Parau poro’i nā te mau tuahine hāhaere
’Ua ha’amauhia te ’utuāfare e te Atua
’A tuatāpapa nā roto i te pure i teie mātēria ma te ’imi ’ia ’ite e aha te fa’a’ite atu. Nāhea te ta’a-maita’i-ra’a i « Te ’Utuāfare : E poro’i i tō te Ao nei », e ha’amara’a i tō ’outou fa’aro’o i te Atua ma te ha’amaita’i i te feiā tā ’outou e ha’apa’o ra nā roto i te hāhaerera’a a te mau tuahine ? Nō te mau ha’amāramaramara’a hau atu, ’a haere i ni’a i te reliefsociety.lds.org.
Te Fa’aro’o, Te ’Utuāfare, Te Tōtauturu
Hōho’a i mua i te hiero nō Buenos Aires Rāparāta
« I roto i te mau parau o [te hīmene Paraimere], ‘Nā te Atua i ha’amau i te ’utuāfare’ … ’ua fa’aha’amana’ohia ia tātou te ha’api’ira’a tumu pāpū », te parau ïa a Carole M. Stephens, tauturu mātāmua i roto i te peresidenira’a rahi o te Sōtaiete Tauturu. « ’Aita tātou i ha’api’i noa ē, nā te Atua i ha’amau i te ’utuāfare, ’ua ha’api’i ato’a rā tātou ē, e tuha’a tātou tāta’itahi nō te ’utuāfare o te Atua […]
« E fa’anahora’a nō te here te fa’anahora’a a te Metua nō tāna mau tamari’i. E fa’anahora’a nō te tāhō’ē i tāna mau tamari’i—tōna ’utuāfare—i pīha’i iho iāna ».1
’Ua parau Elder L. Tom Perry (1922-2015) nō te pupu nō te Tino ’Ahuru Ma Piti ’āpōsetolo ē : « Tē ti’aturi ato’a nei tātou ē, te mau ’utuafare pa’ari mātarohia, e ’ere ïa i te niu tumu noa nō te hō’ē sōtaiete mau pāpū, nō te hō’ē orara’a fa’arava’ira’a faufa’a pāpū, ’e nō te hō’ē maura’a pāpū o te mau mea faufa’a—e riro ato’a rā rātou ’ei niu pāpū nō te ao a muri atu ’e nō te bāsileia ’e te fa’aterera’a hau a te Atua.
« Tē ti’aturi nei tātou ē, e patuhia te fa’anahonahora’a ’e te fa’aterera’a o te ra’i i ni’a i te ’utuāfare ’e i te ’utuāhare fēti’i ».2
« ’Ua fa’aipoipo ānei ’e ’aore rā ’aita, ’ua rahi ānei te tamari’i ’e ’aore rā ’aita, e ti’a i te tā’āto’ara’a ’ia riro ’ei tino pāruru i te ’ōpuara’a a te Fatu tei fa’ata’ahia i roto i te poro’i nō ni’a i te ’utuāfare. » « Mai te peu e ’ōpuara’a nā te Fatu, e ’ōpuara’a ato’a ïa nā tātou e ti’a ai ! »3
Te tahi atu mau pāpa’ira’a mo’a
Te ha’api’ira’a tumu nō ni’a i te ’utuāfare
’Ua ha’api’i te tuahine Julie B. Beck, peresideni rahi tahito nō te Sōtaiete Tauturu ē, te ’ihi atua nō ni’a i te ’utuāfare, ’ua niuhia ïa i ni’a i te Hāmanira’a, te Hi’ara’a ’e te Tāra’ehara a Iesu Mesia :
« ’Ua hōro‘a mai te Hāmanira’a o te fenua i te hō’ē vāhi i reira te mau ’utuāfare e nehenehe ai e ora. ’Ua hāmani te Atua i te tāne ’e te vahine ’ei nā ’āfara’a faufa’a tumu e piti nō te hō’ē ’utuāfare. E tuha’a nō te fa’anahora’a a te Metua i te Ao ra te tā’atira’a o Adamu ’e o Eva ’ei ’utuāfare mure ’ore.
« … Nā te Hi’ara’a i fa’ati’a ’ia rāua ’ia fānau i te tamāroa ’e te tamāhine.
« ’Ua fa’ati’a te Tāra’ehara [a te Mesia] i te ’utuāfare ’ia tā’ati-’āmui-hia ē a muri noa atu. E fa’ati’a te reira i te mau ’utuāfare ’ia fāna’o i te tupura’a mure ’ore ’e te maita’i-roa-ra’a. ’Ua hāmanihia te fa’anahora’a rahi ’oa’oa, tei parau-ato’a-hia te fa’anahora’a nō te fa’aorara’a, nō te mau ’utuāfare […]
« I reira ho’i te ha’api’ira’a tumu a te Mesia … ’aita ana’e e ’utuāfare, ’aita ïa e fa’anahora’a ; ’aita e tumu nō te orara’a tāhuti nei ».4