Te mau tamari’i ri’i ’e te ’ōro’a
Tē ora nei te ta’ata pāpaʻi i Utaha, i Marite.
’Ua ’ite ri’i mai tā mātou mau tamari’i ri’i ē, e ’ohipa faufa’a rahi te ’ōro’a nō mātou. E nehenehe tā mātou e ha’a rahi a’e nō te tauturu ia rātou ’ia ’ite ē, e mea faufa’a rahi ato’a nō rātou.
’Ua uiui a’enei ’outou ē, nō te aha tātou e vaiiho ai i te mau tamari’i tei ’ore ā i bāpetizohia ’ia rave i te ’ōro’a ? Nō te ’ore noa ānei rātou ’ia ’auē ’e ’aore rā ’ia taputō tātou i terā taime e hina’aro rātou i te tāpū faraoa ? Nō te fa’a’ōhie noa ānei i te ’ōro’a ’ia ’ōperehia, ’ia vai noa mai te hau ?
’Aita vau e mana’o ra. Tē ti’aturi nei au ē, e mau tumu hōhonu a’e. Tē ti’aturi nei au i te reira inaha tē ti’aturi nei au ē, ’ia parau Iesu Mesia « ato’a », tē parau ra ’oia nō te mau ta’ata ato’a. ’E ’ia paraparau ’oia i te naho’a rahi, ’aita ’oia e ha’apae i te hō’ē ta’ata.
I te ’ōmuara’a te Fa’aora, tei ti’a fa’ahou mai, i te ’ōro’a i tōna mau ta’ata i Amerika, ’ua tūra’i ’oia i te parau ē, e aura’a ta’a ’ē tō te reira nō te feiā tei bāpetizohia.1 Noa atu rā, ’ua fa’aue ’oia i tāna mau pipi ’ia « hō atu i te [’ōro’a] i te tī’a’a ra ».2 Tei roto i taua tī’a’a ra « te mau tamari’i ri’i ».3
I teie mahana ’ia fa’ahiti te ti’a nō te autahu’ara’a i te mau pure nō te ’ōro’a, e ani ’oia i te Metua i te Ao ra ’ia ha’amaita’i ’e ’ia ha’amo’a i te pāne ’e te pape « nā te mau vārua ato’a ’o te » rave mai nei.4 Ato’a. Te mau ta’ata ato’a e rave—’oia ato’a ïa te tamari’i ri’i tāta’itahi.
Mai te peu ’ia rave rātou i te pāne ’e te pape, e fāri’i te mau tamari’i i teie mau tāpa’o ’ei ha’amaita’ira’a nō tō rātou nau vārua mā, e rāve’a ïa tē vai ra nō te tauturu ia rātou ’ia ’ite mai i te aura’a i roto i te ’ōro’a.
Ma teie māramaramara’a, e hi’o vau i muri i te tau e tamari’i ri’i noa ta’u mau tamari’i. ’Ua huru manuia māua ta’u vahine i te tāpe’a-mū-ra’a ia rātou i te taime nō te ’ōperera’a ’ōro’a. I tō’u mana’o, ’ua ’ite ri’i mai rātou ē, e ’ohipa faufa’a rahi te ’ōro’a nō mātou. E nehenehe rā tā mātou e ha’a rahi a’e nō te tauturu ia rātou ’ia ’ite ē, e mea faufa’a rahi ato’a nō rātou.
E aha tā māua e nehenehe e rave ? E nehenehe tā māua ’ia ha’amana’o ē, e roa’a i te mau tamari’i ri’i ’ia ha’apa’o i te mau parau fafau i roto i te pure nō te ’ōro’a. E nehenehe tā rātou ’ia māramarama, nā roto i tā rātou iho rāve’a iti, e rāve’a pūai rā, i te aura’a nō te parau « ha’amana’o noa » ia Iesu. E nehenehe ato’a tā rātou e fafau ’ia « ha’apa’o i tāna mau fa’auera’a ». E nehenehe ato’a ho’i tā rātou e fa’a’ite ē, ’ua « ti’a ia rātou i te rave i te i’oa » o te Mesia i ni’a iho ia rātou, ma te ’ite ē, fātata roa teie ha’amaita’ira’a nō rātou ’ia bāpetizohia ’e ’ia ha’amauhia.5
E aha ïa te parau no te fa’a’āpīra’a i te mau fafaura’a ? ’Ua ha’api’i te feiā fa’atere o te ’Ēkālesia ē, ’ia rave tātou i te ’ōro’a, tē fa’a’āpī ra tātou i tā tātou mau fafaura’a ato’a i ravehia ’e te Fatu.6 ’Aita tā te mau tamari’i ri’i e fafaura’a e fa’a’āpī.
Tē feruri fa’ahou nei au i te taime ’a tamari’i noa ai tā māua mau tamari’i. E’ita tā mātou e nehenehe e tauturu ia rātou ’ia hi’o i muri i tā rātou mau fafaura’a, ’ia hi’o rā i mua. ’Ua feruri au ’o vau terā ’e te hō’ē tamaiti ’āpī ’aore rā tamāhine i te po’ipo’i sābati :
E parau atu vau, « ’ia ti’a tō ’oe va’u matahiti, e bāpetizohia ’oe ’e e fāri’i ’oe i te hōro’ara’a i te Vārua Maita’i. E rave ’oe i te hō’ē fafaura’a. Te fafaura’a e rave ’oe i terā taime mai te mau parau fafau ïa tā ’oe e fa’ahiti nei i teienei ’ia rave ’oe i te ’ōro’a.
« I teie mahana ’ia rave au i te ’ōro’a, e fa’a’āpī ïa vau i ta’u fafaura’a nō te bāpetizora’a, mai te huru ra ē, tē fa’ahiti fa’ahou nei au i te reira mau parau fafau. E pārahi ’oe ’e ’o vau nei, e’ita rā ’oe e fa’a’āpī i te fafaura’a. ’Aita ā ’oe i rave i te hō’e noa a’e. Terā rā, e nehenehe tā ’oe e ha’api’ipi’i ’ia rave i te fafaura’a. I te mau taime ato’a e rave ’oe i te ’ōro’a, e nehenehe tā ’oe e fa’aineine ’ia bāpetizohia ’e ’ia ha’amauhia ’oe. Nā reira ’oe e fa’aineine ai nō te ti’ara’a tō ’oe va’u matahiti ».
Mai te peu e mea huru ’ē ri’i te fa’a’ohipara’a i te parau ha’api’ipi’i mai te reira, ’a feruri na i teie i muri nei : I roto i te hō’ē vāhi tura, e fa’aineine te hō’ē metua tāne i tāna mau tamari’i nō te ’ōro’a nō te bāpetizora’a nā roto i te fa’a’itera’a e nāhea rāua i te ti’a i roto i te pape ’e te fa’ahitira’a i te mau parau nō te pure bāpetizora’a. ’Aita ’oia e rave ra i te ’ōro’a i reira. E nehenehe e parau ē, tē tauturu ra ’oia i tāna mau tamari’i ’ia ha’api’ipi’i. Nā reira, e’ita rātou e ha’ape’ape’a i te ’ohipa e tupu mai i te taime e haere rātou i roto i te pape nō te bāpetizora’a. Tē ti’aturi nei au ē e nehenehe ato’a te mau metua vahine ’e te mau metua tāne e tauturu i te mau tamari’i ’ia ha’api’ipi’i i te ravera’a ’e i te ha’apa’ora’a i te fafaura’a nō te bapetizora’a. E nehenehe te purera’a ’ōro’a tāta’itahi e riro ’ei purera’a ha’api’ipi’ira’a nō te mau tamari’i ri’i ’a rave ai rātou i te mau tāpa’o nō te tāra’ehara a te Fa’aora.
Nō reira e ho’i au i ni’a i ta’u uira’a mātāmua. Nō te aha tātou e vaiiho ai i te mau tamari’i ’aita i bāpetizohia ’ia rave i te ’ōro’a ? Nō te « vai noa ānei te hau » ? ’Aita roa atu ïa. E tauturu tātou i tā tātou mau tamari’i ri’i ’ia rave i te ’ōro’a ’ia ti’a ia rātou ’ia ha’amana’o i tō rātou Fa’aora ’e ’ia tāpe’a noa i tōna hau—e hau e ’ere mai tō te ao.7 E tauturu tātou ia rātou ’ia fa’aineine nō te fāri’i i te reira hau nā roto i te ’auhune rahi ’e te rahi atu ā ananahi, i te taime e rave ’e e ha’apa’o rātou i te mau fafaura’a ’e ana.