Parau a te mau peropheta i roto i te hō’ē vāhi mana’o-’ore-hia
’Ua ora te ta’ata pāpa’i i Rāparata ’a tāvini ai tāna tāne i reira ’ei peresideni misiōni.
E riro te hō’ē ve’a tei vaiihohia mai i te taui i te orara’a o Oscar Castro ē a muri noa atu.
’Ua bāpetizohia ’e ’ua ha’amauhia Oscar Castro i muri mai tōna ’itera’a i te ve’a nō te ’āmuira’a rahi, te Liahona i roto i te fare ’āpī tāna i fa’anu’u mai.
Fa’ahōho’ara’a nā Dan Burr ; hōho’a hōro’ahia mai e te ta’ata pāpa’i
Te mahana ’ua fa’aru’e mai te vahine a Oscar iāna ’e tā rāua e piti tamari’i, ’ua riro ïa ’ei mahana fifi roa. E rave rahi atu ra fa’aotira’a e ti’a ’ia rave. I ’imi na ’oia i te hō’ē ’ohipa, ’e i teienei, tītauhia ’ia ’imi i te hō’ē vāhi ’āpī e noho atu. Mai te huru ra ē, ’ua hu’ahu’a roa tōna orara’a. ’Ua mana’o ’oia e fa’aru’e i te mau mea ato’a, ’e e nā reira iho ā ’oia ’āhani ’aita tāna nā e piti tamari’i nehenehe.
I San Juan i te fenua Rāparata, ’aita i rahi roa te fare tārahu e mara’a ia Oscar ’ia ’aufau. ’Aua’a a’e e fare na’ina’i i te hō’ē vāhi hau tei vata mai, e pupu taure’are’a tei ora na i reira, nō reira ’ua tārahu Oscar i te reira ’e ’ua fa’aineine i tōna orara’a ’āpī ’e tāna nā tamari’i.
I roto i terā fare ’āpī, e mau ve’a ’e te tahi mau buka tei vaiihohia mai nā raro, ’e i te otira’a iāna i te tāmā ’e i te ’ohi i te mau mea, ’ua pārahi atu ra Oscar ’e hi’o a’era i te hō’ē ve’a. ’Ua haru tōna mata i ni’a i te ’api mātāmua nō te hō’ē tumu. I raro a’e i te upo’o parau, Liahona, e hōho’a nō te hō’ē ta’ata pa’ari i ni’a i te hō’ē pae tē paraparau ra i te ta’ata. ’Ua fa’aha’amana’o te reira ta’ata iāna i te hōho’a o te mau peropheta i roto i te Bibilia.
’Īriti a’era Oscar i te ve’a ’e ha’amata atu ra i te tai’o, « ’Ua ’ite tātou tāta’itahi e ti’a ’ia parau i te ta’ata tā tātou i here ē, ’ua here tātou ia rātou. ’Aita rā te mea tā tātou i ’ite e ’ānapanapa noa mai i roto i te mea tā tātou e rave ».1 Mana’o a’era Oscar i te mau parau ha’aputa tei parau-haere-hia i rotopū iāna ’e tāna vahine. ’Ua hina’aro ’oia ’ia ha’api’i i tāna mau tamari’i ’ia maita’i a’e. ’E ’ua tai’o fa’ahou Oscar i te ve’a, ha’amata a’era te tīa’ira’a i te tupu i roto iāna. ’Aita te hepetoma i hope, ’ua oti te mau parau ve’a ato’a i te tai’ohia e ana ’e ’ua hina’aro ’oia ’ia ’ite rahi atu ā.
Hō’ē ’āva’e i muri mai, ’ua haere mai e piti misiōnare i te vāhi o Oscar. ’Ua ha’afātata Oscar ia rāua ’e ’ua ani atu ra e misiōnare feiā mo’a ānei rāua ’e e hia moni nō te poro’i fa’ahou mai i te mau ve’a a te ’Ēkālesia. ’Ua parau te mau misiōnare iāna ē, e 20 minuti noa nō tōna taime.
Te mahana i muri iho, ’ua haere teie nā misiōnare e piti i te fare o Oscar. ’Ua fa’ati’a Oscar ia rāua nō ni’a i te tauira’a ’oia i te nohora’a ’e tōna ’itera’a i te tahi mau buka tahito, te tahi ve’a ’e te tahi mau buka iti tei ha’amātau iāna i te ’Ēkālesia. ’Ua fa’ata’a atu ’oia ē, te parau ve’a mātāmua tāna i tai’o, ’ua tū’ati roa ïa i tōna iho orara’a i terā ra taime. ’Ua ’ite a’ena ’oia i te faufa’a rahi o te ’utuāfare ’e ’ua hina’aro ho’i ’ia ’ite rahi atu ā nō ni’a i te purera’a pō ’utuāfare ’e te pure ’utuāfare. ’Ua parau ’oia i te mau misiōnare i te tahi atu mau mea tāna i ha’api’i nō ni’a i te ’Ēkālesia, nō ni’a ia Iosepha Semita ’e te Fa’aho’i-fa’ahou-ra’a mai o te ’evanelia.
’Ua hi’o ’āfaro ’oia i roto i te mata o teie nā misiōnare ma te fa’ahiti i teie mau parau tā te mau misiōnare ato’a e tīa’i ’ia fa’aro’o : « Tē ti’aturi nei au e peropheta Iosepha Semita nā te Atua ». ’Ua ani te mau misiōnare iāna ’ia bāpetizo, ’e ’ua fāri’i Oscar ma te roimata i ni’a i te mata. Ma’a hepetoma i muri mai, ’ua bāpetizohia Oscar Castro ’e ’ua ha’amauhia ’ei melo nō te ’Ēkālesia.
’Ua fa’aineine te Fatu ia Oscar ’e ’ua marū tōna vārua ’e ’ua ineine ’oia nō te ha’api’i ’e nō te tupu. I terā ra mahana rahi, ’ua ha’aputapū te vārua o te mau a’ora’a i roto i te Liahona nō te ’āmuira’a rahi i te ’ā’au o Oscar. ’Aita nā ta’ata tei noho nā mua mai i roto i te terā fare i ’ite i te fa’ahope’ara’a nō te vaiihora’a i te tahi mau ve’a a te ’Ēkālesia, ’ua riro mai rā te mau poro’i o te ’evanelia i roto i te reira mau ve’a ’ei mauiha’a misiōnare faufa’a rahi. I te arata’ira’a te reira iāna i te parau mau, ’ua taui roa mai te orara’a o Oscar ē a muri noa atu.