Te auahi ’e te ha’api’ira’a nō ni’a i te ha’apa’o

I te hō’ē taime ’ua ha’api’i mai te peresideni Thomas S. Monson nō ni’a i hō’ē taime ’ua ha’api’i ’oia i te faufa’a rahi nō te ha’apa’o. I te va’ura’a o tōna matahiti, ’ua haere rātou tōna ’utuāfare i tō rātou fare i ni’a i te mou’a. ’Ua hina’aro rāua te tahi hoa e fa’aāteatea i te hō’ē vāhi ’āretu nō te ha’apūpūra’a auahi. ‘Ua tāmata rāua i te hūhuti haere ’e hūhuti pūai i te ’aihere, e ma’a ’aihere noa rā tei matara mai. Tē parau ra te peresideni Monson, « ’E ’ua puta mai nei te hō’ē rāve’a i roto i tō’u upo’o tamari’i va’u matahiti, ’o tā’u ïa i mana’o ē, terā mau te rāve’a. Nā ’ō atu ra vau ia Danny ē, ‘Hō’ē noa rāve‘a, e tūtu’i teie mau ’aihere i te auahi. E tūtu’i noa taua i te hō’ē vāhi menemene i ni’a i te ’aihere !’ »

’Ua ’ite noa ho’i ’oia ē, ’aita i fa’ati’ahia ’ia ha’uti i te māti, tē horo nei ’oia i roto i te fare nō te ti’i mai i te reira, ’e ’ua tūtu’i rāua ’o Danny i teie vāhi iti ’aihere. ’Ua mana’o rāua ē e pohe noa mai te reira i muri iho, ’aita roa atu rā, ’ua ’ama rahi noa mai ē ura roa mai nei teie vāhi. Horo ihora rāua Danny e ti’i i te tauturu, horo mai nei te tahi feiā pa’ari nō te tūpohe i te auahi ’eiaha te mau tumu rā’au ’ia ura ato’a mai.

Tē parau nei te peresideni Monson, « I taua mahana ra, ’ua ’apo mai māua ’o Danny e rave rahi ha’api’ira’a teimaha, terā rā, e mau ha’api’ira’a faufa’a—te hō’ē o te reira, ’o te faufa’a rahi ïa nō te ha’apa’o » (Hi’o « E hōro’a mai te ha’apa’o i te mau ha’amaita’ira’a », Liahona, Mē 2013, 89-90).

Mai te peresideni Monson, ’ua ’apo a’enei ānei ’outou i te tahi ha’api’ira’a nō ni’a i te ha’apa’o nā roto i te tahi fifi ? E aha te mau fā tā ’outou e nehenehe e tu’u ’ia pāruru te ha’apa’o ia ’outou ananahi ?