Ia Filemu
Saunia e Elder D. Todd Christofferson
O le Korama a Aposetolo e Toasefululua
Ou te faamoemoe o le a e faaaluina se taimi o lenei vaitau o le Kerisimasi e nonofo ai mo sina taimi filemu ma ia tuu atu i le Agaga o le Faaola e faamafanafana oe ma faamautinoa atu ia te oe e uiga i le aoga o lau auaunaga, o lau taulaga, ma lou olaga.
Faamatalaga mai le Keriso o loo Faamaloloina le Tauaso, saunia e Domenico Fiasella, mai faaaloaloga a John ma Mable Ringling Museum of Art;taumatau: Le Po Paia, saunia e Carl Heinrich Bloch
E masani foi ona faamalosiau ia te au le mafaufau i le ofoina atu o le auaunaga ma le ositaulaga o Le Au Paia o Aso e Gata Ai e faia i o latou aiga, i o latou uarota, ma lo latou Tama Faalelagi. O se mea ua faapaiaina, ma paia. Ou te le talitonu o loo i ai se mamalu e maualuga atu o le a mafai ona oo mai ia i tatou nai lo o le Alii o le a mafaufau i la tatou taulaga e taua ma le talafeagai, ma o le a Ia faaaloalogia ma taliaina.
O lona uiga o le faamalo tele o le Tama i le Alo ina ua Ia faasino atu ia te Ia o “lo‘u Atalii Pele, o le ua ou fiafia lava i ai” (3 Nifae 11:7; tagai foi Mataio 3:17; Mareko 1:11; Luka 9:35; MF&F 93:15; Iosefa Samita—Talafaasolopito 1:17). Oka se faalaniga matagofie. O le a se isi faamamaluina e sili atu nai lo le faapea mai o le Atua ia te oe, “O Lo‘u atalii pele” po o “O Lo’u afafine pele,” ma o le a e mauaina Lana faamalo o lau taulaga ua taliaina e Ia, “o le ua ou fiafia lava i ai.”
Ou te tatalo i lenei vaitau o le Kerisimasi o le a mafai ona i ai ni ou lagona o le silasila o le Alii i lau taulaga, o ni lagona o le auala e te tu ai i Lana silafaga, o ni lagona o lou tulaga o se pele i le avea ai ma Sona atalii po o Sona afafine. Ma ou te tatalo o le malamalama i lena tulaga e mafai ona tuuina atu ia te oe se faamafanafanaga tele, faamautinoaga, ma le mautinoa ua faamaonia oe i Ona fofoga.
O Le Soifua Mai o le Faaola
Pe a tatou talanoa e uiga i le soifua mai o Iesu Keriso, ua tatou mafaufau ma le talafeagai i mea nei. O lona soifua mai sa le iu le taua ona o mea o le a Ia silafia ma mafatia ai ina Ia mafai ona sili atu ona fesoasoani ia i tatou—ma faaiu uma lava i Lona Faasatauroga ma le Toetu (tagai i le Alema 7:11–12). Ae o Lana misiona foi na aofia ai le matagofie o Lana auaunaga, o vavega o Lana galuega, o le faamalologa na Ia aumaia i e puapuaga, ma le olioli sa Ia ofoina atu—ma ofoina mai ai pea—i e faanoanoa.
Ou te fiafia foi e mafaufau i mea e oo mai i se taimi mulimuli ane. O a‘u mau e lua ou te fiafia i ai i le talanoa e uiga i lena taimi o loo maua i le faaiuga o mataupu e 7 i le tusi o Faaaliga:
“Latou te le toe fia aai, e le toe fia inu foi; e le ogotia i latou i le la, po o se vevela.
“Aua o le tamai Mamoe o loo i luma o le nofoalii na te fafaga ia i latou, ma taitai ia te i latou i punavai o vai ola: e soloieseina foi e le Atua o loimata uma nai o latou mata” (Faaaliga 7:16–17; tagai foi i le 21:4).
O lena mea ou te mauaina ai le faamoemoe paia o le mea e oo mai, o le vaaiga o le a i ai i le taimi o le Meleniuma tele ma le nofotupu faaselesitila o Keriso e mulimuli mai.
Faatasi ai ma na mea uma e oo mai, e ui i lea, ou te manatu e talafeagai i lenei taimi o le tausaga ia le na o le mafaufau e uiga i lena pepe i le faatanoa vao. Aua le lofituina po o le faatumulia i mea o le a oo mai; tau lava o le mafaufau e uiga i lena tamai pepe. Faaalu sina taimi filemu, ma le toafilemu e mafaufau loloto ai i le amataga o Lona soifuaga—le faatumutumuga lea o na valoaga faalelagi ae o le amataga faalelalolagi mo Ia.
Faamatalaga mai le Keriso o loo Faamaloloina le Tauaso, saunia e Domenico Fiasella, mai faaaloaloga a John ma Mable Ringling Museum of Art;taumatau: Le Po Paia, saunia e Carl Heinrich Bloch
Faaalu se taimi e malolo ai, maua le filemu, ma tagai i lenei tamaitiiti i lou mafaufau. Aua e te popole tele pe lofituina i mea e oo mai i Lona soifuaga po o lou olaga. Nai lo lena, faaalu sina taimi filemu e mafaufau ai atonu o le taimi sili ona toafimalie i le talafaasolopito o le lalolagi—ina ua olioli uma le lagi i le savali “O le Viiga i le Atua i mea aupitoaluga, ma le manuia i le lalolagi, o le finagalo alofa i tagata” (Luka 2:14).
Ia tuu atu i le Agaga e Faamafanafanaina Oe
I ni nai tausaga ua mavae, sa ou faalogoina i se leitio se faatalanoaga o loo saunoa ai Epikopo Desmond Tutu, o le akiepikopo o le lotu Egelani i Aferika i Saute. Faatoa uma ona ia lolomiina se tusi ma lona afafine e uiga i le toefaaleleia na tupu i Aferika i Saute ina ua mavae le faailogalanu.1 O le mea autu lava ia, o le savali a le tusi e faapea o loo i ai le lelei i tagata uma.
I le taimi o le faatalanoaga na tuuina atu se fesili loloto, ma musuia ia Epikopo Tutu: “Pe ua e iloa ua suia lou sootaga ma le Atua a o e faasolo ina matua?”
Sa malolo Epikopo Tutu ona faapea atu lea, “Ioe. Ua ou aoaoina ia faateleina le le tautala i le afioaga o le Atua.”
Na ia manatua ai pe a tatalo o ia i ona tausaga na muamua atu, ia faia lea mea ma se lisi o talosaga ma popolega. Na te agai atu e tatalo ma se mea na ia ta‘ua “o se ituaiga o lisi o faatauga.” Ae o lenei, na ia fai mai ai, “ou te mafaufau [ua ou] taumafai ina ia matua i le na ona i ai iina. E pei o lou nofonofo i luma o se afi i le taumalulu, ua na ona e i ai i luma o le afi, ma e le tatau ona e taumafai e fia poto po o se isi mea. E faamafanafanaina oe e le afi.”2
Ou te manatu o se faatusa matagofie lena—e na o lou nofonofo faatasi ma le Alii ma tuu atu ia te Ia e faamafanafanaina oe e pei o se afi i le taumalulu. E le faapea sei e atoatoa po o le tagata aupito sili na ola i le lalolagi pe sili i soo se mea ina ia faatasi ma Ia.
Ou te faamoemoe o le a e faaaluina se taimi i lenei vaitau o le Kerisimasi e nofonofo ai mo sina taimi filemu ma tuu atu i le Agaga o le Faaola e faamafanafana oe ma faamautinoa oe i le taua o lau auaunaga, o lau taulaga, o lou olaga. Nofonofo filemu faatasi ma lena tamai pepe ma o le a e alu ese mai ua faamalosia faaleagaga ma ua sili atu ona saunia mo mea uma e oo mai mulimuli ane. Ia tuu atu i lena taimi e avea ma se taimi o le malologa ma le toe faaleleia ma se faamautinoaga ma le faafouina.
E tuuina atu e le Atua ia te oe lena faamanuiaga i lenei Kerisimasi a o e, faatasi ma au, tuuina atu le molimau i le Faaola o Iesu Keriso—Lona totonugalemu i o tatou olaga, i olaga o tagata uma, ma le faamoemoega autu lava o le olaga.
Tatou te tapuai ia te Ia, tatou te auauna atu ia te Ia, ma tatou te alolofa ia te Ia. Tau ina ia mafai ona atagia mai i lou olaga lena alofa e ala i lau taulaga i lenei vaitau o le Kerisimasi ma aso uma lava.