai ma le taitaiga a o latou lava mafaufau. E ala i lea faailoga e tasi, e le tatau foi i lotu lelei ona faamaonia pe tetee i soo se vaega faapolokiki po o sui auai. Ma o ona tagata talitonu e tatau ona saoloto ma faamalosiauina foi e auai i le faagasologa faaupufai ma lagolago po o le fea o pati po o tagata latou te manatu e sili ona lelei.
Fai ia Lagona Lou Leo
A o le Ekalesia, i le avea ai ma faalapotopotoga, ua faafia ona faamautu mai lona tutoatasi faapolokiki, e fautuaina le Au Paia ina ia auai i le faagasologa faaupufai ma faaopoopo atu o latou leo i talanoaga lautele. O se vaega o la tatou tapuaiga le avea ai ma tagatanuu lelei po o fea lava tatou te nonofo ai.
Tusitaulima 2: Taitaiina o le Ekalesia e faapea, “E tusa ai ma tulafono a o latou malo, e fautuaina tagata o le ekalesia ina ia lesitala e palota, ia suesue maeaea i mataupu ma sui tauva, ma ia palota mo tagata ua latou talitonu o le a galulue ma le amiosa’o ma le faautautaga poto. Ua i ai i le Au Paia o Aso e Gata Ai se matafaioi faapitoa e saili, palota, ma lagolagoina taitai o e faamaoni, lelei ma faautauta (tagai i le MF&F 98:10).”7
O le a i ai se aso o le a toe afio mai ai le Faaola. O Lana aia tatau e pule ai ma nofotupu i le avea ai ma Tupu o tupu ma lo tatou Faitaulaga Sili silisili. Ona tuufaatasia lea o le puleaga aoao faalemalo ma le mana o le perisitua e avea ma [pulega] e tasi.
Seia oo i lena aso tele, e tatau i mataupu faalelotu ma faalemalo ona savavali faatasi i lalo o le ala o le talafaasolopito o tagata—e taitoatasi ma faaaloalo i le tutoatasi o le tasi, ma talisapaia le saofaga taua o le tasi ma le isi.