Mau ha’api’ira’a a te hō’ē metua vahine

Nā Elder Jairo Mazzagardi

Nō te Hitu ’Ahuru

Elder Jairo Mazzagardi

lessons from mother

I tō’u pa’arira’a ’e tō’u metua vahine, i te mau taime ato’a e noa’a mai te tahi moni, e rave ’oia i te mau moni pāpie nehenehe roa a’e—terā ’aita i mi’omi’o ’e i repo rahi roa—nō te hōro’a i te ti’a fa’atere o te ’ēkālesia tā mātou e haere. ’Ua nā reira ’oia i tōna orara’a tā’āto’a. E parau ’oia, « teie nā te Atua ». ’Ua vai noa te reira mau parau mai te reira mai ā tau. I te bāpetizora’ahia vau i roto i te ’Ēkālesia a Iesu Mesia i te Feiā Mo’a i te Mau Mahana Hope’a Nei, e ta’ata pa’ari au i terā tau, ’aita vau i fifi nō te ’aufaura’a i te tuha’a ’ahuru inaha ’ua ha’api’i mai tō’u metua vahine iā’u ’ai ha’apa’o i terā ture.

’Ua ha’api’i ato’a mai tō’u metua vahine iā’u ’eiaha e ha’avare, noa atu ē e ’ohipa rahi tō muri mai. E mea fa’a’apu te mau ta’ata i fa’aea na pīha’i iho i tō mātou fare, ’ua rau te mā’a hotu ’e te pota. I te tahi taime e tārere mai te mā’a hotu i tō mātou nei pae ’āua. I te hō’ē taime ’ua pāfa’i au i te hō’ē mā’a ’e ’ua ’āfa’i atu ra i tō’u metua vahine. ’Ua hi’o mai ’oia iā’u ma te parau ē, « e ’ere nā tātou terā ». ’Ua māere roa vau. Parau ihora vau : « Nō te aha ? Tei tō tātou nei pae o te ’āua ! » Parau fa’ahou mai nei ’oia, « e ’ere nā tātou terā ». Tāpe’a a’era i tō’u rima ’e haere atu ra māua i te fare o terā ta’ata. ’Ua tātarahapa māua i te pāfa’ira’a i tāna mā’a hotu. ’Ua parau mai tō’u metua vahine ē, ’ia hina’aro mātou i te hō’ē mea, e nā reira ïa mātou ma te parau ti’a.

Penei a’e e ’ere tō ’outou nā metua i te melo nō te ’Ēkālesia, ’aore rā ’aita ’outou e ’āfaro roa i tā rātou mau mā’itira’a. E mau parau tumu mau rā tā ’outou e nehenehe e ’apo mai mai roto mai ’ia rāua, mai te ha’avare ’ore, te ’amora’a te hōpoi’a, te fa’arava’ira’a ia ’oe iho ’e te ’ohipa. E riro mai teie mau parau tumu ’ei ha’amaita’ira’a rahi i roto i tō ’outou orara’a.

’A ui i te metua !

• E aha tā ’oe tuha’a au roa a’e i te rirora’a ’ei metua ?

• E aha te tufa’a fifi roa a’e ?

• E aha te mea e fa’a’oa’oa ia ’oe ?

• E aha tā ’oe ’ohipa faufa’a rahi i roto i te hō’ē mahana ?

• Nāhea te ’evanelia i te tauturura’a ia ’oe ’ia riro ’ei metua maita’i a’e ?

• E aha tā ’oe ’ohipa hope’a i roto i te hō’ē mahana ?

• E aha te tahi atu mau uira’a tā ’outou e nehenehe e ui atu ?

’A riro ’ei maru tauturu nō tō ’oe māmā ’aore rā tō ’oe pāpā nō te hō’ē mahana ! ’A papa’i i te mau parau ’e ’aore rā te hōho’a nō ni’a i te mea tā ’outou i ha’api’i mai. ’A ha’amāuruuru i tō ’oe nā metua nō te mau mea ato’a tā rāua e rave ra.