Taetae ni Burabeti n Taabo Aika Aki Kaantaningaki
E maeka te tia koro rongorongo i Argentina ngke e mwakuri kaain abana bwa te beretitenti n te mition.
Te maekatiin ae katukaki e na bita maiun Oscar Castro n aki toki.
E bwabetitoaki Oscar Castro ao ni kamatoaaki imwiin kuneakin taekan te maungatabu ni kabuta n te Riaona inanon te mweenga are e mwaing nako iai.
Kamataata n te tamnei iroun Dan Burr; e katauraoaki te rawetamnei iroun te tia koro rongorongo
Te bong are e kitanaki iai Oscar ma natina aika uarereke aika uoman iroun buuna bon teuana te bwai ae moan te kaangaanga ni maiuna. A rangi ni mwaiti baire aika a riai ni karaoaki. E a tia ni kakaea ana mwakuri, ao ngkai e a manga tangira te tabo ae boou bwa e na maeka iai. N ana iango ao e taku bwa e aki baireaki raoi aron maiuna. E iangoia ae e nang katoka ana kekeiaki, ao ni kabwara nanona ma e aki kona ibukiia uoman natina aika titikiraoi.
I San Juan, Argentina, aki mwaiti mweenga aika a tauraoi are kona Oscar ni kabooa. Ma iai te maeka ae uarereke n te tabo ae mano irarikina e a tibwa tia ni kitanaki irouia kurubu n ataeinimwaane, ngaia ae e a kaboa Oscar ao ni katauraoi ni moana maiuna ae boou ma natina.
Ni mweengaia ae boou, tabeua maekatiin ao booki a katukaki iaon te burooa, ao imwiin aia mwakuri ni kabutaa te bong anne ni kaitiaki ao ni kanakoi bwaai, e tekateka Oscar ao ni mataku n teuana te maekatiin. E anaaki nanona n tinanikuna ma bukina tabeua. Iaan atuun te boki, Riaona, iai tamnein te mwaane ae a kara n tei iaon te taua n taetae nakoia aomata. Te mwaane e kauringnga tamneia burabeti inanon te baibara.
E kauka te maekatiin Oscar ao ni moanna ni wareware, “Ngaira n tatabemaniira nako ti riai n tuangiia aomata aika ti tangiriia bwa ti tangiriia. Ma tera ae ti ataia e aki kaotaki n taai nako n te bwai are ti karaoia.”1 E iangoi taeka Oscar aika kamatauninga ae a tia n taekinaki n taai aika mwaiti imarenana ma kaainabana. E tangiria n reireiniia natina bwa ana nakoraoi riki nakon anne. E reitinako Oscar ni wareka te maekatiin, ao e moanna n namakina te kantaninga n rikirake inanona. Imwain tokin te wiikii, e a tia ni wareki rongorongo n tatabeua ao e tangiria ni kan ataia riki.
Teuana te namwakaina imwiina uoman mitinare a nakonako n aia tabo kaain rarikin Oscar. E kawariia Oscar ao n titirakiniia ngkana ngaia mitinare irouia Aika Itiaki ni Boong Aika Kaitira ao e na iraua te kabane mwane ni karekei riki ana maekatiin te Ekaretia aikanne. E tuangnga te mitinare ae e na ti tangira tao 20 te miniti n ana tai.
Te bong are imwiina mitinare ake uoman a kawara Oscar ni mweengana. E tuangiia Oscar taekan mwaingina ao ni kunei booki aika, maekatiin, ao booki aika uarereke ake a maan ake a kaota nakoina taekan te Ekaretia. E kabwarabwara bwa te moan boki are e warekia e kaineti ma te bwai ae riki ni maiuna n te tai anne. E a kaman ata aron kakawakin te utu ao n tangiria ni kan ata riki taekan bootakin te utu n te tairiki ao te tataro n te utu. E tuangiia mitinare te bwai ae e a tia n reiakinna n taekan te Ekaretia, n raonaki ma taekan Iotebwa Timiti ao Kaokakin te euangkerio.
E tarai mataia mitinare ao n taekin taeka aika a kan ongoongo mitinare n tatabemaniia: “I kakoaua bwa Iotebwa Timiti bon ana burabeti te Atua.” E kaoaki irouia mitinare bwa e na bwabetitoaki, ma rannimatana, e kariaia Oscar. Tabeua te wiiki imwiina, e bwabetitoaki Oscar Castro ao ni kamatoaki bwa kaain te Ekaretia.
E a tia te Uea ni katauraoa Oscar, ao e raraoma tamneina ao n tauraoi n reirei ao n rikirake. N te tai ae kauringaaba anne, ae rooti naano, tamnein rongorongo man te beeba ni kaongora n te maungatabu ni kabuta n te Riaona e riinga nanon Oscar. Taan bwaibwai n te mweenga mai imwaina aki ataa mwiin te bwai ae na riki man katukan tabeua maekatiin n te Ekaretia, ma rongorongon te euangkerio n taian maekatiin aikanne a riki bwa aia bwai ni mwakuri mitinare aika a kakawaki. Ni kairakina nakon koaua ake e a kaman ukoukori, a onika maiun Oscar n aki toki.