Te reo o te feiā mo’a i te mau mahana hope’a nei
Nā melahi, ’o Dunn tāne ’e ’o Dunn vahine
Fa’ahōho’ara’a nā Wilson Ong
Tē māta’ita’i ra vau i te ’āfata teata i te tāniuniura’a mai tō’u metua vahine nō te parau mai ē, ’ua ro’ohia tōna taea’e, tō’u tonton Floyd, 92 matahiti ’e tāna vahine, ’o tati Millie, i te ma’i hāpu (grippe) ’e ’aita tā rāua e mā’a i te fare. ’Aita ato’a ho’i au i maita’i roa nō te haere i te fare toa e ti’i mai i te tahi ’ohipa. ’Aita tō tonton Floyd ’e tati Millie e fēti’i ’ē nā pīha’i iho mai, nō reira ’aita e ta’ata ’ē nō te tauturu atu.
’Ua ani mai tō’u metua vahine mai te mea e nehenehe tā’u e tauturu atu. ’O vau ana’e te melo nō te ’Ēkālesia i roto i terā ’āma’a o te ’utuāfare ’e ’ua pi’ihia a’enei au nō te tahi ’ohipa mai te reira. Te fifi noa, tei Utaha vau i te nohora’a i Marite ’e tei Hemet i California tō’u tati ’e tō’u tonton.
’Ua parau vau i tō’u māmā e feruri au ma’a minuti e aha te rave. E hoa tō’u e ora ra i te hō’ē vāhi fātata ia Hemet nō reira ’ua tāniuniu vau iāna nō te ani e ta’ata ānei tāna i mātau i Hemet. ’Ua parau mai ’oia nō te hō’ē vahine tāna i tāvini nā muri iho i te hiero nō Redlands California, tōna i’oa ’o te tuahine Dunn, e peresideni Sōtaiete Tauturu ho’i i reira.
I te pāhonora’a mai te tuahine Dunn i te niuniu, ’ua parau vau, « ’Ia ora na e te tuahine Dunn. ’Aita ’oe i mātau iā’u, ’o Nancy Little tō’u i’oa, tē ora ra vau i Utah. E melo vau nō te ’Ēkālesia, tō’u rā tati ’e tō’u tonton i Hemet, e ’ere ïa. ’Ua ro’ohia rāua i te ma’i ’e ’aita tā rāua e mā’a i te fare ». ’Ua parau vau iāna i te vāhi fa’aeara’a, e mea ātea ïa i te vāhi tei reira ’oia, ’e ’ua fa’ata’a atu ra vau ē, ’ua hina’aro noa vau i te ’ite mai i te hō’ē fare tāmā’ara’a nā pīha’i iho ’o te nehenehe e ’āfa’i atu i te mā’a.
’Ua parau mai rā te tuahine Dunn ē, nā rāua tāna tāne e ’āfa’i atu i te mā’a nā rāua. ’E tano maita’i, e tihopu tā rātou i hāmani ’e e faraoa ato’a, ’e nō hāmani noa mai nei tōna metua vahine i te tahi cookies. ’Ua parau atu vau ’aita, ’ua onoono noa mai rā ’oia.
Ma’a hora i muri mai, ’ua tāniuniu mai te tuahine Dunn nō te ha’apāpū ē, mea maita’i rāua. ’Ua tāniuniu mai tō’u metua vahine i muri iho nō te parau mai e aha tā tonton Floyd i parau nō ni’a i te reira. ’Ua parau mai ’oia, « E nā melahi, ’o Dunn tāne ’e ’o Dunn vahine tei haere mai i te fare. ’Ua ’ī tō rāua nā rima i te mā’a : te mā’a hotu, te pota, te tihopu, te faraoa ’e te mau cookies. Terā te mau cookies monamona roa a’e tā’u i ’amu ». ’Ua hāhaere ’o Dunn mā i tō’u tonton nō te tauturu ia rāua ’e tō rāua mau hina’aro, i muri iho, ’ua ’amo te taea’e Dunn i tō’u tati Millie, tei paruparu ’e tei ro’ohia i te ma’i hīro’a mo’e (Alzheimer), mai roto i tōna ro’i i ni’a i te hō’ē pārahira’a i roto i te piha tūtu nō te tāmā’a.
I te tāniuniura’a tonton Floyd i tō’u metua vahine nō te fa’ati’a iāna, ’ua ta’i ’oia. ’Ua parau ’oia ’aita a’enei ’oia i fārerei i te ta’ata maita’i ’e te aupuru mai te reira. ’Ua parau ’oia i tō’u metua vahine ē, ’ua fāna’o vau i te orara’a i Utah ’e « terā mau mōmoni ato’a » ’ati a’e iāna.
E maha mahana i muri iho i te fārereira’a, ’ua haere tonton Floyd i tāna ’āfata rata i rāpae i te fare ’e ’ua he’e ihora ’e topa atu ra. ’Ua tā’iri tōna upo’o ’e ’ua pohe maha mahana i muri mai. Ta’a ’ē noa atu i te tuati ma’i e haere i tō rāua fare, ’o te taea’e ’e te tuahine Dunn te ta’ata hope’a tā tō’u tonton i ’ite hou ’a pohe ai.
’Ua māuruuru roa vau nō te hi’ora’a huru Mesia o te hō’ē o tō’u mau tuahine Sōtaiete Tauturu tei ora hānere ’e hānere maile i te ātea, e ta’ata ’aita ā vau i fārerei, ’o tei tauturu i tō’u tati ’e tō’u tonton.