Nāhea i te fa’ariro i te Mesia ’ei pū nō tō tātou orara’a

Nā Elder D. Todd Christofferson

Nō te pupu nō te Tino ’Ahuru Ma Piti ’āpōsetolo

Nō roto mai i te hō’ē a’ora’a i hōro’ahia i te fare ha’api’ira’a teitei nō Brigham Young University–Idaho i te 27 nō tēnuare 2009.

’Ua hō’ē maita’i roa ’o Iesu ’e te Metua nā roto i te aurarora’a, i te tino ’e i te vārua, i te hina’aro o te Metua. ’Ua parau Iesu nō ni’a i Tōna ra Metua, « ’e ’aore ho’i au i fa’aea i te rave i te mea e māuruuru ai ’oia ra » (Ioane 8:29). Nō te mea ’o te hina’aro ho’i o te Metua, i auraro ai Iesu ē tae noa atu i te pohe, « ’ua horomi’ihia te hina’aro o te Tamaiti i te hina’aro o te Metua » (Mosia 15:7). Tōna rōtahira’a i ni’a i te Metua ’o te hō’ē ïa o te mau tumu faufa’a i māramarama maita’i ai ’e i pūai maita’i ai te tāvinira’a a Iesu. ’Aita e ’ā’au piti fa’anevaneva i roto iāna.

Mai te reira ato’a, e nehenehe ia ’outou ’e ’o vau nei ’ia tu’u i te Mesia ’ei pū nō tō tātou orara’a ’e ’ia hō’ē atu iāna mai Iāna e hō’ē nei i te Metua (hi’o Ioane 17:20-23). E nehenehe tā tātou e ha’amata ma te ’īriti ’ē i te mau mea ato’a i rāpae’au i tō tātou orara’a ’e ’ia fa’anaho fa’ahou i te reira ma te tu’u i te Fa’aora i mua roa, i te pū o tō tātou nei orara’a. E tu’u atu tātou i mua roa i te mau mea e nehenehe ai ia tātou ’ia ha’amana’o noa ā iāna—te pure pinepine, te tuatāpapara’a ’e te ferurira’a i ni’a i te mau pāpa’ira’a mo’a, te tuatāpapa-māite-ra’a i te mau ha’api’ira’a a te mau ’āpōsetolo, te fa’aineinera’a i te mau hebedoma ato’a nō te rave i te ’ōro’a ma te parau ti’a, te ha’amorira’a i te Sābati, te pāpa’ira’a ’e te ha’amana’ora’a i te mea tā te Vārua ’e te mau ’ohipa i tupu na e ha’api’i mai ia tātou nō ni’a i te ti’ara’a pipi. E nehenehe ato’a te tahi atu mau mea e tae mai i tō ’outou ferurira’a ’o te tano ia ’outou i teie taime i roto i tō ’outou orara’a. ’Ia oti tātou i te fa’ata’a i te taime ’e te mau rāve’a tano nō teie nei mau mea nō te fa’atano i tō tātou orara’a i ni’a i te Mesia, e nehenehe ïa tā tātou e ha’amata i te ’āmui mai i te tahi atu mau hōpoi’a ’e te tahi atu mau mea faufa’a rahi, mai te ha’api’ira’a, te mau hōpoi’a ’utuāfare ’e te ’ohipa. Nā roto i teie rāve’a e’ita ïa te mau mea faufa’a rahi i roto i tō tātou orara’a e fa’aapiapihia e te mau mea maita’i noa, ’e e iti ïa ’aore rā e mo’e atu te mau mea faufa’a ri’i noa.

Noa atu e ’ere i te mea ’ōhie, e nehenehe tā tātou e tāmau i te haere i mua ma te fa’aro’o i te Fatu. E nehenehe tā’u e fa’a’ite pāpū atu ē i muri mai e tupu mai ïa tō tātou hina’aro ’e tō tātou ’aravihi i te rahi ’ia ha’amana’o noa ’e ’ia pe’e i te Fa’aora. E ti’a ia tātou ’ia ha’a ma te fa’a’oroma’i nō taua fā ra ’e ’ia pure tāmau ’ia noa’a te ’ite ’e te tauturura’a nō te ra’i, ’o tā tātou e hina’aro (hi’o 2 Nephi 32:9).

Nāhea ’outou i te fa’a’ohipara’a i te reira ?

Tē fa’aruru nei tō’u ’utuāfare ’e ’o vau nei i te tahi mau tāmatara’a rarahi, teie rā ’aita tō mātou e autahu’ara’a i te fare. ’Ua fa’atae te mau tāmatara’a ia mātou i ni’a i tō mātou turi ’āvae. ’Ua māuruuru vau nō te mau pāpa’ira’a mo’a ’e i te mea ’ua nehenehe tā’u e tai’o i te reira i te mau mahana ato’a. ’Ua ha’api’i rātou iā’u ē, noa atu e topa ato’a mai te mau fa’aotira’a a vetahi ’ē i ni’a iā’u, e faufa’a rahi noa ā tō’u. ’Ua māuruuru roa vau ’ia ’ite ē, e ti’a iā’u ’ia paraparau i tō’u Metua i te Ao ra i te taime ato’a i te ao ’e te pō. E ha’amaita’ira’a te reira !

Hailey D., 17 matahiti, Idaho, Marite