Bwanaaia Aika Itiaki ni Boong Aika Kaitira
Tain Rongorongon te Utu
Kamaataata n te tamnei iroun Wilson Ong
Bukina bwa Ngai tinaia kairake n ataeinnaine aika uoman, I a tia n tainako ni karaoa au kewe are I aki kona n iri ni bwaai tabeua are I tangiria ni karaoia bukina bwa tiaki “te tai” ae riai ibukiu bwa N na iria. Bwaai aika e namakin aika e aki tangiria ni karaoia bon te mwakuri n rongorongon te utu.
E ngae ngke I a tia n ibuobuoki n te intekiting bwa te waaki ae kakukurei n te Tabati n taai aika a nako, I aki toki ni karekea angau bwa akea au tai ni katabeaki n rongorongon te utu n te tai anne.
E moantaai ni bitaki nanou n te moaningabong teuana tabeua te namwakaina n nako ngke I tekateka inanon te tembora. Ngke I rinanoi araia maate iaon kaati n te tembora, n tataro bwa a na butimwaai otenanti n te tembora ake a karaoaki ibukiia, I iango i nanou, “E aki rang tamaroa ngkana koraki aikai bon kaain au utu? I tangiria ni karaoa te mwakuri ibukiia.” E kamatoa te Tamnei nakoiu bwa ngkana bon au iango bwaai aikai , ngkanne e na buokai te Uea ni karaoa au mwakuri n rongorongon te utu, riki iaon te bong ae te Tabati. E kona ni buokai ni kakaea te tai ao te atatai ni kakoroa nanon Ana kantaninga.
N te Tabati anne, I nakon mweengau ao n nakon FamilySearch.org. N te tai ae waekoa I moanna n tang ngke I norii araia au bakatibu. Au reitaki ma ngaia e moanna ni korakora. Tera ae karaka au tangira ibukiia bon au tamnei ao beebaia, aika a tibwa karinaki iroun taman tinau, ni karikiia kaain au utu n taraa ni koaua ao ni kakawaki nakoiu. I namakina te kimwareirei ni kairekerekea natiu te aine uoua te ririki (n te mwakuri n rongorongon te utu), are e reiakinna ni kinai tamneia taman tinan tamana ao taman taman tinan tinana, ni weteia n araia. I namakina te kawai are e kabwarabwara Beretitenti Russell M. Nelson, te Beretitenti n te Kooram n te Tengaun ma Uoman: “Te Taabati e karekea te tai ae kakawaki ni kakorakorai reitaki n te utu. Imwiina ni kabane, te Atua e tangiriira n tatabemaniira, ngkai Natina, n oki nako Ina bwa Aika Itiaki aika a tia n entaute, kabaeaki n te tembora bwa utu, nakoia ara bakatibu, ao nakoia ara kariki” (“Te Tabati bon te Kakukurei, Riaona, Meei 2015, 130).
Man te moan n taneiai anne, I a tia n teimatoa ni karaoa te mwakuri n rongorongon te utu n te bong ae te Tabati. I a tia ni kakabwaiaaki ni karaoi mwakuri n te tembora ibukiia tabeman au utu ake a tia ni mate. Te kakabwaia ae onoti bon reiakinaia au bakatibu ao karekean te reitaki ma ana karo tinana aika tiaki kaain ara aro. E a tia ni kakorakoraa nanou ni kawakin au berita aika tabu ao ni kekeiaki ni karokoa te toki bwa iaonga n riki bwa te tia reitaki ae matoatoa n au utu ae akea tokina.
E ngae ngke iai riki mwakuri aika a na karaoaki, I kakaitau nakon Tamau are i Karawa ibukin karikirakean korakorau bwa I aonga n ibuobuoki n Ana mwakuri, riki n Ana bong. Ibukiu, te Tabati bon te tai ni kakukurei.