Tae atu i te taime e fārerei fa’ahou ai tātou
Te ferurira’a māramarama hanahana o te ’Ēkālesia a te Fatu
Nō roto mai « He Slumbers Not, nor Sleeps », Ensign, Mē 1983, 5-8. ’Ua fa’atanohia te tomara’a ’e te pāpa’ira’a rahi.
Tē rara’a ra te Atua i tāna hōho’a pē’ue mai te au i tāna ’ōpuara’a rahi.
Hōho’a nā Mary Ouzounian, hō-mai-hia e te Fare manaha nō te ’ā’amu o te ’Ēkālesia
E mea pāpū roa te māramarama hanahana o te fa’anahonahora’a o teie ’ohipa ’e nō te pi’ira’a i ni’a i te ti’ara’a fa’atere. I roto i te mau hui mana fa’atere rahi e mea ta’a ’ē te ta’ata hō’ē, terā ta’ata tōna huru ’e terā tōna. E hōpoi mai te ta’ata hō’ē i roto i tāna mau hōpoi’a i te ’ite rau ’e te mau ’ohipa rau tāna i ha’api’i nā mua atu. ’Ia paraparauhia ana’e te tahi ’ohipa i roto i te mau ’āpo’ora’a fa’atere a te ’Ēkālesia, e ti’amāra’a tō te ta’ata ato’a ’ia parau mai i tōna mana’o. ’Ia hi’o mai te hō’ē ta’ata i teie ravera’a i te fa’a’ohipahia, e māere roa ’oia ’ia hi’o atu i te mana o te Vārua Mo’a i te fa’aurura’a i teie nau ta’ata. ’Aita roa atu te mau ta’a-’ē-ra’a i te ha’amatara’a e ’oe’oe roa mai, e ’itehia rā te tāmarūra’a ’e te ’āmuira’a i roto i te hō’ēra’a. « E fare ha’apa’ora’a tō’u fare nei », ’ua parau te Fatu (hi’o PH&PF 132:8). ’Ia ’ite au i te reira ’ohipa i te tupu, e tupu noa mai te fa’a’āpīra’a o te fa’aro’o […]
Tē parau nei te tahi mau ta’ata ē, i te mau taime ato’a e ta’ata ruhiruhia te peresideni o te ’Ēkālesia, tā’u pāhonora’a ia rātou maori rā, « ’auē ïa ha’amaita’ira’a ē » ! ’Ua ha’amata nā mua roa te ’ohipa o teie tau tu’ura’a nā roto i te fa’a’ohipara’ahia te peropheta Iosepha Semita. E mea ’āpī ’oia ’e te itoito i terā ra tau, e tamāroa ’aita te ferurira’a i mau i ni’a i te mau peu o terā tau. E ferurira’a ’āpī tōna tei ti’a i te Fatu i te hāmani i te hōho’a mai te ’araea marū ra ’a ’ōmua ai ’oia i tāna ’ohipa.
E ta’ata huru ’āpī ato’a tei mono mai ia Iosepha i te taime ’a fa’aruru ai ’oia i te hōpoi’a hanohano ’ia arata’i i te hō’ē nūna’a tā’āto’a nā roto i te medebara e ’imi i te hō’ē fenua ’āpī.
I teienei rā, ’ua ha’amau-maita’i-hia te niu o tā tātou ha’api’ira’a tumu, ’e ’ua ha’amau-pāpū-hia tō tātou nei mau ta’ata, ’e tae noa atu te taime ē e fa’aue mai te Fatu e fa’anu’u fa’ahou ā. ’Aita e tītauhia te tahi mea fa’a’āpī. Tē tītauhia nei te tā’amura’a i ni’a i te mau parau tumu tei parauhia mai e te Atua. Tē tītauhia nei te mana’o fa’atura i tō tātou ti’a fa’atere tā te Atua i fa’ata’a. ’O ’oia tō tātou peropheta, tō tātou hi’o ’e te heheu parau. E’ita roa atu tātou e vaiihohia ma te peropheta ’ore mai te peu e ora parau ti’a tātou ’ia fāna’o hō’ē. ’Aita e tītauhia ’ia riro ’oia ’ei taure’are’a ’āpī. Tē vai ra ’e e vai tāmau noa te ta’ata ’āpī i pīha’i iho iāna nō te rātere nā te ao nei i roto i te ’ohipa o te fa’aterera’a. ’Ōna te tahu’a rahi fa’atere, tei mau i te mau tāviri ato’a o te autahu’ara’a mo’a, ’e te auvaha o te heheura’a nō ’ō mai i te Atua ra i tōna mau ta’ata.
Tē vai nei te hō’ē parau pa’ari tahito e parau nei ē, « te taure’are’a nō te ’ohipa. Te tau ruhiruhia nō te pa’ari ».
Tē feruri nei au, e tupu te hau rahi i roto i te mana’o ’ia ’ite ē, pāpū roa ananahi e peresideni tō tātou tei ’ite i te parau nō te ha’apa’o, tei ha’api’ihia, tei tāmatahia ; tei ha’apa’arihia nō te ha’apa’o i te ’ohipa ’e te parau ti’a i roto i teie ’ohipa, nā roto i te tāvinira’a, tei pa’ari te fa’aro’o, ’e tei rahi roa te maita’i o te fātatara’a i te Atua i roto i te roara’a o te mau matahiti […]
’Aita e faufa’a e ri’ari’a i te ananahi mai te peu e mau pāpū noa tātou i ni’a i te mau parau tumu tei heheuhia mai.