Parau poro’i a te Peresidenira’a Mātāmua
Te mau ha’amaita’ira’a nō te ha’apa’o
Nā te peresideni Thomas S. Monson
Fa’ahōho’ara’a nā Jim Madsen
« Te ha’api’ira’a rahi roa ’o tā tātou e nehenehe e ’apo mai i roto i te tāhuti nei », tē parau ra te peresideni Thomas S. Monson, « ’oia ïa, ’ia parau ana’e te Atua ’e e fa’aro’o tātou, ’ua tano noa ïa tātou ».1
E ha’amaita’i-ato’a-hia tātou. Mai tā te peresideni Monson i parau i roto i te hō’ē ’āmuira’a rahi ’aita i maoro roa : « ’Ia ha’apa’o ana’e tātou i te mau fa’auera’a, e ’oa’oa a’e tō tātou orara’a, e ’ī a’e tō tātou orara’a, ’e e iti mai te fifi. E ’ōhie a’e tō tātou mau tāmatara’a ’e tō tātou mau fifi ’ia ’amo, ’e e fāri’i tātou i te mau ha’amaita’ira’a [tā te Atua] i fafau mai ».2
I roto i te mau parau i muri nei tā te peresideni Monson i ha’api’i i ni’a i tōna ti’ara’a peresideni o te ’Ēkālesia, tē fa’aha’amana’o mai nei ’oia ia tātou ē, ’o te ha’apa’ora’a i te mau fa’auera’a te arata’i pāpū roa a’e i te ’oa’oa ’e te hau.
Te mau arata’ira’a nō te tere
« ’Aita te mau fa’auera’a a te Atua i hōro’ahia nō te ha’ape’ape’a ia tātou ’e ’aore rā, nō te tāpe’a ia tātou ’eiaha ’ia ’oa’oa. E ’ere roa atu ïa i te parau mau. ’Oia tei rahu ia tātou ’e ’o tē here maita’i nei ia tātou, ’ua ’ite ’Oia ē, nāhea tātou ’ia ora i tō tātou orara’a e ti’a ai ia tātou ’ia fāri’i i te ’oa’oa rahi a’e e ti’a ’ia fāri’ihia. ’Ua hōro’a mai ’Oia ia tātou i te mau arata’ira’a ’o te arata’i ia tātou ma te hau i roto i teie tere tāhuti ’e te fifi pinepine, mai te mea ē, e ha’apa’o tātou i te reira mau arata’ira’a. Tē ha’amana’o nei tātou i te mau parau o te hīmene mātarohia : « Auraro i te ture ! E roa’a mai te maita’i ’e te hau’ [hi’o « Auraro te ture », Te mau hīmene, n°187] ».3
Te pūai ’e te ’ite
« Te ha’apa’o, ’o te huru ïa o te mau peropheta ; nā te reira e hōro’a i te pūai ’e te ’ite ia rātou mai te tau ’e te tau. E mea faufa’a ’ia ’ite tātou ē, e nehenehe ato’a tā tātou e fāri’i i teie pūai ’e teie ’ite. E mea ’ōhie ’ia roa’a mai ia tātou tāta‘itahi i teie mahana mai te mea ē, e ha’apa’o tātou i te mau fa’auera’a a te Atua […]
« Te ’ite tā tātou e ’imi nei, te mau pāhonora’a tā tātou e tītau nei, ’e te pūai tā tātou e hina’aro nei i teie mahana nō te ’aro i te mau fifi o te hō’ē ao pe’ape’a ’e te tauiui noa, e roa’a te reira ia tātou mai te mea ē, e ha’apa’o tātou i te mau fa’auera’a a te Fatu ma te hina’aro mau ».4
Mā’iti ’ia ha’apa’o
Te peu rahi o tō tātou nei anotau ’o te peu fāri’i noa ïa. Tē pūhara nei te mau ve’a ’e te ’āfata teata i te orara’a o te mau ta’ata tuiro’o nō te mau hōho’a, te mau ’aito nō te ’ohipa tū’aro—rātou tā te feiā ’āpī e rave rahi e hina’aro nei ’ia pe’e atu i te hi’ora’a—’o tē ha’apa’o ’ore nei i te mau ture a te Atua ma te fa’a’ite’ite i te mau raveravera’a hara rahi ’e mai te huru ra ē, ’aita e fifi tō te reira. ’Eiaha roa atu ’outou e ti’aturi i te reira ! Tē vai ra te taime nō te fa’a’āfarora’a—e fa’atītī’aifarora’a ïa o te mau mea ato’a. E tu’ira’a pō tō te mau Cendrillon ato’a—mai te mea ē, e ’ere i roto i teie orara’a, i roto ïa i te orara’a a muri a’e. E tae mai te mahana Ha’avāra’a nō te mau ta’ata ato’a. Tē tāparu atu nei au ia ’outou ’ia mā’iti [’ia] ha’apa’o ».5
Te ’oa’oa ’e te hau
« E riro paha ’outou i te hi’o i te tahi taime ē, e mea ’ārearea maita’i a’e te ta’ata i roto i te ao nei [ia ’outou]. E riro paha te tahi pae o ’outou i te mana’o ē, tē ha’avīhia nei rātou e te ture o tā tātou e ha’apa’o nei i roto i te ’Ēkālesia. E au mau taea’e, e au mau tuahine, tē fa’a’ite atu nei au ia ’outou ē, ’aore roa e mea ’ē atu e nehenehe e hōpoi mai i te ’oa’oa hau atu i roto i tō tātou orara’a, ’e ’aore rā, i te hau rahi atu i tō tātou nei vārua, maori rā, te Vārua, ’o te nehenehe e tae mai i roto ia tātou mai te mea ē, e pe’e tātou i te Fa’aora ’e e ha’apa’o [ho’i] i te mau fa’auera’a ».6
Ora parau ti’a
« Tē fa’a’ite pāpū nei au ia ’outou ē e’ita tā tātou mau ha’amaita’ira’a tei fafauhia mai e noa’a i te fāito. Noa atu e ha’aputuputu mai te mau ata vero, noa atu e topa mai te ua i ni’a ia tātou, e tāmāhanahana ’e e turu mai tō tātou ’itera’a nō te ’evanelia ’e tō tātou here i tō tātou Metua i te Ao ra ’e i tō tātou Fa’aora ia tātou, ’e e hōpoi mai te reira i te ’oa’oa i tō tātou ’ā’au ’a ora parau ti’a ai ’e ’a ha’apa’o ai tātou i te mau fa’auera’a ». ’Aita hō’ē mea i roto i teie nei ao e nehenehe e rē i ni’a ia tātou ».7
Pe’e i te Fa’aora
« ’O vai taua Ta’ata ra nō te mau ’oto, tei mātaro i te pe’ape’a ? ’O vai te Ari’i nō te hanahana, teie nei Fatu nō te mau nu’u ? ’O ’Oia tō tātou Fatu. ’O ’Oia tō tātou Fa’aora. ’O ’Oia te Tamaiti a te Atua. ’O ’Oia te Fatu nō tō tātou fa’aorara’a. Tē tārape mai nei ’Oia, ‘a Pe’e mai iā’u’. Tē fa’aue nei ’Oia, ‘e Haere ’oe, e nā reira ato’a’. Tē tāparu nei ’Oia, ‘a Ha’apa’o i ta’u mau fa’auera’a’.
E pe’e ana’e Iāna. E pe’e ana’e i Tōna hi’ora’a. E ha’apa’o ana’e i Tāna mau parau. ’Ia nā reira ho’i tātou, tē hōro’a ra ïa tātou Iāna ra i te hōro’a hanahana o te ’ā’au mēhara.8