Na Fetalai Mai e Le Alii le Filemu ia te Au
Trisha Tomkinson Riggs, Arisona, ISA
Sa ma’i le ma tama teine o Carlie mo ni nai aso, ma sa ou manatu e pau lava le mea sa fulu o ia. Ae a o faagasolo ina tigaina o ia, na amata ona ou mafaufau atonu e sili atu ona ogaoga.
Sa faamaonia ma faateleina lou fefe i ana taimi faatulagaina ma le fomai—sa maua Carlie i le ituaiga 1 o le ma’i suka. Ua o‘o atu o ia i se koma o le mai suka ma na manaomia ona avatu faatopetope i le falemai. Sa ou tatalo i lo‘u loto o le a ou to’a ma o le a mafai ona fesoasoani fomai ia te ia.
Ina ua ma taunuu i le potu mo faalavelave faafuasei, sa vave ona galulue fomai ma tausi mai e taumafai e laveai o ia. Sa ou aioi atu i lou Tama Faalelagi mo le faamafanafanaga ma le filemu.
I se taimi filemu, na tuuina atu e lou toalua ma lona tama ia Carlie se faamanuiaga faaleperisitua. I lana faamanuiaga, na faamautinoa atu e lou toalua ia te ia o le finagalo o lona Tama Faalelagi ia ola o ia. Sa amata ona ou lagonaina le filemu.
Ina ua mavae ni nai itula i le matamata atu i fomai a o tui, suesue, ma siaki Carlie mo le faaleleia atili, sa ou lagona le vaivai. Na itiiti ifo le pisi o lona potu i le 1:00 i le vaveao. Sa ou le iloa le mea e faamoemoeina, sa le mafai ona ou moe, ma na ou lagona le tuuatoatasi.
Sa ou toso mai i fafo se kopi o le Tusi a Mamona na aumai e lou uso i le falemai ma tatalo ina ia auina mai e tusitusiga paia ia te au le faamautinoaga na ou manaomia. Na matala le tusi i le Alema 36:3. A o ou faitauina, sa ou lagonaina sa fetalai mai le Alii ia te au: “Ua ou iloa o ai lava e tuu atu lo latou faalagolago i le Atua e lagolagoina i o latou tofotofoga, ma o latou faalavelave, ma o latou puapuaga, ma o le a sii ae i latou i luga i le aso gataaga.”
Mo le taimi lona lua i lena po, sa ou lagonaina le filemu. Sa ou iloa sa silafia i matou e le Tama Faalelagi. Sa manao o Ia ia ou iloa o loo i ai o Ia iina ma e manaomia ia ou maua le faatuatua ia te Ia.
Pe a ou mafaufau i mea na tutupu o le aso, sa ou mafaufau i le auala na faamanuiaina ai i matou e le Alii. Sa ou lagonaina se naunautai e ave Carlie i le fomai. Sa taunuu atu i le falemai ma le saogalemu. Sa taunuu vave e na umia le perisitua e tuuina atu se faamanuiaga.
Talu mai lena aso sa fai ma mea masani le siakiina o le suka ma tausia le i ai o meaai mama. Ua matou aoaoina le auala e mafai ai ona aafia le tino i le puleaina o le suka. O loo faaauau pea le avea o le faama‘i a Carlie ma luitau, ae ua matou aoao e faalagolago i lo tatou Tama Faalelagi i aso uma.
O le aso lena i le falemai o se aso ou te le manao e toe oo i ai, ae o se aso o le a faavavau pea ona ou faafetai i ai. O se aso o le aoaoga, o le faaaogaina o le faatuatua, o le lagonaina o le loto faafetai. Sa ou aoaoina e nofouta le Tama Faalelagi i Ana fanau taitoatasi ma o le a Ia lagolagoina moni lava i tatou i o tatou tofotofoga.