Kamimiin Kabuebuen uran te Ai ae bon Tau
Ko tangiria naba ngkai—ke ko tangira ae e na karaoaki raoi?
Iangoa te ataeinimwaane ae e maeka n tii ngaia ao e a roko irouna te baki (e kaangaanga kakoauana, eng, ma ti kataia n iangoia). Ngkai iangoia bwa te ataeinimwaane aei e baireia bwa e na kataia ni karaoa kanana te tianuwiti ni katoka iaona te tiiti i bon irouna ao ai tibwa ana moan tai.1 Iangoia bwa ana karo te ataeinimwaane aei a tuai man reireinna aron karaoan te tiiti ae kamwaaki ni mwaakan te ai ao e bon tuai man noora aron karaoana ngkana a karaoia.
Ti na kangai, tao te ataeinimwaane aei a bane n reke ana rengarenga: n aron te tiiti, teutana te bwata iaon te kariki (ao teutana te mwaeoneiti inanona bon te ataeinimwaane ae e rang wanawana). Are imwiina, e kaotinakoa te baan ao e katoka iaon te titobu. (Ngkana ti iangoia naba aron akean ana bwai ni kuuka ke ana bwai riki tabeua ibukin karaoan te bwai aei.)
Ngkai iangoia bwa a roko iango n ana iango—te iango are a mwaiti aomata aika a bon aki rang atatai (ke e bon aoraki tabeua te tai) n iangoia: “Ngkana I kauramwaaka riki, e na bae ni waekoa ni mwai.”
Iangoia bwa tera are e riki imwiina. (Ke tao ko na bon aki iangoia.)
E na karekea te mwakerukeru ae rokoraoi, te kariki ae buraaun ke e na bwatata, e na ran ana tiiti—ma tiaki ni kauoua. Ae e na bon riki, e na reke ana kariki are taraana ao namakinana (ao kanakina tao) kaanga atibun te warekeno ao ana tiiti ae e a kan ran, are kaanga e na rang aki tararaoi.
Ana kaangaanga, ae ko kona n nooria, bon ikotan te aki atatai (are e kona ni butimwaeaki) ao te aki taotaonaki n nano (are, e kona n ota te aba iai, e aki rang butimwaeaki). Ngkana e manga okira naba ana kairua aei n are imwiina, e na aki rang butimwaeaki, ngkai e bon aki kona ni bukinaki bwa e aki atatai ma bon mwiin raoi te aki taotaonaki n nano.
Kaetana raoi, e na bon noora kamimiin kabuebuen uran te ai ae bon tau.
Ae Bon Tau E Aki Kabotu
Nnen te ura are mai nuuka iaon te titobu e rokoraoi ibukin kamwaakin te tiiti ao amwarake aika a mwaiti ibukina bwa e kamwai amwarake man urana n aki kabwatata are mai tinaniku. Tii kabwakana bwa e kainnanoa riki te tai ao tarataarakina, are e kainnanoa te taotaonaki n nano.
Te Uea e a tia n tuangiira, bwa ti na “Reitinako inanon te tataonaki n nano ni karokoa ti a kororaoi” (tara D&C 67:13). E taekinna ikai te aekaki ni kororaoi are e reitinako iaon karaoan te tianuwiti n tiiti ae kamwaaki n te ura are i nuuka; E tangiriira bwa ti na riki n ai Arona. Iesu Kristo bon te banna ni katooto ae rietata n te taotaonaki n nano. Ao mwakoron iriirakin Ana banna ni katooto nanona karababaan ara kantaninga, n taratara iaon bwaai n te tai aei, ao n noori kanuanga aika a korakora riki ake a roko man reiakinam i bon iroum, onimaki, ongotaeka, teimatoa ao n reitinako ni mwakuri, korakai n te tai ae maan, ao n tangira—n taekana teuana, e na iai taotaonaki n nano.
Man te kabwarabwara, te taotaonaki n nano e kananona te tataninga, are e kona ni kabotu, ma ngke Beretitenti Dieter F. Uchtdorf, te Kauoman ni Kauntira n te Moan Beretitentii, e reireiniira, e korakora riki nakon are tii te tataninga: “Te taotaonaki n nano nanona n reitinako n tataninga ao n teimatoa. E kananonaaki bwa ko na reitinako ma te bwai teuana ao ni karaoi ni kabane ake ko kona ni karaoi—ni mwakuri, kantaninga, ao ni kamwakura te onimaki; uotii korakai ma korakoran te kantaninga, riki ngkana bwaai ake e tangiria nanora ana karimwiiaki. Te taotaonakinnano tiaki tii te teimatoa; bon te teimatoa raoi ni koaua!”2
Tiaki tii katokaan te tiiti n tianuwiti iaon te baan ao ni mwaninga taekana; bon tataraakina ao rairairana n te tai ae riai.
Tiaki tii kabanean te reirei ke te tieminari ke te taromauri; bon te kakamwakuri n reiakinna ao n nebonebo.
Tiaki ti tataningaan kakoauan n Ana Boki Moomon bwa e na roko iroum ibukina bwa ko bubuti ibukina; bon te reitinako ni wareware, kamatebwai, iango, tataro ao ni maiu ni kaineti ma koaua akana inanon te boki anne.
Tiaki tii n tekateka ikanne ngkai raoraom a waningarea am aro; bon te tataro ibukiia ao n tangiriia bwa e na bitaki nanoia ni karaoan te bwai are ko kona ni karaoia bwa e na riki.
Tiaki tii te tataninga ni karokoa 16 bongin namwakaina; bon reiakinana n tangira ao ni kataia n ota bwa e na kanga aron irakin aia reirei burabeti ni kakabwaiako.
Kakerikaaka Uran te Ai
Te Tataonaki n nano ao arom n tianiko, ke n taubaang, bon ngaia mwakoron “uaan te Tamnei” (taraa I-Karatia 5:22–23). E ngae ngke iai bwaai aika a rang kataweaki are e tangira te ienikuri ni mwakuri ke te waekoa ni kaeka (n aron ae iai amwarake aika a tangira kaurarakeaia), ko riai n taraia bwa kona karikirakea riki te tataonaki n nano ao te taubaan. Ngkana ko namakinna bwa e a riki aio, bon te kanikina bwa te Tamnei e a mwakuri inanon maium.
Kamimiin uran te ai are e ura mai nuuka e kona n anganiko te tianiwiti n tiiti ae rokoraoi, irikomaiu aika mronron ake aki taraaki bwa aekan bwain te aokii ae binke nuukana, ae turu buraun n aki turu rooroo, ao te raiti are maraurau ao ni bwaubwau n aki matoatoa ni kanimnim. Ma te taotaonaki n nano e na “katia raoi te mwakuri” (Iakobo 1:4) inanon maium, ni buokiko ni waaki nako n riki n aron Iesu Kristo, n uota te bitaki mai iroun te Tamnei ae Raoiroi, ao n tokina e na kairiko nakon te maiu are akea tokina.
Ngkai ko a atai bwaai aika ko kona iai n aki tataonaki n nano, iangoa te tianuwiti n tiiti ae kamwaaki ni mwaakan te ai (ke amwarake tabeua ake ko kona n iangoia) ao tera te bwai are ko kona n anganano iai ni kariaia te taotaonaki n nano bwa e na kaira am mwakuri. Ngkana ko namakina te kairua n aki taotaonaki n nano n tabetai, ko riai n ataia bwa e riki naba nakoia aomata aika a mwaiti. Ko kona n raira nanom ao ni manga kataia riki n iriira ana banna ni katooto Iesu Kristo ao ana reirei. E mwaiti riki te tianuwiti n tiiti ae e na karaoaki, ao e aki iremwe reiakinan aron karaoan ae rokoraoi are e kona n reke rinanon te taotaonaki n nano.