Ni Karokoa Ae Ti A Manga Kaitiboaki
Te Kabanea ni Wanawana mai Karawa n ana Ekaretia te Uea
Man “He S lumbers Not, nor Sleeps,” Ensign, Meei 1983, 5–8. Kanikina n te koroboki ao kabuburaan korean manin koroboki a kaboraoaki.
Te Atua e a waakina karaoan Ana mwakuri.
Korotamneiaki iroun John Hafen, te mwamwannano man te Church History Museum
Te wanawana mai Karawa ni kaira aron bairean te mwakuri aei ao ibukin wewete nakon te nakoa ni mataniwi a nooraki koauaia. Mataniwi ni Kabuta bon aomata, n tatabemaniia nako, ma oin anuaia. Ngaiia n tatabemaniia a uota tibwangaia n aia taneiai aika a kakaokoro aika a mwaiti ao man taabo ake a nako mai iai. Ngkana iai bwaai aika a na maroroakinaki n te kauntira are e rietata n te Ekaretia, ngaiia n tatabemaniia a inaomata ni kaoti aia iango. N aron are e nooria temanna ae iai nanona ni waaki n te mwakuri, e bon kamimi aron kakoauan mwaakan te Tamnei ae Raoiroi ni kairiia mwaane aikai. A kakaokoro aia iango ma a aki kona ni kaotia n te aro n akiako ma iango aikai a kamarauaki inanon te tai ao ni kabane a ikotaki ni katiteuanaaki. “Au auti bon te auti ae baireaki raoi,” e taku te Uea (taraa D&C 132:8). Ni kakoauan mwakurian kaotioti n te kauntira ae te kabane n rietata n te Ekaretia, I namakina manga kabouan au onimaki ae teimatoa. …
Tabeman a kaota raraomaia bwa te Beretitenti n te Ekaretia n tainako e bon riki bwa te unimwane, are I kaeka nako iai, “Bon te kakabwaia!” Te mwakuri ni koron te bong aei e moan karaoaki rinanon mwakuri aika kairaki rinanon te Burabeti Iotebwa Timiti. Bon te kairake ngaia n te tai anne ao e rang marurung, ao tiaki te aekaki n aomata are ana iango ao ana babaire a kairaki ni katein taai akekei n ana tai. E rang n raa ana iango are te Uea e kateiraoia n aron ae e boou ngkai E moan waakina Ana mwakuri.
Te Beretitenti are imwiina n te Ekaretia imwiiin Iotebwa e bon kairake naba ngke e kaitara ma te tibwanga ae kakamaaku ni kairakiia te botanaomata n rinuukan te rereua n riki bwa baeoniia n te aba ae boou nakoia.
Ma aan ara reirei a wene raoi ni nneia, ao ti a tei ni matoatoa bwa ana aomata, ni karokoa te Uea e na manga tuangiira bwa ti na manga mwaing nakon te tabo teuana. Ti aki kainnanoi kawai aika boou ni karaoan bwaai. Ti kainnanoa te motinnano ao te ongotaeka nakon reirei ake a taekinaki mai karawa. Ti kainnanoa te karinerine nakoia ara mataniwi, are e a tia n rineia te Atua. Bon ngaia ara burabeti, ara tia mamata ao te tia kaotioti. Ti riai n aki katukaki n akea ara burabeti ngkana ti maiuakina ae tau ni karekea temanna E kona n ae tiaki te kairake. E a tia ni kairiia ao e na teimatoa ni kairiia mwaane aika uarereke riki nakoina bwa a na mwananga n te aonaaba ni karaoa te mwakuri. Bon ngaia te ibonga ae te kabanea n rietata are e tararua, ngaia are e taui ni kabane kingin te nakoanibonga ae tabu, ao are e karekei kaotioti mai iroun te Atua nakoia Ana aomata.
Iai te taeka n rabakau ngkoa ae kangai, “Te roro ni kairake bon taan mwakuri. Te roro ae e a kara bon taan wanawana.”
N au iango iai te bwai ae korakora ae karaunano n taai aika a na roko n raroan are ti kona n noria e na reke ara Beretitenti are e a tia ni boaki ao ni kataneiaki, kataaki ao n taubwiaki, are ana kakaonimaki nakon te mwakuri ao ni kokoaua ao ana konabwai nakon te mwakuri e a tia ni kateiraoaki rinanon te mwakuri ae korakora, are e a matoa raoi ana onimaki, ao reitakina ma te Atua e a tia n ribanaaki inanon taai ma ririki aika a rang mwaiti. …
Ti riai n aki maakui taai aika a na roko ngkana ti teimatoa nakon reirei aika kaokaki.