Te reo o te feiā mo’a i te mau mahana hope’a nei
Tāparu i te aroha
Fa’ahōho’ra’a nā Stan Fellows
I te terera’a vau i te hō’ē ’oire fātata nō Estonia, ’ua ’ite au i te hō’ē ta’ata tē tāparu ra i te moni. Te ’ohipa māere, ’ua ha’amana’o vau iāna i te taime ’a tāvini ai au ’ei misiōnare i roto i terā ’oire, ’a 10 matahiti nā mua atu. E pūtē mōhina ’ūrina (plastique) rahi i roto i te rima, mai tei mātāmua ra, nō te ’ohi mai i te reira e ho’o atu ai. Tē ha’amana’o ra vau e ani noa mai ’oia i te mau toata, ’e ’ia hōro’a atu ’oe, e ani fa’ahou mai.
’Ua hitimahuta roa vau i te ’itera’a iāna. ’Ua ma’iri e 10 matahiti ’e teie noa nei ā ’oia––’ua hinahina ri’i noa te rouru, terā rā e au ē, terā noa tōna orara’a mai terā ’ē tau i te tāparura’a i te moni i terā mahana ’e terā mahana. ’Ua feruri au i nā matahiti fa’ahiahia e 10 tā’u i ora na i tō’u pae, ’ua fa’aipoipo i roto i te hiero, ’ua haere i te ha’api’ira’a, ’ua ’itehia mai te hō’ē ’ohipa maita’i ’e e mea maita’i te ea.
’Ua puta mai i roto iā’u ē, ’o teie paha te taime hope’a e ’ite ai au iāna, ’e ’ua tae mai te mana’o e ti’a iā’u ’ia hōro’a i te tahi mea nāna. Te fifi rā ho’i, hō’ē noa moni parau i roto i tō’u rima, ’ua hau roa ïa i tā’u i hina’aro e hōro’a. ’Ua ’ōtohe ri’i au i mua i teie mā’itira’a––’aita e hōro’a i te hō’ē mea ’e ’aore rā e hōro’a rahi atu i tā’u i hina’aro nāna. Fa’aoti atu ra vau ē, e ’ere i te pau rahi nō’u ’e e ’oa’oa roa mai ’oia, nō reira ’ua hōro’a atu vau i te moni.
’Aita e piti mahana i muri iho, ’o vau atu ra i roto i terā vaira’a, i teie rā taime, nō te tāparura’a i te aroha. ’Ua hape tō’u hi’ora’a i te tai’o mahana nō te fa’aho’ira’a i te hō’ē parau tāpa’ora’a nō te tahi pūtē moni ha’api’ira’a. ’Ua mana’o roa vau ē ’ua oti i te fa’aho’ihia e piti hepetoma nā mua atu, ’ua ’ara’ara rā tō’u mata i te hi’ora’a atu i te tai’o mahana, ’ua tāerehia vau hō’ē mahana i te hāponora’a i te reira.
Te tino moni o te pūtē moni ha’api’ira’a, ’ua tāta’ihānere ïa i te tino moni tā’u i hōro’a i terā ’ōvere, ’ua tano roa ïa teie ha’api’ira’a i ni’a iā’u. Teie ïa vau tē tāparu nei i te aroha, haere te pure i tō’u Metua i te Ao ra ’e haere ato’a te rata uira i te mau ti’a o te fare ha’api’ira’a. ’Ua parau mai rātou ē, e tāpe’a rātou i teie parau anira’a, e tāpa’o ato’a rā rātou ē, ’ua tāerehia te hāponora’a.
’Ua pāhonohia ta’u pure ’e ’ua ha’amaita’ihia vau ’ua fāri’i au i te pūtē moni, ’o tei tauturu ho’i ia māua ta’u vahine i te pae moni. Hau roa atu rā, ’ua ’apo mai au i te hō’ē ha’api’ira’a faufa’a rahi : e ’ere ānei tātou pā’āto’a e mau ta’ata tao’a ’ore ra ? (hi’o Mosia 4:19).