Te reo o te feiā mo’a i te mau mahana hope’a nei
’Ua tauturu mai te tāpena Moroni iā’u ’ei ’orometua i te ha’api’ira’a tuarua
Fa’ahōho’ara’a nā Allen Garns
E matahiti fifi nō’u i te ha’api’ira’a i te mau pīahi 13 ’e 14 matahiti. Nō ho’i noa mai nei au i te fare mai te hō’ē fārereira’a au ’ore ’e te mono fa’atere o te fare ha’api’ira’a, ’ua hi’o māua i te tahi hi’opo’ara’a tei tupu noa a’enei. ’Ei ’orometua ’āpī ’ua tītauhia iā’u ’ia hāmani i te rahira’a o ta’u mau ha’api’ira’a, ’e ’ua tāfifi au i te fa’arave i te mau pīahi i te ’ohipa ’e ’ia ’ana’anatae mai rātou. Te parau rahi i roto i te tāu’ara’a parau, ’oia ho’i, te tītaura’a ’ia fa’ahepo vau i te mau pīahi ’ia mā’iti—rave i tā rātou ’ohipa ’e ’aore rā fāri’i i te fa’autu’ara’a—’e ’ia pe’e i tā’u i parau atu.
’Ua matara mai au mai roto i teie fārereira’a, te ’ā’au teimaha ’e te tuauru. ’Ua fa’ariro roa vau i te reira ’āpo’ora’a ’ei uiuira’a rahi nō’u ’a tai’o ai au i ta’u mau pāpa’ira’a mo’a te mahana nō muri iho. Te ’ohipa māere, ’ua tae mai te mau pāhonora’a ’a tai’o ai au i te Buka a Moromona.
I terā po’ipo’i ’ua pure au nō te ha’api’i mai i roto i te mau pāpa’ira’a mo’a e nāhea i te riro mai ’ei ’orometua maita’i a’e. ’Ua ha’api’i mai te Vārua Maita’i iā’u ’a tai’o ai au nō ni’a i te tāpena Moroni i roto i te Alama 44. I terā taime o te ’ā’amu, ’ua fa’a’ati te tāpena Moroni ’e te mau ’āti Nephi i te mau ’āti Lamana i te pape ra nō Sidona ’e ’ua ha’amata’u rahi ia rātou ’e inaha ’ua tu’u rātou i tā rātou mau mauiha’a tama’i. ’Ua tāmau noa vau i te tai’o ma te mana’o ē, ’auē ïa ’āhani ’o vau te tāpena Moroni i roto i te piha ha’api’ira’a : nō te fa’atere, ma te ti’aturi rahi ’e te manuia.
’Ua tai’o vau i te tāu’ara’a parau i roto ia Moroni ’e Zerahemana ’e te mau ’āti Lamana nō te fa’ahepo ia rātou ’ia mā’iti : « ’Ia vaiiho mai ’outou i tā ’outou mau mauha’a tama’i ia mātou nei … ’e e fa’aora mātou ia ’outou, ’ia haere atu na ’outou i tō ’outou vāhi, ’e ’ia ’ore ’outou ’ia ho’i fa’ahou mai ’ia ’aro mai ia mātou » ’aore rā « ’ia ’ore ’outou ’ia nā reira … e fa’aue au i tō’u ra mau ta’ata ’ia tā’iri rātou ia ’outou » (Alama 44:6, 7). Tā’u i ’apo mai, tē rave ra ’ōna i tā tō’u fa’atere i parau mai iā’u ! ’Ua parau ’oia, « ’A hōro’a e piti mā’itira’a ’ei reira ’a pe’e i te reira ». Ma teie parau i roto i te ferurira’a, ’ua rave mai au i te fa’ahitira’a parau a Moroni, « Inaha, e fa’aoti tātou i te tama’i » (Alama 44:10).
’E teie mau parau tumu tā’u i ’apo mai i roto i te ’ā’amu nō te hō’ē o ta’u mau ’aito i roto i te mau pāpa’ira’a mo’a, ’ua ho’i au i roto i te piha ha’api’ira’a ma te ti’aturi ’e te fa’anahora’a tama’i. Tē vai ato’a ra ta’u hōho’a tarai nō te tāpena Moroni ’e ’ua vai noa te reira i roto i ta’u pūtē te toe’a o terā matahiti ’ei fa’aha’amana’ora’a e nāhea tā te tāpena Moroni i te ha’api’i mai iā’u ’ia ha’api’i i te fa’atere i te piha i te fare ha’api’ira’a tuarua. ’A hōro’a ai au i ta’u mau pīahi e piti mā’itira’a, ’ua maita’i mai tā rātou mau peu, ’ua rave rātou i tā rātou ’ohipa ’e ’ua au maita’i mai mātou. Hope a’era te matahiti, ’ua pa’ari noa iho ā, ’āre’a rā maoti te pure i pāhonohia ’e te mana o te mau pāpa’ira’a mo’a, ’ua ti’a iā’u ’ia « fa’aoti i te tama’i ».