Te semeio nō te ahu tano noa
’Ua hina’aro ānei ’oe i te reira i teie taime ti’a—’e ’aore rā ’ua hina’aro ’oe i te mea ti’a ?
’A feruri na i te hō’ē taure’are’a tamāroa i te fare ’o ’ōna ana’e ’e tē po’ia ra (mea huru ’ē ri’i iho ā ïa, ’a tāmata noa rā i te feruri). I teienei, ’a feruri na i teie taure’are’a tē tāmata ra i te tunupa’a i te tahi faraoa ’e te pata pa’ari marū i roto ’e ’a tahi ra ’oia e rave ai i te reira.1 ’A feruri na, ’aita tōna nā metua i ha’api’i ri’i a’e iāna e nāhea i te tunu i te pata pa’ari marū ’e ’aita ’oia i hi’o noa a’e ia rāua i te tunura’a i te reira.
E parau rā tātou ē, ’ua noa’a i teie taure’are’a te mau ’ohipa ato’a e tu’u : te faraoa, te pata pa’ari marū, te tahi pata nā ni’a i te faraoa (’e te tahi mayonnaise i roto, inaha e ’ere ’oia i te tamāroa ma’ua). I muri iho, ’ua rave ’oia i te pāni ’e tu’u ihora i ni’a i te umu. (E parau tātou ē, ’aita tāna terā ’iri tunu pa’a ’e ’aore rā te tahi atu tauiha’a nō te hāmani i te reira mā’a.)
I teienei, e parau tātou ē, e mana’o tei puta mai i roto i tōna upo’o—e mana’o tā te ta’ata e rave rahi i nava’i roa te ma’ua (’aore rā te mā’au i terā taime) nō te mana’o ē : « ’Ia ha’apūai au i te auahi, e ’ama ’oi’oi mai ïa ».
’A feruri na i te ’ohipa e tupu i muri iho. (Penei a’e ’aita e faufa’a ’ia feruri.)
E faraoa ’ōpa’apa’a ’e te pa’apa’a’ina maita’i tāna e roa’a mai ’e ’aore rā e pata pa’ari marū tahe maita’i ’e te ve’ave’a—e ’ere rā na to’opiti. Pāpū roa paha e noa’a mai, e faraoa e hi’ora’a ’e e huru mai te ’ōfa’i ’ere’ere o te mou’a auahi (’ia tāmata-ato’a-hia) ’e e pata pa’ari marū tei tahe i tōna noa ’āfara’a mai te au o te hō’ē ’ā’amu tei fa’ati’a-noa-hia te ’āfara’a.
Tōna fifi, mai tā ’outou i ’ite, ’o te ’āno’ira’a ïa te ma’ua (’o te nehenehe iho ā ïa e fāri’i) i te hina’aro rū (’ua ta’ahia iho ā nō te aha, ’aita paha ïa e ti’a roa ’ia fāri’i). ’E mai te peu e tāpiti fa’ahou ’oia i te hape, e’ita roa atu paha ïa e nehenehe e fāri’i noa, inaha e’ita fa’ahou e nehenehe e fa’ahape i te ma’uara’a, ’o tōna rā hina’aro rū.
Nō te rave maita’i i te reira, e tītauhia ïa iāna ’ia ’ite mai i te semeio nō te ahu tano noa.
E ’ere te tano-noa-ra’a i te ha’umanira’a
E mea maita’i roa te fāito ahu tano noa i ni’a i te umu nō te fa’atahe i te pata pa’ari marū ’e tē vai atu ra nō te mea e ti’a i te mā’a ’ia ’ama maita’i ’o roto ’eiaha rā ’ia pa’apa’a i rāpae. Te vāhi au ’ore noa rā, ’o te taime rahi a’e ïa tei tītauhia ’e te hi’o-maita’i-ra’a, e tītauhia ïa te fa’a’oroma’i.
’Ua parau te Fatu ē, « ’A tāmau noa i te fa’a’oroma’i ē tae noa atu i te taime ’outou e maita’i roa ai ra » (PH&PF 67:13). Tē parau ra ’oia nō te huru maita’i-roa-ra’a tei hau atu i te tunura’a i te faraoa pata pa’ari marū tahe maita’i ; ’ua hina’aro ’oia ’ia riro tātou mai iāna ra te huru. ’O Iesu Mesia te hi’ora’a rahi roa a’e nō te fa’a’oroma’i. ’E te hō’ē tuha’a nō te pe’era’a i tōna hi’ora’a, ’o te fa’a’ā’anora’a ïa i tō tātou hi’o-ātea-ra’a, ma te hi’o i ’ō atu i terā noa taime ’e ma te ’ite mai i te fa’autu’ara’a rahi a’e e tae mai nā roto i te fa’atītī’aifarora’a iāna iho, te fa’aro’o, te ha’apa’o, te ’āueue-’ore-ra’a ’e te tauto’ora’a tāmau, te fa’a’oroma’i-noa-ra’a ’e te here—’oia ho’i, te roa’ara’a te fa’a’oroma’i.
I roto i te tātarara’a o te fa’a’oroma’i, tē vai ra te tīa’ira’a, ’o te fa’atupu paha i te fiu, ’o tā te peresideni Dieter F. Uchtdorf, tauturu piti i roto i te Peresidenira’a Mātāmua, i ha’api’i ia tātou, ’ua hau atu i te tīa’i-noa-ra’a : « Te fa’a’oroma‘i ’o te tīa’i-itoito-ra’a ïa ’e te tāpe’a-noa-ra’a. ’O te rave tāmau-noa-ra’a ïa i te tahi mea ma te ravera’a i te mau mea ato’a tā tātou e nehenehe—te ravera’a i te ’ohipa, te ti’aturira’a ’e te fa’a’ohipara’a i te fa’aro’o ; te fa’arurura’a i te mau fifi ma te ’ā’au itoito noa atu e fa’ataimehia te mau hina’aro o tō tātou ’ā’au. E ’ere te fa’a’oroma’i i te tāpe’a-noa-ra’a ē tae noa atu i te hope’a, ’o te tāpe’a-maita’i-ra’a ē tae noa atu i te hope’a ! »2
E ’ere i te tāora-noa-ra’a i te faraoa pata pa’ari i ni’a i te pāni ē mo’e-roa-hia te reira ; ’o te hi’o-noa-ra’a rā ’e te hurihurira’a i te taime tano.
E ’ere i te haere-noa-ra’a i te ha’api’ira’a ’e te séminaire ’e te purera’a ; ’o te ha’api’i-itoito-ra’a rā ’e te ha’amorira’a.
E ’ere i te tīa’i-noa-ra’a i te ’itera’a pāpū nō ni’a i te Buka a Moromona ’ia hōro’ahia mai ia tātou nō te mea ’ua ani tātou ; ’o te tai’o-tāmau-noa-ra’a rā, te tuatāpapara’a, te ferurira’a, te purera’a ’e te orara’a mai te au i te mau ha’api’ira’a o te reira buka.
E ’ere i te pārahi-noa-ra’a i reira ’a fa’ao’ō’o noa mai ai te mau hoa i tō ’outou fa’aro’o ; ’o te purera’a rā nō rātou ’e te hina’aro-mau-ra’a ’ia tupu te tauira’a o te ’ā’au, ’e te ravera’a i te noa’a ia ’outou nō te fa’atupu mai i te reira.
E ’ere i te tīa’i-noa-ra’a ’ia ti’a tō ’outou 16 matahiti nō te arapae ; ’o te ha’api’ira’a rā ’ia au i te ha’apa’o ’e te tāmatara’a i te māramarama e nāhea te pe’era’a i te parau a’o a te peropheta e ha’amaita’i ai ia ’outou.
’A ha’amarū i te auahi
’Ua riro te fa’a’oroma’i ’e te hitahita ’ore ’aore rā te ha’avīra’a iāna iho ’ei tuha’a nō te « [hotu] o te Vārua » (hi’o Galatia 5:22-23). Noa atu ā e mau mea rū te ti’a ’ia rave ’oi’oi ’e ’aore rā ’ia pāhono vitiviti (mai te mau mā’a e tunuhia i ni’a i te auahi pūai), e ti’a ’ia hi’o ’outou ia ’outou iho i te haerera’a i te fa’a’oroma’i rahi a’e ’e te ha’avīra’a rahi a’e iāna iho. Mai te peu tē ’ite ra ’outou ē, tē tupu mai ra te reira, e tāpa’o ïa tē ’ohipa ra te Vārua i roto i tō ’outou orara’a.
E ti’a i te semeio nō te ahu tano noa i te hōro’a mai i te faraoa pata pa’ari tahe maita’i, te ’īna’i hamburger ’ute’ute ri’i noa i rōpū e ’ere mai te piri ha’uti hockey, te ’ūmara putete farai maita’i ’eiaha rā te ’ere’ere ’e te raiti marū ’e te ’ama maita’i ’eiaha rā te pa’ari ’e te tarapape. E tu’u rā te fa’a’oroma’i i tāna « ’ohipa ’ia ti’a roa » (Iakobo 1:4) tō ’outou orara’a, ma te tauturu ia ’outou ’ia haere i mua nō te riro rahi atu ā mai ia Iesu Mesia, ma te fa’atae mai i te fa’aurura’a a te Vārua Mo’a ’e ma te tauturu, i te hope’a, ’ia arata’i ia ’outou i te ore mure ’ore.
’Ia ’ite ’outou i te mau mea e fa’atupu i te fa’a’oroma’i ’ore i roto ia ’outou, ’a feruri i terā faraoa pata pa’ari (’e ’aore rā te tahi mā’a tā ’outou i ’ite) ’e ’a feruri i te mea tā ’outou e ’ere ra nō te vaiiho-noa-ra’a ’outou i te fa’a’oroma’i ’ore e arata’i i tā ’outou mau ’ohipa. Mai te peu ’ua topa ’outou i roto i te peu fa’a’oroma’i ’ore, ’a ’āmui mai. E ti’a ia ’outou ’ia tātarahapa ’e ’ia tāmata fa’ahou ’ia pe’e i te hi’ora’a o Iesu Mesia ’e tāna mau ha’api’ira’a. E rave rahi faraoa pata pa’ari e tunu, e ’ere i te hō’ē noa, ’e ’aita roa atu i tāere roa nō te ha’api’i nō ni’a i te maita’i-roa-ra’a e noa’a nā roto i te fa’a’oroma’i.