Te mana nō te fa’aitoito ā
Tē ora nei te ta’ata pāpa’i i Utaha, Marite.
Nō tō’u ’āvae fati ’e tō’u ’ā’au pēpē, ’ua hina’aro roa vau i te fa’aorara’a. Nā te tīa’ira’a i pa’epa’e iā’u.
E riro e hō’ē ’āva’e te reira hou te 16ra’a o tō’u mahana fānaura’a, ’ua tere tō’u ’utuāfare nā roto i te fenua Marite nō te haere e māta’ita’i i te tahi mau vāhi nō te ’ā’amu o te ’Ēkālesia. ’Aita vau i fifi rahi roa i te tere-ātea-ra’a nā ni’a i te purōmu nō te mea ’ua ’oa’oa noa tō’u ’utuāfare. Tē ha’amana’o ra vau i te pa’umara’a i roto i te pere’o’o i muri mai i tō mātou tere māta’ita’ira’a ia Winter Quarters, i Nebraska. E ua iti rahi tei topa. ’Ua pārahi au i muri, haru mai ra i te ’ahu ta’oto ’e ’ofetufetu a’era iā’u nō te fa’aro’o i te ua ē vare’a noa atu ra i te ta’oto.
Te ’ohipa i muri iho tā’u e ha’amana’o ra, ’o te tāviriviri-haere-ra’a ïa. Ē parauhia mai nei ē, ’ua he’e te pere’o’o i ni’a i te pape ’e ’ua ū i ni’a i te pāruru i raro a’e i te tahi ’ē’a turu. Tē ha’amana’o ri’i noa ra vau ’ua parau mai te tahi ta’ata iā’u ē, ’ua fati tō’u ’āvae ’e tē ’āfa’ihia ra vau nō te tāpū.
’Aita i maoro roa i muri iho, tei roto noa ā vau i te fare ma’i, ’ua haere mai tō’u pāpā i roto i te piha. ’Ua pārahi ’oia i pīha’i iho i tō’u ro’i ’e tāpe’a atu ra i tō’u rima. Mai te huru ra ē, ’ua ’ite a’ena vau i te mea tāna e parau mai.
« Tamāhine », ’ua parau ’oia, « ’ua ’ite ānei ’oe tei hea ’oe ? »
« I te fare ma’i », ’ua parau vau.
« ’Ua ’ite ānei ’oe e aha tei tupu ? »
« ’Ua ū tō tātou pere’o’o ».
« ’Ua paraparauhia atu ’oe nō te tahi mau melo o te ’utuāfare ? »
’Ua feruri au ’e ’ua parau atu ra ’aita.
’Ua parau mai ’oia e mea maita’i te mau ta’ata ato’a—’aita rā tō’u māmā. ’Aita ’oia i ora mai.
’Ua mana’o vau e marua roa vau i roto i te heva i te reira iho taime, ’aita rā. Noa atu tō’u hitimahuta, mai te huru ra ē, e ’ohipa tei fa’atupu i te hau, te mana’o marū ē, e nehenehe tā’u e ti’aturi i te Atua, e maita’i te mau mea ato’a.
’A tārava noa ai i roto i te fare ma’i, ’ua ha’amana’o vau i te hō’ē vāhi nō te ’ā’amu o te ’Ēkālesia tā mātou i haere e piti noa mahana nā mua mai i te ’ati : Martin Cove, i Wyoming. E rave rahi pionie tei pohe i reira nō te po’ia ’e te fa’arurura’a i te hiona ’e te to’eto’e. ’Ua ha’amana’o vau i te hi’ora’a i te mau ha’apu’era’a ’ōfa’i tei tāpo’i i te mau mēnema ’e ’ua feruri au i te fāito fa’aro’o tei tītauhia i te mau pionie e toe ra nō te rave i tō rātou mau pere’o’o huti rima ’a haere noa ai i mua. ’Ua putapū roa vau i te reira ’ā’amu. ’A feruri noa ai au i te reira ’ohipa, ’ua ’ite ihora vau ’ua fa’aitoito ā te mau pionie ’e ’o teie ato’a tā’u hōpoi’a, nā reira ato’a i te ha’apūaira’a i tō’u mau teina.
’Ua vai noa teie mana’o mātāmua nō te hau ē hope noa atu hō’ē hepetoma ’e te ’āfa. Tē pārahi noa ra vau i roto i te pārahira’a tūra’i ’e tē māta’ita’i ra vau i te ahitiri nō te ’ōro’a nō te maha nō tiurai nā roto i te ha’amāramarama o te fare ma’i, i reira te mana’o i te putara’a mai—’ua reva tō’u māmā. E’ita ’oia e tae mai nō tō’u ’ōro’a ha’afeti’ara’a i te ha’api’ira’a tuarua. E’ita ’oia e tae mai nō tō’u ’ōro’a hiero. E’ita ’oia e tae mai nō tō’u fa’aipoipora’a. ’Ua reva ’oia.
Terā ïa te taime ’ua ha’amata te mau mea i te fifi roa. ’Ua māuiui roa tō’u ’āvae ’e ’aita vau i po’ia a’e. ’Ua māta’ita’i au i te ’āfata teata ’aita rā vau i hi’o atu, ’e ta’oto noa ihora vau. ’Ua pe’ape’a tō’u ’utuāfare nō’u nō te mea ’aita vau i ta’i rahi roa.
’Ua mani’i rahi mai te roimata i te taime ’a ho’i ai mātou i te fare i Oregon, e fare mo’emo’e. I reira iho, nā’u atu ra te tahi hōpoi’a a tō’u metua vahine, e pinepine tō’u mau teina i te ’imi iā’u nō te tāmāhanahanara’a. ’Ua tāmata noa vau i te fa’aitoito ia rātou. ’Aita rā i ’ōhie.
’Ua teimaha roa vau i te ho’ira’a atu i te ha’api’ira’a. ’Ua fa’aro’o te ta’ata nō te ’ati pere’o’o, ’e ’aita rā, ’ua fa’aro’o rātou ’a fa’ata’a ai te mau ’orometua ha’api’i nō ni’a iā’u ’o terā te tamāhine tei ro’ohia i te ’ati purūmu. E mana’o mo’emo’e tei tae mai.
Pa’ari fa’ahou atu nō’u i te fa’aipoipo-fa’ahou-ra’a tō’u pāpā e iva ’āva’e i muri iho i te fa’aru’era’a mai tō’u māmā. ’Ua ’ite iho ā ïa vau ē, e mea maita’i teie metua vahine ’āpī nō te ’utuāfare, ’e mea tītauhia te reira nō mātou, e mea pa’ari rā te fa’atanora’a.
’Aita rā te mau mea ato’a i pōiri i tera mau taime. E here rahi tā’u i putapū nō ’ō mai i te Metua i te Ra’i, tō’u ’utuāfare ’e tō’u feiā fa’atere o te ’Ēkālesia. Te mea tei tauturu iā’u ’ia ora mai ’e ’ia haere i mua i muri mai i te ’ati, ’o te ravera’a ïa i te mau mea ’ōhie tei ha’apūai i tō’u fa’aro’o. I te mau mahana ato’a, ’ua fa’ata’a vau hō’ē hora hou te hora ta’otora’a nō te tai’o i te mau pāpa’ira’a mo’a, nō te pure ’e nō te pāpa’i i roto i tā’u buka tāmahana i roto tō’u vaira’a ’ahu. I roto i tōu vaira’a ’ahu mo’emo’e, ’aita i tītauhia iā’u ’ia vai pūai nō tō’u mau teina. E nehenehe tā’u e ta’i mai tā’u i hina’aro ’e ’ia mani’i i te hina’aro o tō’u ’ā’au i te Atua. E parau vau iāna i te mana’o mau o tō’u ’ā’au ’e tō’u mihi rahi i tō’u māmā. ’Ua ’ite au ’ua fa’aro’o ’oia iā’u nō te mea ’ua putapū rahi au i tōna aroha. ’Ua riro roa mai taua vaira’a ’ahu ra ’ei vāhi mo’a nō’u.
Nā te ravera’a i te reira mau mea ’ōhie i tauturu iā’u ’ia vai tā’amu noa i te Atua ’e ’aita vau i ha’apae iāna ’e ’ino’ino noa atu ai. ’Aita vau i hi’o i teie ’ati ’ei rāve’a nā te Atua nō te ha’apēpē i tō’u ’utuāfare. ’Ua rahi atu ā tō’u mana nō te fa’a’oroma’i ’e nō te auraro ho’i i tōna hina’aro ma te haere noa i mua i roto i teie mau mahana fifi nō’u. ’E tē vai ra te mau mahana e mea pa’ari mau.
I muri mai tō tō’u pāpā fa’aipoipo-fa’ahou-ra’a, ’ua hina’aro vau e fa’a’ite i te hi’ora’a maita’i i tō’u mau teina, ’e ’aita roa atu vau i hina’aro e fa’atupu i te mana’o ’ino’ino i ni’a i tō’u metua vahine ’āpī, nō reira ’ua tāmau noa vau i te tu’u i tō’u ti’aturira’a i ni’a i te Atua. Tē vai ra hō’ē ’ohipa i roto i tā’u buka Te Fa’ahaerera’a iā’u iho i mua tei rōtahi i ni’a i te ha’amaita’ira’a i te orara’a i te fare nā roto i te ha’apūaira’a i tō’u aura’a ’e te hō’ē melo o te ’utuāfare i roto e piti hepetoma. Te ’ohipa tumu nō teie ’ōpuara’a, ’o te tāmatara’a ïa ’ia riro mai te Mesia te huru ’e e fa’a’ite i tō ’oe here nā roto i te tahi mau ’ohipa. ’Ua fa’aoti au e tāmata i te reira nā roto i te tāvinira’a i tō’u metua vahine ’āpī.
E te ’āmuira’a tō mātou e piti ’utuāfare, ’ua rahi roa ïa te merēti e hōroi. I reira ïa vau i te ha’amatara’a. ’A tāvini ai au iāna i roto i terā nā hepetoma e piti, ’ua tauturuhia mai au ’ia here i tō’u metua vahine ’āpī ’e ’ia fa’a’oroma’i, noa atu ā pa’i ’aita vau i ’oa’oa roa i tō mātou orara’a. Nā roto noa i te fa’atumura’a i ni’a i te tāvinira’a iāna i mara’a ai iā’u i te mau taime fifi, nō te mea ’ua putapū vau i te Vārua tei pīha’i iho iā’u.
Tē vai fa’ahou ra te tahi mau mea ’aita vau i ta’a maita’i nō te aha i tupu ai teie ’ati i ni’a i tō’u ’utuāfare, ’e tē vai noa ra te mau mahana pa’ari. Noa atu rā, mai te mau pionie te huru, ’ua tu’u vau i tō’u ti’aturira’a i ni’a i te Atua ’e ’ua hōro’ahia mai te mana nō te fa’aitoito ā.